మళ్ళీ ప్రధానిగా మోడీ.. చాలా కష్టమేగానీ.!

నరేంద్ర మోడీ ఇంకోసారి ప్రధాని పీఠమెక్కుతారో లేదో మే 23న వెల్లడయ్యే ఫలితాలతో తేలిపోతుంది. అయితే, కమలనాథుల్లో కంగారు కాస్త ఎక్కువైనట్లుంది. ఆందోళనలో ‘వాస్తవాల్ని’ తొందరపడి ముందే చెప్పేస్తున్నారు. దేశంలో మోడీ వ్యతిరేక గాలి వీస్తోందన్న విషయాన్ని బీజేపీ నేతలే పరోక్షంగా ఒప్పేసుకుంటున్నారు. అయితే, నరేంద్ర మోడీకి ఓ అడ్వాంటేజ్‌ లేకపోలేదు. అదే, ఆయనకు పోటీగా నిలబడే ‘నాయకుడు’ ఇంకొకరు జాతీయ స్థాయిలో లేకపోవడం.

కాంగ్రెస్‌ తరఫున రాహుల్‌ గాంధీ ప్రధాని పదవి కోసం పోటీ పడుతున్నప్పటికీ నరేంద్ర మోడీతో పోల్చితే ఆయన ఇమేజ్‌ అంతంతమాత్రమే. గతంతో పోల్చితే రాహుల్‌ ఇమేజ్‌ కొంత పెరిగిన మాట వాస్తవం. కానీ, అది నరేంద్ర మోడీతో పోటీపడగలిగే స్థాయిలో మాత్రం లేదు. ఈ విషయాన్ని కాంగ్రెస్‌ నేతలే ఒప్పుకుంటున్నారు. ఇటీవలి కాలంలో మమతా బెనర్జీ ఇమేజ్‌ దేశవ్యాప్తంగా బాగా పెరిగింది. దాంతో, కాంగ్రెస్‌ కూడా మమతా బెనర్జీ పట్ల కొంత సానుకూలంగానే వ్యవహరిస్తున్నట్లు కనిపిస్తోంది.

కాంగ్రెస్‌ ఎప్పుడైతే మమతా బెనర్జీ విషయంలో సానుకూలంగా వ్యవహరించడం మొదలు పెట్టిందో, బీజేపీలో గుబులు బయల్దేరింది. దేశ రాజకీయాల్లో అతి కొద్ది మంది ‘క్లీన్‌ పొలిటీషియన్స్‌’లో మమతా బెనర్జీ ఒకరు. ఇందిరాగాంధీ తర్వాత మమతా బెనర్జీని రాజకీయాల్లో ఐరన్‌ లేడీగా భావిస్తారు. గతంలో ఆమె కేంద్ర మంత్రిగా కూడా పనిచేశారు. ఓ మహిళ అని కూడా చూడకుండా, ప్రధాని నరేంద్ర మోడీ ఎన్నికల ప్రచారంలో రాజకీయ విమర్శలు హద్దు దాటి మమతపై చేయడం బీజేపీకి నెగెటివ్‌గా మారింది. అదే, ఈ ఎన్నికల్లో నరేంద్ర మోడీని ముంచేస్తుందని బీజేపీ కురువృద్ధులు అభిప్రాయపడుతున్నారు.

‘బీజేపీలో ఇలాంటి పరిస్థితిని ఇంకెప్పుడూ చూడలేదు. నరేంద్ర మోడీ ప్రతి ఒక్కరినీ తన ప్రత్యర్థిలాగానే చూస్తున్నారు. బీహార్‌ అసెంబ్లీ ఎన్నికల్లో నితీష్‌కుమార్‌ చేతిలో నైతిక ఓటమి చెందారు. తెలంగాణ అసెంబ్లీ ఎన్నికల్లో కేసీఆర్‌ చేతిలో నరేంద్ర మోడీకి నైతిక ఓటమి ఎదురయ్యింది. ఢిల్లీ అసెంబ్లీ ఎన్నికల్లోనూ అంతే.. కేజ్రీవాల్‌ చేతిలో నరేంద్ర మోడీకి నైతిక ఓటమి ఎదురయ్యింది. అసెంబ్లీ ఎన్నికలకీ ప్రధానికీ సంబంధమేంటి? అని ఊరుకోకుండా, నరేంద్ర మోడీ ఆ ఎన్నికలు తనకూ, ఆయా రాష్ట్రాల్లోని బలమైన రాజకీయ నాయకులకీ మధ్యన అన్నట్లు భావించడంతోనే ఈ సమస్య వచ్చింది.

బీహార్‌లో నితీష్‌కుమార్‌ని తనవైపుకు తిప్పుకున్నట్లుగా నరేంద్ర మోడీ గనుక ఫలితాల తర్వాత కేసీఆర్‌, జగన్‌ లాంటోళ్ళను తనవైపుకు తిప్పుకుంటే మళ్ళీ ప్రధాని పీఠమెక్కడానికి అవకాశాలున్నాయి. అయితే, ఆ స్థాయిలో సమీకరణాలు మార్చడానికైనా తగిన బలం కావాలి కదా!