టీడీపీలో పెద్దోడితో చిన్నోడి ‘కమ్మ’ని ఫైట్‌

తెలుగుదేశం పార్టీలో అంతర్గత కుమ్ములాటలు తారాస్థాయికి చేరుకుంటున్నాయి. ప్రధానంగా విజయవాడ ఎంపీ కేశినేని నానికీ, మాజీ మంత్రి దేవినేని ఉమా మహేశ్వరరావుకీ అస్సలేమాత్రం పొసగడంలేదు. అధినేత చంద్రబాబు స్వయంగా రంగంలోకి దిగి, పరిస్థితిని చక్కదిద్దేందుకు ప్రయత్నిస్తున్నా, ఆ ఫలితాలు పలించడంలేదాయె. అంతలా ఇద్దరి మధ్యా విభేదాలెందుకు ముదిరి పాకాన పడుతున్నాయి.? అంటే, ఈ ప్రశ్నకు టీడీపీ వర్గాల నుంచే ఆసక్తికరమైన ‘లీక్‌’ ఒకటి బయటకు వస్తోంది.

కేశినేని నాని, దేవినేని ఉమామహేశ్వరరావు.. ఇద్దరూ ఒకే సామాజిక వర్గానికి చెందినవారు. ఆ సంగతి అందరికీ తెల్సిందే. మరి ‘కమ్మ’గా కలిసిపోక, ఈ యుద్ధమెందుకు.? అన్నదే మిలియన్‌ డాలర్ల ప్రశ్న. అయితే, ‘కమ్మ’టి ఈక్వేషన్‌లో మరో రెండు కోణాలున్నాయనీ, కేశినేని నాని ‘పవర్‌’ పరంగా, తన సొంత సామాజిక వర్గంలో ఇమేజ్‌ పరంగా తాను ‘పెద్ద’ అన్న భావనతో వుంటే, దేవినేని ఉమని ఆ రెండు విభాగాల్లోనూ ‘చిన్న’ అనే దృష్టితో చూస్తున్నారట. సో, చిన్నోడు ఇచ్చే ఉచిత సలహాలు పెద్దోడికి కోపం తెప్పిస్తున్నాయన్నమాట.

దేవినేని ఉమామహేశ్వరరావు మంత్రిగా వున్నప్పుడూ సొంత సామాజిక వర్గంలో ‘చిన్న – పెద్ద’ అన్న తేడాల కారణంగా కేశినేని అసహనానికి గురయ్యారనీ, అయితే అప్పట్లో కీలకమైన మంత్రిత్వ శాఖకు ప్రాతినిథ్యం వహిస్తున్న దరిమిలా, దేవినేని ఉమామహేశ్వరరావు ఓవరాక్షన్‌ని కేశినేని నాని ఉపేక్షించక తప్పలేదని పేరు చెప్పడానికి ఇష్టపడని ఓ టీడీపీ నేత స్వయంగా మీడియాకి లీకులు అందిస్తుండడం గమనార్హం.

ఇప్పుడు దేవినేని ఉమామహేశ్వరరావు పరిస్థితి ఏమంత బాగా లేదు. ఓటమి పాలయ్యాక ఆయన గురించి పట్టించుకుంటున్నవారే కరవయ్యారు. పైగా, ప్రాజెక్టుల్లో అవినీతిని వైఎస్‌ జగన్‌ ప్రభుత్వం బయటకు తీస్తే, దేవినేని అడ్డంగా బుక్కయిపోవడం ఖాయమన్న అభిప్రాయాలు వ్యక్తమవుతున్నాయి.

ఇదిలా వుంటే, 2014 ఎన్నికల సమయంలో దేవినేని ఉమ గెలుపు కోసం కేశినేని నాని ‘ఆర్థికంగా’ సహకరించగా, తాజా ఎన్నికల్లో కేశినేని నానిని ఓడించేందుకు దేవినేని ఉమ తీవ్రంగా శ్రమించారనీ, ఈ విశ్వాస ఘాతుకాన్ని నాని అస్సలు తట్టుకోలేకపోతున్నారని నాని సన్నిహితులు చెబుతున్నారు.

కమ్మ సామాజిక వర్గంలో ‘చిన్న – పెద్ద’ అనే తేడాలు, వాటికి మించిన ‘ఇగో క్లాషెస్‌’, వీటన్నిటికీ తోడు ఇతరత్రా అనేక సమీకరణాలు వెరసి.. కేశినేని నాని, దేవినేని ఉమ రాజకీయ ప్రత్యర్థులుగా మారిపోతున్నారు. టీడీపీని వీడేందుకు సిద్ధమవుతున్న కేశినేని నాని, బీజేపీలో చేరడం ఖాయమైతే, ఆ తర్వాత దేవినేని ఉమామహేశ్వరరావుకి మరిన్ని షాక్‌లు తప్పవన్నది బెజవాడ రాజకీయాల్లో జరుగుతోన్న ఆసక్తికరమైన చర్చ తాలూకు సారాంశం.

Related Posts

కొడాలి నాని పంచన చేరనున్న దేవినేని ఉమ!

‘కులం’ పోటు: బాబుని వదిలి ‘కమ్మ’గా బీజేపీలోకి!

కేశినేని బానిస సంకెళ్లు పోయేనా?