జస్ట్‌ ఆస్కింగ్‌: మాస్కులేసుకోకపోతే చంపేస్తారా.?

కరోనా వైరస్‌ నేపథ్యంలో మాస్కు ధరించడం ప్రతి ఒక్కరి బాధ్యత. ఒకరి నుంచి ఇంకొకరికి అత్యంత వేగంగా వ్యాప్తి చెందే అవకాశం వుంది గనుక.. మాస్కు ధరించాల్సిందే. ‘మాస్కు ధరించనివాడిని పశువుగా పరిగణించాలి..’ అని ఓ సినీ దర్శకుడు ఇటీవల ట్విట్టర్‌లో తన అభిప్రాయాన్ని పంచుకున్నాడు. అందులో నిజం లేకపోలేదు. అలాగని, మాస్కు ధరించకపోతే చంపేస్తారా.? పైగా, ఈ దారుణం ఓ పోలీసు అత్యుత్సాహం కారణంగా జరగడమా.?

ఆంధ్రప్రదేశ్‌లో గత కొద్ది రోజులుగా వివిధ ఘటనల్లో పోలీసుల అత్యుత్సాహం అభాసుపాలవుతోంది. న్యాయస్థానాల్లో మొట్టికాయలు ఎదురవుతున్నాయి. తూర్పుగోదావరి జిల్లాలో ఓ దళిత యువకుడికి గుండు కొట్టించేశారు పోలీసులు. ఈ ఘటనపై ముఖ్యమంత్రి స్పందించి, బాధ్యుల్ని సస్పెండ్‌ చేయాల్సి వచ్చింది. ఇక, తాజాగా మాస్కు పెట్టుకోలేదన్న కారణంగా ఓ యువకుడిపై ఓ పోలీస్‌ దాడి చేసిన ఘటన ప్రకాశం జిల్లాలో జరిగింది. ఈ ఘటనలో సదరు యువకుడు తీవ్రంగా గాయపడి, ఆసుపత్రి పాలయ్యాడు. పరిస్థితి విషమించి ప్రాణాలు కోల్పోయాడు.

మొన్నటికి మొన్న విశాఖలో డాక్టర్‌ సుధాకర్‌పై పోలీసులు దాడి చేసిన ఘటన పెను సంచలనం సృష్టించింది. న్యాయస్థానం మొట్టికాయలేయడమే కాదు, ఈ ఘటనపై విచారణను సీబీఐకి అప్పగించింది. ఎందుకిలా.? మరీ ముఖ్యంగా దళితులపై ‘కొందరు’ పోలీసుల అత్యుత్సాహం ఎందుకు కన్పిస్తోంది.? మాస్కు విషయానికే వద్దాం.! అధికార పార్టీకి చెందిన చాలామంది నేతలు మాస్కులు లేకుండా జనాల్లోకి వచ్చేస్తున్నారు. కనీసం, వైసీపీ నేతలెవరికైనా పోలీసులు జరీమానాలు విధించారా.?

అంతెందుకు, ముఖ్యమంత్రి వైఎస్‌ జగన్‌ సైతం మాస్క్‌ వేసుకోకుండా తిరుగుతుండడంపై విమర్శలు వెల్లువెత్తుతున్నాయి. ‘ముఖ్యమంత్రికి ఒక నీతి.. దళిత యువకుడికి ఇంకో నీతి.? ఇదేం ప్రజాస్వామ్యం.?’ అంటూ ప్రకాశం జిల్లాలో పోలీస్‌ దాష్టీకానికి బలైపోయిన యువకుడి కుటుంబ సభ్యులు వాపోతున్నారు. ‘మాస్క్‌ ధరించకపోతే దేశ ప్రధానికే జరీమానా విధించారు..’ అంటూ ఆ మధ్య ప్రధాని నరేంద్రమోడీ వ్యాఖ్యానించారు. మాస్కు ధరించాల్సిందే.. ప్రస్తుత పరిస్థితుల్లో. కానీ, ఇక్కడ పోలీసుల అత్యుత్సాహమే విమర్శలకు తావిస్తోంది. ఒకరికి ఒక నీతి, ఇంకొకరికి ఇంకో నీతి.. ఇది అస్సలేమాత్రం సమర్థనీయం కాదు.