అగ్రవర్ణ పేదలు సరే.. అసలు పేదలంటే ఎవరు.?

అగ్రవర్ణాల్లో ఆర్థికంగా వెనకబడినవారి విషయమై చాలాకాలంగా ‘రిజర్వేషన్ల’ అంశం తరచూ చర్చనీయాంశమవుతూనే వుంది. ఈ కేటగిరీ కోసమే 10 శాతం రిజర్వేషన్లను కేటాయిస్తూ నిర్ణయాలు జరిగాయి.. ఈ వ్యవహారం కోర్టెకెక్కింది.. సర్వోన్నత న్యాయస్థానం, గ్రీన్ సిగ్నల్ కూడా ఇచ్చింది తాజాగా.!

అంతా బాగానే వుందిగానీ, అగ్రవర్ణాల్లోని పేదలెవరు.? అసలు పేదవాళ్ళంటే ఎవరు.? దేశంలో కొన్ని రాష్ట్రాల్లో ‘పేదలు’ అన్న ప్రస్తావనకు అర్థం మారిపోయింది. ఆయా రాష్ట్రాల్లో తెల్ల రేషన్ కార్డు దారుల సంఖ్య గణనీయంగా పెరుగుతోంది. ఆయా ప్రభుత్వాలు తాము చేపడుతున్న సంక్షేమ పథకాలు 95 శాతం మందికి అందుతున్నాయని ఘనంగా చెబుతున్నాయి.

ఆ లెక్కన ఆయా రాష్ట్రాల్లో పేదరికం ఎంత వుంది.? దేశంలో పేదరికం ఎంత వుంది.? కేంద్ర, రాష్ట్ర ప్రభుత్వాలు అందిస్తున్న సంక్షేమ పథకాలు పేదలకు అందితే, అసలంటూ పేదరికం దేశం నుంచి మటుమాయమైపోవాలి కదా.. కనీసం ఆ పేదరికం తగ్గాలి కదా.? పేదరికం తగ్గడంలేదు సరికదా, సంక్షేమ పథకాలు అందుకుంటోన్న పేదల సంఖ్య నానాటికీ పెరిగిపోయింది.

దాంతో, అసలు పేదలు ఎవరు.? అన్న చర్చ తెరపైకి వస్తోంది. కులాంతర వివాహాలు, మతాంతర వివాహాలు ఇటీవలి కాలంలో సర్వసాధారణమైపోయాయి. మరి, ఏవి వెనుకబడిన సామాజిక వర్గాలు.? ఏవి అగ్ర వర్ణాలు.? నిజానికి, ఇవి చాలా చాలా సున్నితమైన అంశాలు.

రిజర్వేషన్ల ఫలాలు అందాల్సినవారికి అందుతున్నాయా.? అలా అందడం వల్ల సమాజంలో వస్తున్న మార్పులేంటి.? పేదరికం నానాటికీ పెరుగుతోందంటే, సంక్షేమ పథకాల వల్ల ఉపయోగం లేదనే కదా అర్థం.?

గతంలో పరిస్థితులు వేరు.. ఇప్పటి అనుకూలతలు వేరు. ఎవరు ఎంత సంపాదిస్తున్నారు.? అన్నదానిపై ప్రభుత్వాల దగ్గర ఖచ్చితమైన లెక్కలు వుంటున్నాయ్. సో, పేదెలెవరన్నది తేల్చేయడం పెద్ద కష్టమేమీ కాదు. కానీ, అధికారంలో వున్నవారి రాజకీయ అవసరాల నిమిత్తం.. సంక్షేమ పథకాల్ని అమలు చేసి, జనాన్ని తమ గుప్పిట్లో వుంచుకోవాలి గనుక.. పేదల లెక్క తేలడంలేదు.

మత మార్పిడులు కనీ వినీ ఎరుగని రీతిలో జరుగుతున్నా.. వాటి లెక్కల్నీ ప్రభుత్వాలు బయటపెట్టలేకపోతున్నాయ్. ఇలాంటి పరిస్థితుల్లో ఈ రిజర్వేషన్ల అంశం చర్చనీయాంశంగా మారడం ఒకింత ఆశ్చర్యకరమే