ప్చ్.! వైఎస్ జగన్ మళ్ళీ నవ్వులపాలవుతున్నారే.!

‘ఈ రాష్ట్రం కాకపోతే మరో రాష్ట్రమని, ఈ పార్టీ కాకపోతే మరో పార్టీ అనీ చంద్రబాబులా, చంద్రబాబు దత్త పుత్రుడు మాదిరిగా ఈ భార్య కాకపోతే మరో భార్య అని తాను అనననీ, ఇదే నా రాష్ట్రం, ఇక్కడే నా నివాసం, ఇక్కడే నా మమకారం, ఇక్కడి ఐదు కోట్ల ప్రజలే నా కుటుంబం, ఇక్కడే నా రాజకీయం, ఇక్కడి ప్రజల ఇంటింటి సంతోషమే నా విధానం..’ అని గట్టిగా నినదించేశారట ఆంధ్రప్రదేశ్ ముఖ్యమంత్రి, యువజన శ్రామిక రైతు కాంగ్రెస్ పార్టీ అధినేత వైఎస్ జగన్ మోహన్ రెడ్డి.!

అరరె, కాంగ్రెస్ పార్టీని కాదని కదా.. సొంత కుంపటి వైఎస్సార్ కాంగ్రెస్ పార్టీని వైఎస్ జగన్ మోహన్ రెడ్డి పెట్టుకున్నది. ఆ లెక్కన, వైఎస్ జగన్ కూడా పార్టీ మారినట్లే అవుతుంది కదా.! ‘ఆ పార్టీని కాదని ఈ పార్టీ..’ అని వైఎస్ జగన్, తనను తానే విమర్శించుకుని, తూలనాడుకున్నట్టుంది వ్యవహారం.

ఇక, ‘ఈ భార్య కాకపోతే మరో భార్య’ అన్న విమర్శ, దత్త పుత్రుడి పేరుతో వైఎస్ జగన్ మోహన్ రెడ్డి చేశారు గనుక, ఆ దత్త పుత్రుడు వైసీపీ దృష్టిలో ఎవరన్నది అందరికీ తెలుసు. అది పవన్ కళ్యాణ్ మీద పనిగట్టుకుని వైసీపీ చేసే పసలేని విమర్శ.

వైఎస్ జగన్ మోహన్ రెడ్డి సోదరి వైఎస్ షర్మిల వ్యక్తిగత జీవితం గురించి మాట్లాడితే బావుండదు.. అని పలు సందర్భాల్లో వైసీపీ నేతలు చెప్పుకొచ్చారు. ఆపాటి విజ్ఞత వైసీపీ అధినేతకు లేకుండా పోయింది. ‘మీ ఇంట్లో ఆడవాళ్ళని నేను అవమానించను..’ అని పదే పదే జనసేన అధినేత పవన్ కళ్యాణ్ చెబుతూనే వున్నారు. కానీ, వైఎస్ జగన్ మాత్రం, పవన్ కళ్యాణ్ ఇంట్లోని ఆడవాళ్ళ గురించి ప్రస్తావిస్తుంటారు.

ఉమ్మడి తెలుగు రాష్ట్రం రెండుగా విడిపోయాక, కొన్నాళ్ళు తెలంగాణలో వైఎస్సార్సీపీని కొనసాగించి, ఆ తర్వాత అక్కడ దుకాణం సర్దేసి, తెలంగాణలో చెల్లెలు షర్మిలతో వైఎస్సార్ తెలంగాణ పార్టీని పెట్టించిన వైఎస్ జగన్ మోహన్ రెడ్డి, ‘అక్కడ మకాం.. ఇక్కడ మకాం’ అంటూ వ్యాఖ్యానించడం హాస్యాస్పదం కాక మరేమిటి.?

అయినా, ముఖ్యమంత్రి హోదాలో బహిరంగ సభల్లో మాట్లాడేటప్పుడు, చూసి చదవడమేంటబ్బా.? అది చాలదన్నట్టు, ఇతరుల భార్యల గురించి మాట్లాడటం వల్ల ప్రజలకేంటి ప్రయోజనం. అన్న కనీస ఇంగితాన్ని కూడా స్క్రిప్టు రాసేవాళ్ళు పాటించడంలేదు.. అది చదివే ముఖ్యమంత్రికీ ఆ విజ్ఞత వుండటంలేదు.

గతంలో జనసేన అధినేత చెప్పు చూపించి మరీ హెచ్చరించారు, వ్యక్తిగత జీవితం గురించి మాట్లాడొద్దని. కానీ, వైఎస్ జగన్ పదే పదే అదే ప్రస్తావన ఎందుకు చేస్తున్నట్టు.? జనంలో నవ్వులపాలవడం తప్ప, వైఎస్ జగన్ మోహన్ రెడ్డికి ఈ వ్యాఖ్యల వల్ల ఒనగూడే రాజకీయ ప్రయోజనమేముంటుంది.!