ధమాకా రివ్యూ – రొటీన్ ఎంటర్టైనర్

మాస్ మహారాజా రవితేజ నుండి ఈ ఏడాది వస్తోన్న మూడో చిత్రం ధమాకా. ఈ సినిమాతో హిట్ కొట్టి ఈ ఏడాదికి సరైన ముగింపు పలకాలని ఆకాంక్షించాడు రవితేజ. మరి తన కోరిక ధమాకాతో తీరిందో లేదో చూద్దాం.

కథ:

ఆనంద్ చక్రవర్తి (రవితేజ) బాగా డబ్బున్న కుటుంబానికి చెందిన వ్యక్తి. తన తండ్రి పీపుల్ మార్ట్ అనే కార్పొరేట్ వ్యవస్థను నడుపుతుంటాడు. అయితే కార్పొరేట్ ప్రపంచంలో వచ్చే సమస్యలే ఇక్కడా వస్తాయి. కొంత మంది చెడ్డ వ్యక్తుల నుండి కంపెనీను కాపాడాల్సిన పరిస్థితి వస్తుంది. మరోవైపు స్వామి (రవితేజ) ఒక మిడిల్ క్లాస్ వ్యక్తి కూడా కనిపిస్తాడు. ఈ ట్విన్స్ కు, ఆ కార్పొరేట్ ప్రపంచానికి ఉన్న సంబంధం ఏంటి? చివరికి ఏం జరిగింది అన్నది చిత్ర కథ.

నటీనటులు:

రవితేజ నుండి వస్తోన్న ప్రధాన కంప్లైంట్. ఈ మధ్య సినిమాల్లో ఎనర్జిటిక్ గా కనిపించట్లేదని. ఆ కంప్లైంట్ ను ఈ సినిమాతో తుడిచేసాడు రవితేజ. రెండు రోల్స్ లో కూడా షార్ప్ గా కనిపించాడు. ఈ రొటీన్ చిత్రాన్ని ఆ మాత్రమైనా చూసాం అంటే అది రవితేజ ప్రత్యేకత అని చెప్పాలి.

శ్రీలీలకు చాలా లిమిటెడ్ రోల్ దక్కింది. అయితే ఉన్నంతలో ఆమె మెప్పించింది. మాస్ సాంగ్స్ లో శ్రీలీల హ్యుజ్ ప్లస్ అయింది. సచిన్ కెద్కర్, రావు రమేష్, జయరాం, ఇంకా భారీ తారాగణమే ఈ చిత్రంలో కనిపించింది. అందరూ కూడా సినిమాకు కావాల్సింది చేసారు. ఇంకా మిగతా పాత్రలకు కూడా తెల్సిన ముఖాలనే ఎంచుకున్నారు.

సాంకేతిక నిపుణులు:

కథ, స్క్రీన్ ప్లే పరంగా బెజవాడ ప్రసన్న కుమార్ కొత్తగా చూపించింది ఏం లేదు. అరగదీసేసిన ఫార్ములానే మళ్ళీ ఎత్తుకున్నాడు. అయితే రొటీన్ అయినా స్క్రీన్ ప్లే ఫుల్ పేస్ తో ఉండేలా చూసుకున్నాడు. దానికి తోడు ఎనర్జిటిక్ గా ఉండే రవితేజ ఉండనే ఉన్నాడు. కాబట్టి రొటీన్ అన్న కంప్లైంట్ ఉన్నా పాస్ మార్కులు పడిపోతాయి. అయితే డ్యూయల్ రోల్ కు సంబంధించి కొన్ని అంశాలు లాజిక్ కు అందవు. అలాగే క్లైమాక్స్ బాగా వీక్ గా ఉంది. ఇక దర్శకుడు త్రినాథరావు నక్కిన తనకున్న వనరులతో డీసెంట్ కమర్షియల్ చిత్రాన్ని అందించే ప్రయత్నం చేసాడు.

భీమ్స్ పాటలు, బ్యాక్ గ్రౌండ్ స్కోర్ మెప్పిస్తుంది. జింతాక్, కండక్టర్ సాంగ్ రెండూ కూడా బాగా తెరకెక్కించారు. ఎడిటింగ్ బాగానే ఉంది. నిర్మాణ విలువలు చాలా బాగా కుదిరాయి. కార్తీక్ ఘట్టమనేని కెమెరా పనితనానికి వంక పెట్టలేం.

ప్లస్ పాయింట్స్;

• రవితేజ మార్క్
• పాటలు, వాటి చిత్రీకరణ

మైనస్ పాయింట్స్:

• రొటీన్ ట్రీట్మెంట్
• లాజిక్స్ కు అందని సన్నివేశాలు
• క్లైమాక్స్

విశ్లేషణ:

ధమాకా ఒక పక్కా కమర్షియల్ సినిమా. రొటీన్ అన్నది ఫస్ట్ సీన్ నుండి కనిపిస్తూనే ఉంది. అయితే ఎంటర్టైన్మెంట్, మాస్ సీన్స్ ఉండనే ఉన్నాయి. మొత్తానికి ధమాకా రవితేజ మార్క్ ఉన్న మాస్ రొటీన్ ఎంటర్టైనర్

తెలుగుబులెటిన్ రేటింగ్: 2.75/5