అబ్జర్వేషన్‌: రివర్స్‌ టెండరింగ్‌తో ‘మిగులు’ నిజమెంత.?

ఏదన్నా ఓ ప్రాజెక్టు నిర్మాణం జరగాలంటే.. చాలా వ్యవహారాలుంటాయి. కాంట్రాక్టులు, సబ్‌ కాంట్రాక్టులు.. చాలా పెద్ద కథే నడుస్తుంటుంది. అధికార పార్టీకి అనుకూలంగా వుండే సంస్థలకే ప్రాజెక్టుల కాంట్రాక్టులు దక్కుతాయన్నది ఓపెన్‌ సీక్రెట్‌. ఓ ప్రభుత్వ హయాంలో ఓ ప్రాజెక్టు ప్రారంభమైతే, ఇంకో ప్రభుత్వం అధికారంలోకి రాగానే ‘కాంట్రాక్టర్‌’ని మార్చేసేందుకు ప్రయత్నాలు జరగడం సర్వసాధారణం. దీనికి ‘రివర్స్‌ టెండరింగ్‌’ అనే ముసుగు తొడిగింది వైఎస్సార్‌ కాంగ్రెస్‌ ప్రభుత్వం.

ఆ రివర్స్‌ టెండరింగ్‌ ప్రక్రియను సమర్థించుకోవడం కోసం తనకు నచ్చిన కాంట్రాక్టు సంస్థతో ‘తక్కువ’కు కోట్‌ చేయిస్తున్నారన్నదీ కాదనలేని వాస్తవం. పెద్ద పెద్ద కాంట్రాక్టులన్నీ మేఘా సంస్థకే ఎలా దక్కుతున్నాయి.? అన్నది మిలియన్‌ డాలర్ల ప్రశ్న ఏమీ కాదు. ఆ సంస్థకు ప్రాజెక్టులన్నీ కట్టబెట్టాలన్న చిత్తశుద్ధితో ఆంధ్రప్రదేశ్‌లోని వైఎస్‌ జగన్‌ ప్రభుత్వం వుండడంతో అన్నీ సహజంగానే అనుకున్నట్లు జరుగుతున్నాయన్నమాట.

సరే, ఇంతకీ రివర్స్‌ టెండరింగ్‌తో ‘మిగులు’ నిజమేనా.? అంటే, నేతి బీరకాయలో నెయ్యి వుండడం ఎంత వాస్తవమో.. ప్రాజెక్టుల కారణంగా ప్రభుత్వాలకు ఖర్చు తగ్గడం కూడా అంతే వాస్తవం. ‘దాదాపు వెయ్యి కోట్లు మిగిల్చేశాం..’ అని చెప్పుకుంటోంది ఆంధ్రప్రదేశ్‌లోని వైఎస్‌ జగన్‌ సర్కార్‌, రివర్స్‌ టెండరింగ్‌ పేరుతో. ప్రాజెక్ట్‌ పూర్తయితే తప్ప ‘మిగులు’ అన్న మాట గురించి మాట్లాడుకోలేం. కానీ, వైఎస్‌ జగన్‌ సర్కార్‌ ‘మిగిల్చేశాం..’ అంటూ డప్పు కొట్టుకుంటోంది.

వర్షాలు, వరదల పేరు చెప్పి పోలవరం ప్రాజెక్టు పనుల్ని నాలుగు నెలలుగా నిలిపేసిన వైఎస్‌ జగన్‌ సర్కార్‌, ఆ ప్రాజెక్టుకి సంబంధించిన పనుల్ని తనకు నచ్చిన సంస్థలకు అప్పగిస్తూ.. మిగిల్చేశామని ప్రకటించుకుంటున్న సంగతి తెల్సిందే. ప్రాజెక్టుల ఆలస్యం అత్యంత ఖరీదైన వ్యవహారం. వందల కోట్లతో పూర్తయిపోయే ప్రాజెక్టులు ఆలస్యం కారణంగా, వేల కోట్లతో కూడా పూర్తయ్యే పరిస్థితి వుండదు. పోలవరం ప్రాజెక్టు ఇందుకు స్పష్టమైన నిదర్శనం.

పది పదిహేనేళ్ళ క్రితం అంచనాలకీ, ఇప్పటి అంచనాలకీ తేడా ఓ రేంజ్‌లో వుంది. ఆ లెక్కన, ఈ నాలుగు నెలల ఆలస్యం.. ఖచ్చితంగా ప్రాజెక్టుపై తీవ్ర ప్రభావం చూపతుంది. మరి, మిగలడం.. అనే మాటలో అర్థమేముంది.? జనాన్ని మభ్యపెట్టేందుకే మిగల్చేశాం.. అని చెబితున్నారుగానీ, జనం అంత అమాయకులు కానే కారు.