మెగా ట్విస్ట్: పవన్ కళ్యాణ్‌కి మద్దతిచ్చిన చిరంజీవి.!

‘మా ఇద్దరి దారులు వేరు.. మేమిద్దరం రైలు పట్టాల్లాంటివాళ్ళం.. మా ప్రయాణం సమాంతరంగా సాగుతుంటుంది.. గమ్యం ఒకటే, కానీ దారులు వేరు.. రెండు రైలు పట్టాలు కలవడం కష్టం కదా.. అలాగే, మా ఆలోచనలు కూడా..’ అంటూ పలు సందర్భాల్లో మెగాస్టార్ చిరంజీవి, తన సోదరుడు పవన్ కళ్యాణ్ విషయమై ఆసక్తికరమైన వ్యాఖ్యలు చేశారు, చేస్తూనే వున్నారు.

‘అదిగో చిరంజీవి, పవన్ కళ్యాణ్ మధ్య గొడవలు.. ఇద్దరూ దూరం దూరంగా వుంటున్నారు..’ అంటూ మీడియాలో ఎప్పటికప్పుడు పుకార్లు షికార్లు చేస్తూనే వుంటాయి. ఏదన్నా విషయమ్మీద చిరంజీవి వాదన ఒకలా, పవన్ కళ్యాణ్ వాదన ఇంకోలా అనిపిస్తే చాలు, తెలుగు మీడియా గోరంతని కొండంతగా మార్చేసి, ప్రజల్ని ఏమార్చేసేలా కథనాల్ని తెరపైకి తెస్తుంటుంది.

అదే సమయంలో, ఇటు మెగాస్టార్ చిరంజీవి.. అటు పవన్ కళ్యాణ్.. ఇద్దరూ సమయం వచ్చినప్పుడు ఆయా గాలి వార్తలకీ, గలీజు విశ్లేషణలకీ తమ చేతలతో చెక్ పెడుతుంటారు. ‘మా’ ఎన్నికల వేళ జరిగిన రాద్ధాంతం అందరికీ గుర్తుండే వుంటుంది. చిరంజీవి ఏదన్నా విషయమ్మీద మాట్లాడాలనుకుంటే, కాస్త ఆచి తూచి వ్యవహరిస్తారు. ఈ క్రమంలో మీడియా తప్పుడు రాతలకి ఆస్కారం ఎక్కువ దొరుకుతుంటుంది.

పవన్ విషయానికొస్తే, విషయం ఏదైనా కుండబద్దలుగొట్టేయడం ఆయనకు అలవాటు. తన తమ్ముడి వ్యవహారశైలి గురించి తాజాగా చిరంజీవి స్పష్టమైన విశ్లేషణ చేసేశారు.. గాలి వార్తలకి స్పష్టంగా చెక్ పెట్టేశారు. ‘పవన్ కళ్యాణ్ ఏం మాట్లాడినా అందులో నిజాయితీ వుంటుంది. న్యాయం తరఫున పవన్ నిలబడతాడు..’ అంటూ తన సోదరుడి గురించి చిరంజీవి చేసిన తాజా వ్యాఖ్యలు ఇటు సినీ వర్గాల్లోనూ, అటు రాజకీయాల్లోనూ చాలామందికి షాక్ ఇచ్చాయి.

చిరంజీవి – పవన్ కళ్యాణ్ మధ్య చిచ్చుపెట్టేందుకు ప్రయత్నించిన, ప్రయత్నిస్తూనే వున్న చాలామందికి.. రాజకీయ నాయకులకీ, వారి మద్దతుదారులకీ, అలాగే బులుగు మరియు పచ్చ మీడియాకి.. చిరంజీవి ఇచ్చిన వివరణతో మైండ్ బ్లాంక్ అయిపోయినట్టుంది.