Jr.Ntr Birthday Special: హీరోలకు మాస్ ఇమేజ్ ఓ వరం. ఫ్యాన్స్, బిజినెస్, ఫిల్మ్ మేకింగ్, క్రేజ్, ఇమేజ్, ప్రేక్షకాదరణ మొత్తం మారిపోతాయి. కొందరికి మాత్రమే దక్కే అంతటి ఇమేజ్ ను అనతికాలంలోనే ఒడిసిపట్టి.. టాలీవుడ్ కి సరికొత్త మాస్ హీరోగా అవతరించాడు జూనియర్ ఎన్టీఆర్. కామ్ గా కనిపించే ఎన్టీఆర్ లో అంతటి ఫైర్ ఉందని.. సరైన పాత్ర పడితే ఉగ్ర నరసింహ అవతారమే అని నిరూపించిన సినిమా ‘ఆది’. బాల నటుడిగా చేసిన రెండు సినిమాలు మినహాయిస్తే.. అప్పటికి హీరోగా చేసిన మూడు సినిమాల్లో స్టూడెంట్ నెంబర్ 1 హిట్. అయితే.. ఆదితో ప్రేక్షకులు, ఇండస్ట్రీ, ట్రేడ్ ఒక్కసారిగా ఎన్టీఆర్ వైపు చూశారు. ఎన్టీఆర్ లో అణు విస్ఫోటనం చూపిన సినిమాగా ఆది నిలిచిపోయింది. దీంతో ఎన్టీఆర్ ఒక స్టార్ హీరో అయిపోయాడు.
రాయలసీమ పవర్..
టాలీవుడ్ మాస్ డైరక్టర్ గా పేరు తెచ్చుకున్న వి.వి.వినాయక్ కు ఇదే మొదటి సినిమా. తనలో ఉన్న కసిని స్క్రీన్ ప్రెజెన్స్ ద్వారా ఎన్టీఆర్ లో చూపించాడు వినాయక్. అమ్మ తోడు.. అడ్డంగా నరికేస్తా, చిన్నప్పుడే బాంబులతో ఆడుకున్నా, తొడ కొట్టడం, మంచినీళ్లు తాగుతుంటే కళ్లలో నిప్పు.. వంటి సీన్లకు ధియేటర్లు మోత మోగిపోయాయి. మొత్తంగా సినిమా రాయలసీమ బ్యాక్ డ్రాప్ అయినా.. నిజంగా ఎన్టీఆరే రాయలసీమలో అడుగుపెట్టాడా.. అనేంతగా పరకాయ ప్రవేశం చేసి మెప్పించాడు. అప్పటికి 20ఏళ్లు కూడా నిండని కుర్రాడు తెరపై ఓ విధ్వంసమే సృష్టించడంతో కొత్తగా ఫ్యాన్స్, నందమూరి అభిమానుల్లో కొత్త ఉత్సాహం. దీంతో ఎన్టీఆర్ సినిమా బిజినెస్ లెక్కలు మారాయి. ఎన్టీఆర్ తో మాస్ సినిమాల కోసం దర్శక, నిర్మాతలు, రచయితలు ఆలోచించే స్థాయికి వెళ్లిపోయాడు.
పెరిగిన అంచనాలు..
ముందు సినిమాల్లో యాక్షన్ ఉన్నా ఎన్టీఆర్ లో ఉన్న ఫైర్ అని నిరూపించిన సినిమా మాత్రం ఆది. డ్యాన్సుల విషయంలో ఎన్టీఆర్ కు తిరుగులేకుండా పోయింది. మాస్ పాత్రల్లో అవలీలగా ఒదిగిపోవడం కామన్ అయిపోయింది. దీంతో ప్రేక్షకుల్లో ఎన్టీఆర్ పై అంచనాలు పెరిగిపోయాయి. ఎన్టీఆర్ మనవడిగా, నందమూరి వంశం మూడో తరం హీరోగా ప్రతిష్ఠ పెంచాడు. తర్వాత వచ్చిన అల్లరి రాముడుపై ఏర్పడిన భారీ అంచనాలు సినిమాకు కాస్త ప్రతికూలమైనా.. పంచెకట్టులో తెలుగు ప్రేక్షకుల్ని అలరించాడు. నాగ సినిమాలో యువత ప్రతినిధి పాత్రలో యూత్ ని ఆకట్టుకుని తనదైన ముద్ర వేశాడు ఎన్టీఆర్. దీంతో ఎన్టీఆర్ లో ఉన్న ఫైర్ ను ఎంతగా రగిలిస్తే అంత వెలుగు వస్తుందనేంతగా ఆయన తర్వాతి సినిమాలు వచ్చాయి.