ఈ ‘సలహా’ ఆంధ్రప్రదేశ్ ప్రజల నెత్తిన ‘గుదిబండ’.!

అసలు సలహాదారులు ఎందుకు.? ఇలా ఆంధ్రప్రదేశ్ ప్రజలు చర్చించుకోవడం ఎందుకు జరుగుతోంది.? ఎందుకు జరగకూడదు.? సలహాదారుల గౌరవ వేతనాలు, వారికి కల్పించే ప్రత్యేక సౌకర్యాలు.. ఇవన్నీ ప్రభుత్వ ఖజానా నుంచే.. అంటే, ప్రజల జేబుల్లోంచి ఖర్చు చేస్తున్నదే కదా.?

ప్రభుత్వం ఖర్చు చేసే ప్రతి పైసాకి సంబంధించి ప్రజల్లో చర్చ జరగాలి, జరిగి తీరాలి. అదే ప్రజాస్వామ్యం. కానీ, అలా జరుగుతోందా.? అంటే, లేదనే చెప్పాలి. పైగా, ఆంధ్రప్రదేశ్ రాష్ట్రం విభజనతో ఇబ్బందుల్ని ఎదుర్కొంటోంది. ఉద్యోగులకు ప్రతినెలా వేతనాలు ఇవ్వడానికే నానా తంటాలూ పడుతోంది. రాజధాని అమరావతిని నిర్మించడానికి ప్రభుత్వం వద్ద నిధులు లేవాయె.! ఈ పరిస్థితుల్లో వృధాగా ఒక్క పైసా ఖర్చయినా.. అది క్షమార్హం కాని నేరం.

ప్రత్యేకించి సలహాదారుల విషయంలోనే ఎందుకీ వృధా ఖర్చు అనే అంశం ప్రస్తావనకు వస్తోంది.? అంటే, ప్రభుత్వానికి సలహాలు ఇవ్వడానికి ప్రతినెలా జీతాలు తీసుకునే అధికారులున్నారు. ఆ అధికారుల్ని కాదని, కొందర్ని ప్రభుత్వం సలహాదారులుగా ప్రత్యేకంగా నియమించుకోవడం.. వారికి బోల్డంత సొమ్ము గౌరవ వేతనాల రూపంలో ఖర్చు చేయడం, వారికి ఇతర సౌకర్యాలు కల్పించడానికీ భారీయెత్తున నిధులు వెచ్చించడం.. ఇదంతా వివాదాస్పదమవుతోంది.

మీడియా సలహాదారు ఏం చేస్తున్నట్టు.? కొత్తగా ఎలక్ట్రానిక్ మీడియా సలహదారు ఎందుకు.? ఇలా ప్రతి సలహాదారు పోస్టు గురించీ ప్రజల్లో చర్చ జరుగుతోంది. మరి, ప్రభుత్వం.. ప్రజలకు ఈ సలహాదారుల వేతనాల విషయమై సమాధానం చెబుతుందా.? ఇదే ఇప్పుడు మిలియన్ డాలర్ల ప్రశ్న.

సాక్షి మీడియాలో పనిచేసిన ఉద్యోగులకు వైసీపీ అధికారంలోకి వచ్చాక రకరకాల పదవులు దక్కాయి. అందులో సలహాదారులూ వున్నారు. వీళ్ళకే ఏకంగా 200 కోట్లు ఖర్చు చేశారంటూ మీడియాలో కథనాలు వస్తున్నాయి. ఇందులో వాస్తవమెంత.? వాస్తవం కాకపోతే, ఆయా మీడియా సంస్థలపై ప్రభుత్వం చర్యలు తీసుకోవాల్సి వుంది.

కానీ, సజ్జల రామకృష్ణారెడ్డి, దేవులపల్లి అమర్, కొమ్మినేని శ్రీనివాసరావు.. ఇలా సాక్షి ఉద్యోగులు చాలామందే ప్రభుత్వంలో పలు రకాల పదవుల్ని పొందారాయె.! సాక్షి ఉద్యోగులకి ప్రజాధనాన్ని వెచ్చించడమా.? అన్న ప్రశ్న వస్తోంది మరి. ప్రభుత్వం తరఫున సమాధానం ఎలా వుండబోతోందో ఏమో.!