Ram Pothineni Birthday special: సినీ పరిశ్రమలో బ్యాక్ గ్రౌండ్ ఉన్నా.. సినిమాల్లో నటించాలి.. నటనలో నిరూపించుకోవాలి.. ప్రేక్షకుల్ని మెప్పించాలి అనే ఆసక్తి చాలా ముఖ్యం. ఇవే మొదట అవకాశాలు వచ్చేలా చేస్తాయి.. తర్వాత అవకాశాలు వెతుక్కుంటూ వస్తాయి. అలా పరిశ్రమలో తనను తాను నిరూపించుకున్న హీరోల్లో రామ్ పోతినేని ఒకరు. నటన, డ్యాన్సుల్లో తనకంటూ ఓ స్పెషల్ ఐడెంటిటీ తెచ్చుకున్న హీరో. తొలి సినిమాతోనే బ్లాక్ బస్టర్ హిట్ దక్కించుకున్న రామ్ అటుపై తన టాలెంట్ నిరూపించే సినిమాలు చాలా చేశాడు. లవ్లీ క్యారెక్టర్, యూత్, మాస్, ఫ్యామిలీ ఇమేజ్, కామెడీ జోనర్లలో సినిమాలు చేసి.. వచ్చిన ప్రతి అవకాశాన్ని ఒడిసిపట్టి తన టాలెంట్ నిరూపించి ఎనర్జిటిక్ స్టార్ గా ప్రేక్షకుల మెప్పు పొంది కెరీర్లో సక్సెస్ సాధించాడు. నేడు రామ్ పోతినేని పుట్టినరోజు.
ల్యాండ్ మార్క్ మూవీ..
తొలి సినిమా దేవదాసు, తర్వాతి సినిమా జగడంలో కూడా మాస్ క్యారెక్టర్. ఈపాత్రల్లో ఎంతో రఫ్ గా కనిపించినా తర్వాత చేసిన రెడీ, మస్కా, రామరామ కృష్ణ, ఎందుకంటే.. ప్రేమంట వంటి సినిమాల్లో లవర్ బాయ్ గా కనిపించి మెప్పించాడు. రామ్ అంటే ఖచ్చితంగా గుర్తొచ్చేవి డ్యాన్సులు. వీటిలో నేటి జనరేషన్ ను ఆకట్టుకునేలా సక్సెస్ అయ్యాడు. పలు సినిమాల్లో పక్కింటి కుర్రాడులా కనిపించి ఫ్యామిలీ ఆడియన్స్ నూ ఆకట్టుకున్నాడు. కెరీర్ పరంగా రామ్ కు టర్నింగ్ పాయింట్ అంటే పూరి జగన్నాధ్ దర్శకత్వంలో వచ్చిన ఇస్మార్ట్ శంకర్. క్యారెక్టర్ ఓరియెంటెడ్ సినిమాలో రామ్ కనిపించిన మాస్ మేకోవర్, డ్యాన్సులు, మాస్ అప్పీయరెన్స్ యూత్ ని విపరీతంగా ఆకట్టుకున్నాయి. ట్రావెలింగ్ అంటే రామ్ ఒక్కోసారి ఎయిర్ పోర్టుకు వెళ్లాక వెకేషన్ డిస్టినేషన్ డిసైడ్ చేసుకున్న సందర్భాలు ఉన్నాయి.
డ్రెస్సింగ్, స్టయిలిష్ మేకోవర్..
డిఫరెంట్ మేకోవర్స్ లో కనిపిస్తూ స్టయిల్ పై తనకున్న ప్యాషన్ ని నిరూపిస్తూంటాడు. హ్యాండ్సమ్ లుక్స్, డ్రెస్సింగ్ పై ప్రత్యేక దృష్టి పెడతాడు రామ్. 2017లో మోస్ట్ డిజరబుల్ మ్యాన్ గా 2017లో 11వ స్థానంలో నిలవగా 2020లో రెండో స్థానంలో నిలిచాడు. ప్రస్తుతం బోయపాటి శ్రీను దర్శకత్వంలో చేస్తున్న సినిమాలో కూడా మాస్ పాత్రలో ఆకట్టుకోనున్నాడు. వరుస సక్సెస్ లు, మధ్యలో ఫెయిల్యూర్స్ వచ్చినా ఓ నటుడిగా ఎప్పుడూ ఫెయిల్ కాలేదు రామ్. ఇదే ఆయనకు వరుస అవకాశాలు వచ్చేలా చేస్తున్నాయి. RAPO గా ఫ్యాన్స్ పిలుచుకునే రామ్ మరిన్ని పుట్టినరోజులు జరుపుకోవాలని.. కెరీర్ పరంగా భవిష్యత్తులో మరిన్ని విజయాలు అందుకోవాలని కోరుకుంటూ బర్త్ డే విషెష్ చెప్తోంది ‘తెలుగు బులెటిన్’.