టిబి స్పెషల్: మీడియా మొఘల్ కి ఇది భావ్యమేనా?

సైన్యం బాగుంటేనే రాజు బాగుంటాడు. తన బాగు కోసం సైన్యాన్ని బలిపెడితే ఆ రాజ్యానికి ఇబ్బందులు తప్పవు. ఇది ఎక్కడైనా వర్తిస్తుంది. పత్రికా రంగంలో నెంబర్ వన్ పొజిషన్ లో ఉన్న ఈనాడు లో ప్రస్తుతం ఇదే జరుగుతోందనే వ్యాఖ్యలు వినిపిస్తున్నాయ్. నాలుగు దశాబ్దాలుగా మకుటం లేని మహారాజుగా వెలుగొందుతున్న ఈనాడు సామ్రాజ్యం కరోనా కారణంగా మూడు నెలలకే విలవిలాడుతోందా అనే సందేహాలు వ్యక్తమవుతున్నాయి. కరోనా సెగ తగిలిన నెలకే ఇతర చిన్న పత్రికల తరహాలోనే ఈనాడు కూడా వ్యవహరించడం మీడియా సర్కిళ్లలో ఆశ్చర్యానికి తావిచ్చింది. ఒక్క నెలకే విలవిలాడే పరిస్థితి ఈనాడుకు వచ్చిందా అనే సందేహాలు ఉత్పన్నమయ్యాయి.

నిజానికి ఈనాడులో ఉద్యోగమంటే అదో బ్రాండ్ అనే తరహాలో ఉండేది. ప్రతినెలా ప్రభుత్వ ఉద్యోగుల కంటే ఒక రోజు ముందుగానే సంస్థ ఉద్యోగులకు వేతనాలు వచ్చేవి. అయితే, సాక్షి రాకకు ముందు ఈనాడులో జీతాలు తక్కువగానే ఉండేవి. సాక్షి రాకతో పలువురు ఉద్యోగులు అటువైపు వెళ్లిపోతుండటంతో తప్పనిసరి పరిస్థితుల్లో దాదాపు 25 శాతం మేర వేతనాలు పెంచారు. దీంతో అప్పడు అధిక జీతాల కోసం సాక్షికి వెళ్లినవారికి, సాక్షి కారణంగా జీతాలు పెంచడంతో ఈనాడులో ఉన్నవారికి మంచిరోజులు వచ్చినట్టే అని పాత్రికేయులు సంబరపడ్డారు. తదనంతర కాలంలో వేజ్ బోర్డు సిఫార్సులను కూడా ఈనాడు అమలు చేయాల్సి రావడంతో వేతనాలు మరికొంత పెరిగాయి. అయితే, ఇందుకోసం ఖైరతాబాద్ లో ఉన్న ఈనాడు ఎడిటోరియల్ సిబ్బందిని రామోజీ ఫిల్మ్ సిటీకి మార్చింది. తద్వారా వేజ్ బోర్డు సిఫార్సుల భారం కొంతైనా తగ్గించుకోవచ్చని అలా చేసింది.

ఇది ఇలా ఉంచితే.. కరోనా వేళ సిబ్బందికి లేఆఫ్ ప్రకటించడం మాత్రం మీడియా మొఘల్ గా పేరు పొందిన రామోజీరావుకు ఏమాత్రం భావ్యం కాదనే భావన వ్యక్తమవుతోంది. సంస్థ కోసం కష్టపడి పనిచేస్తున్న తన సైనికులను ఇలాంటి కష్టకాలంలో ఇబ్బంది పెట్టడం ఎంతవరకు సమంజసమని పలువురు ప్రశ్నిస్తున్నారు. మొన్నటివరకు ప్రతినెలా 30 లేదా 31నే వేతనాలు ఇచ్చే ఈనాడు.. తాజాగా 8వ తేదీన జీతాలను సిబ్బంది ఖాతాల్లో జమ చేస్తోంది. అది కూడా ఒక్కొక్కరికీ ఒక్కోలా కోత కోస్తోంది. సంస్థలో సిబ్బంది అవసరం ఎంత మేరకో లెక్కగట్టి అన్ని రోజులు మాత్రమే కార్యాలయానికి రావాలని నిర్దేశిస్తోంది. అలా వచ్చిన రోజులకు పూర్తి వేతనం.. లేఆఫ్ లో ఉన్నరోజులకు బేసిక్, డీఏలో కొంత మొత్తాన్ని మాత్రమే ఇస్తోంది. రూ.50వేల వేతనం పొందుతున్న ఉద్యోగికి నెలలో 5 రోజుల లేఆఫ్ ఇస్తే.. అతడికి దాదాపు రూ.5వేలు కోత పడుతోంది. అతడి వేతనం రూ.50వేల అయినప్పటికీ.. బేసిక్ పే తక్కువగా ఉండటం వల్ల భారీ స్థాయిలో కోత పడుతోంది.

