జస్ట్‌ ఆస్కింగ్‌: 3 కాదు, ఏపీకి 5 రాజధానులు.?

తెలుగుదేశం పార్టీ హయాంలో ఆంధ్రప్రదేశ్‌కి రాజధానిగా అమరావతి ఎంపికైంది. చంద్రబాబు ‘ఒక్కటే’ రాజధాని అన్నారు కాబట్టి, వైఎస్‌ జగన్‌ మోహన్‌ రెడ్డి మూడు రాజధానుల అంశాన్ని తెరపైకి తీసుకొచ్చారు. ప్రభుత్వం మారిన ప్రతిసారీ రాజధాని మారిపోవడం అనేది దేశ చరిత్రలో ఎక్కడన్నా వుందా.? ఆ పైత్యం, ఒక్క ఆంధ్రప్రదేశ్‌కే దక్కింది. ఎందుకంటే, ఇక్కడి నీఛ, నికృష్ట రాజకీయాలు అలాంటివి.

ఈ దిక్కుమాలిన రాజకీయాల కారణంగానే.. పాత పేరుతో కొత్త రాష్ట్రంగా ఆంధ్రప్రదేశ్‌ 13 జిల్లాలతో ఏర్పడింది.. హైద్రాబాద్‌ని కోల్పోయింది. అయినా, ఆంధ్రప్రదేశ్‌ మీద ఏపీకి చెందిన రాజకీయ నాయకులకే ‘కసి’ ఇంకా చల్లారినట్లు లేదు. మూడు రాజధానుల పేరుతో రాష్ట్రాన్ని రావణకాష్టంగా మార్చేస్తోంది ప్రస్తుత అధికార వైఎస్సార్‌ కాంగ్రెస్‌ పార్టీ.

మూడు రాజధానులు కాదు.. మంత్రి పెద్దిరెడ్డి రామచంద్రారెడ్డి చెప్పినట్లు 30 రాజధానులైనా కట్టుకోవచ్చు. కానీ, ఐదేళ్ళకోసారి రాజధాని మారిపోతే ఎలా.? చంద్రబాబు హయాంలో ప్రకటితమైన రాజధాని అమరావతి స్థానంలో ఇప్పుడు మూడు రాజధానులొస్తున్నాయి. అందులో అమరావతి కూడా ఒకటి. అంటే, అదనంగా రెండు రాజధానులు రాబోతున్నాయన్నమాట. రేప్పొద్దున్న.. అంటే, 2020 ఎన్నికల తర్వాత ప్రభుత్వం మారితే ఐదు రాజధానులొస్తాయా.? అంతకు మించి.. ఏడు రాజధానుల చర్చ తెరపైకొస్తుందా.?

ఇప్పుడున్న జిల్లాల సంఖ్యని 25 చేస్తున్నారు గనుక.. ఏమో, పైత్యం పతాక స్థాయికి చేరి, కొత్త ప్రభుత్వం పదో పాతికో రాజధానుల్ని, వందో రెండొందలో జిల్లాల్నీ ప్రకటించినా ఆశ్చర్యపోనక్కర్లేదు. లోటు బడ్జెట్‌తో ఏర్పడ్డ రాష్ట్రం.. అనేక సమస్యలతో సతమతమవుతున్న రాష్ట్రం.. ఇంకా విభజన పంపకాలు తేలని రాష్ట్రంతో ఈ నికృష్ట రాజకీయ క్రీడ ఏంటో.. ఆంధ్రప్రదేశ్‌ ప్రజలకు దిక్కెవరో.!