‘కులం’ పోటు: బాబుని వదిలి ‘కమ్మ’గా బీజేపీలోకి!

ఉమ్మడి ఆంధ్రప్రదేశ్‌ వున్నప్పుడు పెద్దగా తెలుగుదేశం పార్టీ అధినేత నారా చంద్రబాబునాయుడిపై ‘కులం’ పేరుతో ఆరోపణలు రాలేదుగానీ, ఎప్పుడైతే ఉమ్మడి ఆంధ్రప్రదేశ్‌ విభజన జరిగిందో, ఆ తర్వాతి నుంచీ సమీకరణాలు మారిపోయాయి. తెలంగాణలో సొంత సామాజికవర్గమే చంద్రబాబుని నిండా ముంచేసిందంటారు చాలామంది. అలా సొంత సామాజిక వర్గం పొడిచిన ‘కులం పోటు’కి తెలుగుదేశం పార్టీ, తెలంగాణలో అడ్రస్‌ గల్లంతయిపోయిందన్నది నిర్వివాదాంశం. ఇప్పుడు అదే పోటు, ఆంధ్రప్రదేశ్‌లోనూ చంద్రబాబుకి తప్పేలా కన్పించడంలేదు. ఆ తొలి పోటు, విజయవాడ ఎంపీ కేశినేని నాని నుంచే కాబోతోందట.

ఎంత బుజ్జగించినా కేశినేని నాని, తెలుగుదేశం పార్టీలో కొనసాగే పరిస్థితి లేకుండా పోయింది. ఇంకా కేశినేని నాని నుంచి టీడీపీ మీద సెటైర్లు పడ్తున్నాయి. తన సామాజిక వర్గానికి చెందిన ఇద్దరు వ్యక్తులు ఎంపీలుగా గెలిచారన్న ఆనందం చంద్రబాబుకి ఎక్కువ కాలం మిగిలేలా లేదు. ఆ ఇద్దరిలో ఒకరు ఆల్రెడీ బీజేపీతో టచ్‌లోకి వెళ్ళారు, మరొకరు బీజేపీతోపాటు వైఎస్సార్సీపీతోనూ సంప్రదింపులు జరుపుతున్నట్లు వార్తలొస్తున్నాయి.

ఐదేళ్ళపాటు 23 మంది ఎమ్మెల్యేలను, ముగ్గురు ఎంపీల్నీ, పలువురు ఎమ్మెల్సీలనీ, అలాగే రాజ్యసభ సభ్యుల్నీ కాపాడుకోవడం తెలుగుదేశం పార్టీ అధినేత చంద్రబాబుకి అంత తేలిక కాదు. అయితే, మారిన రాజకీయ సమీకరణాల నేపథ్యంలో చంద్రబాబుకి మొదట సొంత సామాజిక వర్గం నుంచే గట్టి ‘పోటు’ ఎదురవుతోంది. ఒక్కమాటలో చెప్పాలంటే, ఇది నిజంగానే చంద్రబాబుకి ‘వెన్నుపోటు’. ఎన్నికలకు ముందే, సొంత సామాజిక వర్గం నుంచి కొంత వ్యతిరేకతను ఎదుర్కొన్నారు చంద్రబాబు. అది ఎన్నికల్లో తీవ్ర ప్రభావమే చూపింది.

మొత్తంగా ఆంధ్రప్రదేశ్‌లో ఆ సామాజిక వర్గం ఈ సారి దాదాపు కుదేలైపోయింది రాజకీయంగా. ఈ నేపథ్యంలో మళ్ళీ బలపడాలంటే అధికార పార్టీల వెంట పరుగు తీయక తప్పదన్న కుల పెద్దల సూచనతో, వడి వడిగా అడుగులు వేసేస్తున్నారు అటు వైపుగా టీడీపీకి చెందిన సదరు సామాజిక వర్గ ప్రముఖులు. సరిగ్గా, ఈ పాయింట్‌ని ముందే ఊహించిన భారతీయ జనతా పార్టీ, ఎన్నడూ లేని విధంగా ఆ సామాజిక వర్గాన్ని పూర్తిస్థాయిలో టార్గెట్‌ చేసినట్లు కన్పిస్తోంది.

పదవుల ఎర చూపి కొందర్ని, కేసులతో బెదిరించి మరికొందర్ని లొంగదీసుకునే ప్రయత్నాల్ని ఆల్రెడీ స్టార్ట్‌ చేసేసిందట. ఎంపీ కేశినేని నాని మాత్రమే కాదు, అరడజను మంది వరకు టీడీపీ ప్రముఖులు అతి త్వరలో బీజేపీ తీర్థం పుచ్చుకోనున్నారని సమాచారమ్‌. అయితే, జరగబోయే డ్యామేజ్‌ని ముందే ఊహించిన చంద్రబాబు, కుల పెద్దల్ని రంగంలోకి దించి పరిస్థితిని చక్కబెట్టేందుకు ప్రయత్నిస్తున్నారు. కానీ, చంద్రబాబు పప్పులుడికేలా లేవిక్కడ.