వైసీపీలో అంతర్గత వర్గపోరు: పతనం మొదలైనట్లేనా.?

ఉత్తరాంధ్ర వైసీపీలో కలకలం.. ఉభయ గోదావరి జిల్లాల్లో వైసీపీకి మూడినట్లే.. రాయలసీమ వైసీపీలో ప్రకంపనలో.. కృష్ణా, గుంటూరు జిల్లాల్లోనూ, నెల్లూరు అలాగే ప్రకాశం జిల్లాల్లోనూ వైసీపీ ప్రజా ప్రతినిథులపై పార్టీ క్యాడర్‌లో పెరుగుతున్న అసహనం.. ఇలా మీడియాలో నిత్యం వార్తలు గుప్పుమంటున్నాయి.

అధికారంలో వున్న పార్టీపై ఇలాంటి కథనాలు సర్వసాధారణమే. గోరంతలు కొండంతలుగా చూబడటం అనేది మీడియాలో ఇటీవలి కాలంలో అలవాటైన వ్యవహారంగా మారింది. పైగా, తెలుగు మీడియాలో చాలావరకు పార్టీల వారీగా విడిపోయిన దరిమిలా, ఈ తరహా ప్రచారంలో వింతేమీ లేదు.

కానీ, కింది స్థాయి పరిస్థితులు కూడా అలాగే వుంటే.? అది అదికార పార్టీకి కనిపించకపోతే.? ‘జగన్ ముద్దు.. వైసీపీ ఎమ్మెల్యేలు, ఎంపీలు వద్దు..’ అని వైసీపీ జెండాలు పట్టుకుని వైసీపీ నేతలు, కార్యకర్తలే ఆందోళనలు చేస్తే.? ఖచ్చితంగా ఆలోచించాల్సిన విషయమే ఇది.

పార్టీలో జరుగుతున్న పరిణామాల పట్ల కలత చెందుతూ ఓ కింది స్థాయి నేత ఓ కార్యక్రమంలో ఆవేదన వ్యక్తం చేస్తే, ‘మాఫియా’ తరహాలో, ఆ వైసీపీ నేత మీద సాటి వైసీపీ నేతలు దాడి చేసిన వైనం.. ఇటీవల చూశాం. సాధారణంగా బాధితుడి మీద కేసులు పెట్టే పోలీసులు, ఈసారెందుకో బాధ్యులపై కేసు పెట్టి ‘మమ’ అనిపించేశారు.

ఓ మంత్రిగారి మీదనే ఈ వ్యవహారంలో ఆరోపణలు రావడం, వీడియో లీక్ అవడంతో.. విషయాన్ని అలా పక్కదారి పట్టించారన్న వాదనలూ లేకపోలేదు. రాష్ట్రంలో పలు చోట్ల వైసీపీ కార్యకర్తలు, కింది స్థాయి నేతలు తమ ప్రజా ప్రతినిథులకు వ్యతిరేకంగా ఆందోళనలు చేసే పరిస్థితి రావడం ఆశ్చర్యకరమే.

‘ఇది వైసీపీ పతనానికి నాంది..’ అన్న చర్చ రాజకీయ వర్గాల్లో జరుగుతోంది. ‘అబ్బే, అదంతా ఉత్తదే. కొందరు పెయిడ్ ఆర్టిస్టులు చేసే ఆందోళనల్ని పట్టించుకోవాల్సిన అవసరం లేదు.’ అంటూ తమకు అలవాటైన భాషలో బుకాయిస్తున్నారు కొందరు వైసీపీ నేతలు. ‘చెద’ పట్టేసింది.. పైకి కాస్త తక్కువే కనిపిస్తోంది ఆ ఇంపాక్ట్. తేరుకోకపోతే, పార్టీ పూర్తిగా భ్రష్టుపట్టిపోవడం, ప్రభుత్వం గల్లంతవడం ఖాయమే.