కేసీఆర్ కి మోదీ వార్నింగ్ బెల్!

టీఆర్ఎస్ అధినేత, తెలంగాణ సీఎం కేసీఆర్ కు అత్యంత సన్నిహితుడు, మైహోం గ్రూప్ అధినేత జూపల్లి రామేశ్వరరావుపై అకస్మాత్తుగా ఐటీ దాడులు జరగడం వెనుక కారణాలు ఏంటనే అంశంపై రాజకీయ వర్గాల్లో జోరుగా చర్చ జరుగుతోంది. దీని వెనుక బీజేపీ హస్తం ఉందని, కేసీఆర్ కి ప్రధాని మోదీ ఇచ్చిన వార్నింగ్ బెల్ అనే అభిప్రాయాలు వ్యక్తమవుతున్నాయి. 2023లో తెలంగాణలో అధికారంలోకి వచ్చే దిశగా పావులు కదుపుతున్న బీజేపీ.. ఇప్పటినుంచే తన కార్యాచరణ అమల్లో పెట్టినట్టుగా తెలుస్తోంది.

ఇప్పటికే సీఎం కేసీఆర్, ప్రధాని మోదీ మధ్య అగాథం ఏర్పడింది. సార్వత్రిక ఎన్నికల ముందు మోదీకి వ్యతిరేకంగా ఫెడరల్ ఫ్రంట్ ఏర్పాటుకు కేసీఆర్ ప్రయత్నాలు చేశారు. అయితే, ఇదంతా మోదీ వ్యతిరేక ఓటు చీల్చేందుకు కేసీఆర్ ఆడుతున్న డ్రామా అని విపక్షాలు ఆరోపించాయి. కానీ వాస్తవ పరిస్థితులు అందుకు విరుద్ధంగా కనిపించాయి. ఎన్నికల తర్వాత తిరుగు లేని మెజార్టీతో బీజేపీ అధికారంలోకి రావడంతో కేసీఆర్ సైలెంట్ అయ్యారు.

అప్పటి నుంచి మోదీతో కేసీఆర్ సంబంధాలు కూడా తగ్గుముఖం పడుతూ వచ్చాయి. కేసీఆర్ అపాయింట్ మెంట్ అడిగినా మోదీ ఇవ్వని పరిస్థితికి సంబంధాలు క్షీణించాయి. ప్రతిష్టాత్మక కాళేశ్వరం ప్రాజెక్టు ప్రారంభోత్సవానికి ప్రధానికి ఆహ్వానం పలకడానికి కేసీఆర్ ప్రయత్నించినా, ఆయన అపాయింట్ మెంట్ ఇవ్వకపోవడంతో ఆ ఆలోచన విరమించుకున్నారు. తెలంగాణలో బలోపేతం అయ్యే క్రమంలోనే కేసీఆర్ ను మోదీ దూరంగా ఉంచుతున్నారనే ఊహాగానాలు సాగుతున్నాయి.

ఈ నేపథ్యంలో ప్రస్తుతం ఆపరేషన్ తెలంగాణలో రెండో అంకానికి బీజేపీ తెరలేపింది. తొలుత టీఆర్ఎస్ ఆర్థిక మూలాలను దిగ్బంధం చేయాలని నిర్ణయించి, ఆ దిశగా పావులు కదుపుతోంది. ఇటీవల జరిగిన ఎన్నికల్లో విపక్ష పార్టీలకు డబ్బు చిక్కకుండా, లోపల ఉన్నదాన్ని బయటకు తీయకుండా చేయడంలో టీఆర్ఎస్ విజయవంతమైంది. ఇప్పుడు అదే ఫార్ములాను బీజేపీ అనుసరించనుంది. వచ్చే ఎన్నికల్లో టీఆర్ఎస్ కు ఆర్థికపరమైన అండ లేకుండా చేసేందుకు ప్రయత్నాలు మొదలుపెట్టింది.

అందులో భాగంగానే గురువారం అకస్మాత్తుగా మైహోం గ్రూప్ అధినేత రామేశ్వరరావు ఇళ్లు, కార్యాలయాల్లో ఐటీ అధికారులు సోదాలు జరిపినట్టు తెలుస్తోంది. కేసీఆర్ కు అత్యంత సన్నిహితుడైన రామేశ్వరరావుపై ఐటీ దాడులు జరగడంతో ఒక్కసారిగా కలకలం రేగింది. ఇది కచ్చితంగా కేసీఆర్ ను లక్ష్యంగా చేసుకున్న దాడులే అనే అభిప్రాయాలు గట్టిగా వినిపిస్తున్నాయి. తెలంగాణలో కేసీఆర్ ను అన్ని వైపుల నుంచీ దిగ్బంధనం చేసి తాను పాగా వేయాలన్నదే బీజేపీ ప్రణాళికగా కనిపిస్తోంది. ఈ పరిణామాలను కేసీఆర్ ఎలా ఎదుర్కొంటారో చూడాలి.