జేడీ జనసేనలో ఉన్నట్టా.. లేనట్టా?

జనసేన అధినేత పవన్ కల్యాణ్ మళ్లీ యాక్షన్ మోడ్ లోకి వచ్చేశారు. ఎన్నికల్లో పార్టీ ఓడిపోయినా, తాను కూడా పోటీచేసిన రెండు చోట్లా ఓటమి చవిచూసినా రాజకీయాల్లోనే కొనసాగాలని నిర్ణయించుకున్న ఆయన.. తాజాగా పార్టీకి కీలకమైన కమిటీలు కూడా వేశారు. వరుసగా సమీక్షలు నిర్వహించనున్నట్టు ప్రకటించారు. ఇంతవరకు బాగానే ఉంది. అయితే, జనసేన ప్రకటించిన కమిటీల్లో ఓ కీలకమైన పేరు కనిపించలేదు. సీబీఐ మాజీ జేడీ వీవీ లక్ష్మీనారాయణను ఏ కమిటీలోకీ తీసుకోలేదు. దీంతో అసలు జేడీ పార్టీలో ఉన్నారా లేరా అనే అంశంపై చర్చ జరుగుతోంది.

జనసేనలో ఉన్న ప్రముఖుల్లో జేడీ కీలకమైన వ్యక్తే. కానీ పవన్ ఆయన్ను ఎందుకు పరిగణనలోకి తీసుకోలేదో ఎవరికీ అంతుబట్టడంలేదు. వాస్తవానికి ఎన్నికల ముందు లక్ష్మీనారాయణ తెలుగుదేశం పార్టీలో చేరతారనే ప్రచారం జరిగింది. కానీ అనూహ్య పరిణామాల నేపథ్యంలో ఓ రాత్రివేళ ఆయన అకస్మాత్తుగా జనసేన తీర్థం పుచ్చుకున్నారు. చాలా సాదాసీదాగా ఈ కార్యక్రమం జరిగింది. అనంతరం విశాఖపట్నం ఎంపీ స్థానం నుంచి బరిలోకి దిగారు. విద్యావంతులు అధికంగా ఉన్నందున అక్కడి నుంచి పోటీ చేశారు. బాండ్ పేపర్ పై ఎన్నికల మేనిఫెస్టో ప్రకటించి ఆసక్తి రేకెత్తించారు. అయితే, వైఎస్సార్ సీపీ ప్రభంజనంలో ఓటమి చవిచూశారు. అప్పటినుంచి పెద్దగా బయటకు కనిపించలేదు.

దీంతో ఇక ఆయన పార్టీకి దూరమైనట్టే అనే ప్రచారం సాగింది. పైగా ఎన్నికల అనంతరం పవన్ నిర్వహించిన కార్యక్రమాలకు కూడా జేడీ దూరంగానే ఉన్నారు. తాజాగా పవన్ ప్రకటించిన కమిటీల్లో సైతం లక్ష్మీనారాయణ పేరు లేకపోవడంతో ఆయన ఇక పార్టీకి దూరమైనట్టే అనే అభిప్రాయాలు వ్యక్తమవుతున్నాయి. ఎన్నికల ముందు పవన్ ను, ఆయన సిద్ధాంతాలను విపరీతంగా ప్రశంసించిన సీబీఐ మాజీ జేడీ.. తాజాగా పవన్ వైఖరి పట్ల అసంతృప్తితో ఉన్నట్టు సమాచారం.

ఎన్నికల తర్వాత పవన్ యాక్టివ్ పాలిటిక్స్ పై పెద్దగా దృష్టి పెట్టకపోవడం సరికాదని అభిప్రాయపడినట్టు తెలిసింది. రాజకీయాల్లో నిత్యం ఏదో ఒక కార్యక్రమంతో ప్రజల్లో ఉండాలని, కానీ జనసేన ఇప్పటివరకు ఎలాంటి కార్యక్రమమూ చేపట్టకపోవడం కచ్చితంగా పార్టీకి నష్టం కలిగించే చర్య అని ఆయన భావిస్తున్నట్టు తెలుస్తోంది. మరోవైపు బీజేపీ నుంచి ఆయనకు ఆహ్వానం కూడా ఉందని, ఈ నేపథ్యంలో కాషాయ పార్టీలోకి వెళ్లే అవకాశాలు పుష్కలంగా ఉన్నాయని పలువురు అభిప్రాయపడుతున్నారు. ఈ విషయంలో ఆయన వేచి చూసే ధోరణి అవలంబిస్తున్నారని అంటున్నారు.