ఎంవీ ట్యాక్స్‌: విచ్చలవిడిగా దోచేస్తోన్న ఆ వైసీపీ నేత ఎవరు.?

‘ఎట్టి పరిస్థితుత్లోనూ అవినీతి అన్న మాటకే ఆస్కారం వుండకూడదు..’ అని ఓ పక్క ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి స్పష్టమైన ఆదేశాలు జారీ చేస్తోంటే, పార్టీ నేతలు మాత్రం తమదైన స్టయిల్లో ‘ట్యాక్స్‌లను’ వసూలు చేస్తూ, ప్రభుత్వాన్ని ఆరు నెలలు తిరగకుండానే అప్రతిష్టపాలు చేసేస్తున్నారు. తాజాగా, కృష్ణా జిల్లాకు చెందిన ఓ వైసీపీ ముఖ్య నేత ‘దోపిడీ’ వ్యవహారం రాజకీయ వర్గాల్లో కలకలం రేపుతోంది.

కాంగ్రెస్‌ నుంచి, వైసీపీలోకి వచ్చిన సదరు నేతపై గతంలో ‘కల్తీ లిక్కర్‌’ ఆరోపణలు వచ్చాయి. ఆ తర్వాత ఆయన తెలివిగా, వైఎస్సార్సీపీ వైపు అడుగులేసి పునీతుడైపోయాడు. చంద్రబాబు నివాసం వుంటోన్న లింగగమనేని గెస్ట్‌ హౌస్‌ అనుమతుల వ్యవహారంలోనూ సదరు నేత పేరు ప్రముఖంగా విన్పిస్తోంది. ‘అడ్డగోలుగా దోచేస్తున్నారు.. ఎంవీ ట్యాక్స్‌ అంటున్నారు.. ఇవ్వకపోతే బెదిరిస్తున్నారు..’ అంటూ బాధిత వ్యక్తి ఒకరు ఓ ఆడియో టేపుని విడుదల చేయడం.. అదిప్పుడు సోషల్‌ మీడియాలో బీభత్సంగా జర్కులేట్‌ అవుతుండడం జరిగిపోయాయి.

సదరు నేతపై వైసీపీ శ్రేణులు సైతం ఇబ్బందికరంగానే వ్యవహరించాల్సి వస్తోంది. అధినేతకు అత్యంత సన్నిహితుడు కావడంతో, ఆయన ఏం చేసినా ఇంకెవరూ అతన్ని ప్రశ్నించే పరిస్థితి లేదని వైసీపీ నేత ఒకరు ఆఫ్‌ ది రికార్డ్‌గా వాపోయారట తన సన్నిహితుల వద్ద. దుర్గ గుడి వ్యవహరంలోనూ సదరు వైసీపీ నేత తీరు అస్సలేమీ బాగాలేదనీ, మంత్రుల్ని సైతం ఆయన లెక్క చేయని పరిస్థితి వుందనీ అంటున్నారు.

‘జగన్‌కి ఫిర్యాదు చేసుకుంటే చేసుకోండి.. అంతా నా ఇష్టం..’ అని ఆయన చేస్తున్న వ్యాఖ్యలతో మంత్రులు సైతం గుస్సా అవుతున్నారట. కోడెల ట్యాక్స్‌.. అంటూ మనమే విమర్శించాం.. ఇప్పుడీ ఎంవీ ట్యాక్స్‌ విషయంలో ఏం చేయలేకపోతున్నాం.. అని మొదటి నుంచీ జగన్‌ వెంట తిరిగిన నేతలు వాపోతున్నారట.