టీమిండియాకు కాషాయం కలిసి రాలేదా?

ప్రపంచకప్ క్రికెట్ టోర్నీలో భారత జైత్రయాత్రకు బ్రేక్ పడింది. వరుస విజయాలతో అప్రతిహాతంగా దూసుకుపోతున్న టీమిండియా తొలి ఓటమి చవిచూసింది. ఆదివారం ఇంగ్లండ్ తో జరిగిన మ్యాచ్ లో 31 పరుగుల తేడాతో పరాజయం పాలైంది. ఈ మ్యాచ్ కోసం కొత్త జెర్సీలో బరిలోకి దిగిన భారత జట్టుకు ఆ రంగు కలిసి రాలేదనే చర్చ జరుగుతోంది. మెన్ ఇన్ బ్లూకి ఈ కాషాయ రంగు అస్సలు కలిసి రాలేదంటూ కొందరు కొత్త భాష్యం చెబుతున్నారు.

భారత్ తోపాటు ఇంగ్లండ్ జట్టుది కూడా నీలం రంగు జెర్సీ కావడంతో ఒక జట్టు జెర్సీ మార్చాలని ఐసీసీ నిర్ణయించింది. ఇంగ్లండ్ ఆతిథ్య జట్టు కాబట్టి వారి జెర్సీని అలాగే ఉంచి టీమిండియా జెర్సీ మార్చుకోవాలని సూచించింది. దీంతో మెన్ ఇన్ బ్లూ కాస్తా మెన్ ఇన్ కాషాయంగా మారి ఈ మ్యాచ్ లో బరిలోకి దిగారు. అంతకుముందు ఈ జెర్సీపై రాజకీయంగా పెద్ద దుమారమే రేగింది. ప్రధాని మోదీ దేశం మొత్తాన్ని కాషాయీకరణ చేస్తున్నారని, చివరకు భారత క్రికెట్ జట్టు జెర్సీ రంగు కూడా కాషాయంగా మార్చేశారని సమాజ్ వాదీ పార్టీ, కాంగ్రెస్ పార్టీ నేతలు విమర్శలు గుప్పించారు.

జెర్సీకి ఈ రంగు నిర్ణయించడం వెనుక బీజేపీ ఉందని ఆరోపణలు చేశారు. వీటిని బీజేపీ తిప్పికొట్టినప్పటికీ, ఈ మ్యాచ్ లో భారత జట్టు ఓడిపోవడంతో కాషాయ కలర్ పై కొత్త అనుమానాలు తలెత్తాయి. జెర్సీ రంగు మారడంతో టీమిండియా రాత కూడా మారిపోయిందంటూ సోషల్ మీడియాలో జోరుగా కామెంట్లు వస్తున్నాయి. ఎప్పటిలాగే పాత జెర్సీతో ఆడి ఉంటే, గెలుపు మనదేనని.. జెర్సీ మార్చడంతో ఓటమి చవిచూడాల్సి వచ్చిందంటూ పలువురు క్రీడాభిమానులు వాపోతున్నారు.

వాస్తవానికి ఇలాంటి సెంటిమెంట్లు క్రీడాకారులకు కొత్త కాదు. తమకు ఫలానా నెంబర్ జెర్సీ అయితేనే లక్కీ అని నమ్మేవారు ఎందరో ఉన్నారు. ఆటలో రాణించడానికి ప్రతిభతోపాటు అదృష్టం కూడా కలిసి రావాలని నమ్ముతూ ఉంటారు. ఇదే వరల్డ్ కప్ లో ఈ జెర్సీ సెంటిమెంట్ ను శ్రీలంక కూడా విశ్వసించింది. టోర్నీ ఆరంభంలో ఓటములు, మ్యాచ్ రద్దులతో తీవ్రంగా నష్టపోయిన శ్రీలంక.. ఇంగ్లండ్ తో మ్యాచ్ కోసం పసుపు రంగు జెర్సీతో బరిలోకి దిగి విజయం సాధించింది.

దీంతో ఆ జెర్సీ తమకు లక్కీ అని భావించి, తదుపరి మ్యాచ్ లలో కూడా అదే జెర్సీతో ఆడేందుకు ఐసీసీని అనుమతి కోరింది. అయితే, తదుపరి మ్యాచ్ లో దక్షిణాఫ్రికా చేతిలో ఓడిపోవడం గమనార్హం. ఆటలో గెలుపోటములు సహజమే అయినప్పటికీ, ఇలాంటి నమ్మకాలు మాత్రం విచిత్రంగా అనిపిస్తాయి.