భళ్లాలదేవుడికి, కాలకేయుడికి మీరే సాటి

ఎన్నికల సందర్భంగా ఆంధ్రప్రదేశ్ లో రాజకీయ వాతావరణం వేడెక్కింది. విమర్శలు, ప్రతివిమర్శలతో పరిస్థితి మొత్తం హాట్ హాట్ గా మారింది. ఓవైపు ఎండ వేడి.. మరోవైపు నేతల విమర్శల వాడి వెరసి రాష్ట్రం సెగలు కక్కుతోంది. తాజాగా ప్రధాని నరేంద్ర మోదీపై ఏపీ సీఎం తనయుడు, మంత్రి నారా లోకేశ్ విరుచుకుపడ్డారు. ట్విట్టర్ వేదికగా విమర్శల తూటాలు సంధించారు. బిజ్జలదేవుడికి మీరే సాటంటూ ధ్వజమెత్తారు.

సోమవారం తూర్పుగోదావరి జిల్లా రాజమహేంద్రవరంలో జరిగిన సభలో ప్రధాని మోదీ మాట్లాడుతూ టీడీపీ అధినేత చంద్రబాబుపై విమర్శలు చేశారు. భారతీయ జనతాపార్టీ దేశ ప్రజల ఆకాంక్షలకు అనుగుణంగా పనిచేస్తుంటే యూటర్న్ బాబు పరిస్థితి బాహుబలి సినిమాలోని భళ్లాలదేవుడి పరిస్థితిలా తయారైందని మోదీ ఎద్దేవా చేశారు.

పోలవరం ప్రాజెక్టు పట్ల టీడీపీకి చిత్తశుద్ధి లేదని, కమీషన్ల కోసం ఇష్టానుసారం ఆ ప్రాజెక్టు అంచనాలు పెంచుకుంటూ పోయారని, ఈ పథకాన్ని మనీ ఇచ్చే ఏటీఎంగా మార్చుకుని దుయ్యబట్టారు. ఆంధ్రప్రదేశ్ హరిటేజ్ ను కాపాడటం బీజేపీ సంకల్పం కాగా, తన సొంత సంస్థ హెరిటేజ్ ను కాపాడుకోవడం చంద్రబాబు లక్ష్యమని మోదీ విమర్శలు చేశారు.

అనంతరం దీనిపై చంద్రబాబు కూడా అంతే స్థాయిలో స్పందించారు. తాను రాష్ట్రానికి బాహుబలిలా పనిచేస్తానని.. భళ్లాలదేవుడు, బిజ్జలదేవుడు వంటి జగన్, మోదీ బారి నుంచి రాష్ట్రాన్ని రక్షిస్తానని పేర్కొన్నారు. పోలవరం తమకు ఏటీఎం కాదని, ఎట్టి పరిస్థితుల్లోనూ జూలైలోగా ఈ ప్రాజెక్టు ద్వారా నీళ్లిచ్చి ఎనీ టైం వాటర్ (ఏటీడబ్ల్యూ)గా మారుస్తానని వ్యాఖ్యానించారు.

అనంతరం ఈ వ్యవహారంపై మంత్రి నారా లోకేశ్ కూడా స్పందించారు. ట్విట్టర్లో మోదీపై సెటైర్లు వేశారు. ‘‘ఆంధ్రప్రదేశ్ కి ప్రత్యేక హోదా ఎత్తేసి దండయాత్ర చేస్తున్న కాలకేయుడుగారూ.. కేంద్రం నుంచి ఒక్క పైనా సహాయం లేకపోయినా ఆంధ్రులు తలెత్తుకుని నిలబడేలా చేసిన బాహుబలి మా ముఖ్యమంత్రి చంద్రబాబునాయుడుగారు’’ అని ఓ ట్వీట్ చేశారు.

రూ.54 వేల కోట్లయ్యే పోలవరం ప్రాజెక్టుకు కేవలం రూ.6 వేల కోట్లు మాత్రమే ఇచ్చి ఇంకా పూర్తిచేయలేదంటున్నారు.. మీకు లెక్కలు రావా? లేక ఆంధ్రుల జీవనాడి పోలవరం అంటే లెక్క లేదా అని ప్రశ్నించారు. గుజరాత్ లో నరమేధం సాగించిన మోదీగానూ.. అరివీర భయంకరులైన మీరు భళ్లాలదేవుడికి సరిసాటి. కాలకేయుడికి మీరే పోటీ అని మరో ట్వీట్ లో పేర్కొన్నారు.

ఇక ఆంధ్రప్రదేవ్ హెరిటేజ్ ను చూసుకోవడానికి చంద్రబాబు ఉన్నారని, హెరిటేజ్ సంస్థను చూసుకోవడానికి బ్రాహ్మణి, భువనేశ్వరి ఉన్నారని చెప్పారు. మోదీ మాత్రం జగన్ అక్రమాస్తుల హెరిటేజ్ కి చౌకీదార్ గా మారారని లోకేశ్ విమర్శించారు. కాగా, మంగళగిరి నియోజకవర్గం నుంచి పోటీ చేస్తున్న లోకేశ్ ప్రచారంలో దూసుకుని వెళ్తున్నారు.

ఈ సందర్భంగా అక్కడి స్వర్ణకారులకు హామీలు ఇచ్చారు. వారికి ప్రత్యేక కార్పొరేషన్ తీసుకొస్తానని, దుబాయ్ తరహాలో మంగళగిరిలో గోల్డ్ మార్కెట్ ఏర్పాటు చేయిస్తానని పేర్కొన్నారు. అలాగే రూ.10వేల కోట్లతో ఏర్పాటుచేయబోయే బీసీ అభివృద్ధి బ్యాంకు ద్వారా స్వర్ణకారులకు రుణాలిప్పిస్తానని హామీ ఇచ్చారు.

54 వేల కోట్ల‌య్యే #పోల‌వ‌రం ప్రాజెక్ట్‌కి 6 వేల‌కోట్లిచ్చి పూర్తిచేయ‌లేదంటున్నారు.
మీకు లెక్క‌లు రావా? ఆంధ్రుల జీవ‌నాడి పోల‌వ‌రం అంటే లెక్కే లేదా?

గుజ‌రాత్‌లో న‌ర‌మేథం సాగించిన న‌రేంద్ర మోడీ గారూ!
అరివీర భ‌యంక‌రులైన మీరు భ‌ళ్లాల దేవుడికి స‌రిసాటి.
కాల‌కేయుడికి మీరే పోటీ!

— Lokesh Nara (@naralokesh) April 1, 2019