ఇక సంస్థలో ఉన్నత స్థాయిలో ఉన్నవారికి మాత్రం లేఆఫ్ లు ఇవ్వడంలేదని సమాచారం. చిన్నాచితకా జీతం ఉన్నవారి నుంచి ఓ మాదిరి సీనియర్ల వరకు కోతలు అమలు చేస్తున్నారు. ఈ లేఆఫ్ లు కూడా అందరికీ ఒకేవిధంగా లేవు. రెండు రోజుల నుంచి పది పన్నెండు రోజుల వరకు ఇది ఉంటోందని తెలుస్తోంది. ఇక జిల్లాల్లో అయితే ఈ కోతలు మరీ భారీగా ఉన్నాయని సమాచారం. ఎడిటోరియల్ కాకుండా మిగిలిని విభాగాల సిబ్బంది మాత్రం దినదిన గండంగా గడుపుతున్నారని అంటున్నారు. ఈనాడుకు అనుబంధంగా ఉన్న పలు విభాగాలలో పనిచేస్తున్నవారిలో పలువురిని లీవ్ లో వెళ్లాలని సూచించారని.. దీంతో తమ ఉద్యోగం ఉంటుందా లేక పోతుందా అని ఆందోళనతో వారు కొట్టుమిట్టాడుతున్నారని సమాచారం.

లీవులో పంపడం, లే ఆఫ్ అమలు చేయడం వంటి చర్యల ద్వారా ఉద్యోగులు తమంతట తామే రాజీనామా చేసేలా చేయడమే సంస్థ వ్యూహమా అనే చర్చ జరుగుతోంది. నేరుగా ఉద్యోగాలు తొలగిస్తే చట్టపరమైన ఇబ్బందులు ఉంటాయి. అందువల్లే మధ్యే మార్గంగా వేతన కోతలు అమలు చేస్తున్నట్టు తెలుస్తోంది. సర్క్యులేషన్ పరంగా ఈనాడు కంటే దూరంలో ఉన్న సాక్షి మాత్రం ఇలాంటివి ఏమీ చేయకుండా ఎప్పటిలాగే తన ఉద్యోగులకు ప్రతినెలా 30 లేదా 31నే వేతనాలిచ్చేస్తోంది. ఈ నేపథ్యంలో ఈనాడు మాత్రం అందుకు విరుద్ధంగా చేస్తుండటంతో రామోజీపై విమర్శలు వ్యక్తమవుతున్నాయి. కాగా, ఇటీవల ఓ డెస్క్ లో పనిచేసే ఇద్దరికి కరోనా పాజిటివ్ నిర్ధారణ కావడంతో ఫిల్మ్ సిటీలో పనిచేసే ఎడిటోరియల్ సిబ్బందికి కరోనా పరీక్షలు నిర్వహించిన సంగతి తెలిసిందే. వారిలో 13 మందికి పాజిటివ్ వచ్చింది. దీంతో పలువురి సిబ్బందికి వర్క్ ఫ్రం హోం సౌకర్యాన్ని మొదలుపెట్టారు.