బిగ్‌ క్వశ్చన్‌: తెలంగాణ.. మహారాష్ట్రని మించిపోతుందా.?

తెలంగాణలో కరోనా పాజిటివ్‌ కేసుల సంఖ్య అనూహ్యంగా పెరుగుతోంది. నిన్న ఒక్క రోజే 1892 కేసులు నమోదయ్యాయి తెలంగాణలో. వీటిల్లో కేవలం జీహెచ్‌ఎంసీ పరిధిలో నమోదైన కేసుల సంఖ్య 1658. తెలంగాణలో కరోనా తీవ్రతకు అద్దం పడుతున్నాయి ఈ నెంబర్స్‌. పైగా, తెలంగాణలో నిన్న వెల్లడయ్యింది కేవలం 5965 టెస్టుల ఫలితాలు మాత్రమే. పొరుగు రాష్ట్రం ఆంధ్రప్రదేశ్‌లో నిన్న దాదాపు 39 వేల కరోనా టెస్టుల ఫలితాలు వెల్లడయ్యాయి. ఆంధ్రప్రదేశ్‌ స్థాయిలో తెలంగాణలోనూ కరోనా టెస్టులు జరిగితే, ఫలితాల్లో పాజిటివ్‌ కేసులు ఎన్ని వుంటాయో ఊహించుకోవడం నిజంగానే భయానకం. దేశంలో చాలా రాష్ట్రాలతో పోల్చితే, తెలంగాణలో కరోనా పాజిటివిటీ రేటు చాలా ఎక్కువగా కన్పిస్తోంది. నిన్నటి ఫలితాలతో దాదాపు 30 శాతంగా పాజిటివిటీ రేటు వున్నట్లు కన్పిస్తోంది. మొదట్లో తెలంగాణలో కరోనా వైరస్‌ ‘కట్టడి’ బాగానే జరిగినా, లాక్‌డౌన్‌ సడలింపుల తర్వాత పరిస్థితి మారిపోయింది.

రెండంకెలు, మూడంకెలకు చేరుకుని.. అంతలోనే తగ్గి.. సింగిల్‌ డిజిట్‌కి వచ్చేసి.. ఇప్పుడు నాలుగంకెల స్కోరుకి రోజువారీ కేసులు నమోదవుతున్నాయంటే, ఇందులో ప్రభుత్వ వైఫల్యం సుస్పష్టం. పైగా, దేశంలో ఎక్కడా లేని విధంగా తెలంగాణలో వైద్య సౌకర్యాలపైనా ఆరోపణలు వెల్లువెత్తుతున్నాయి. బాధితుల్ని చేర్చుకోవడానికి ప్రైవేటు ఆసుపత్రులు కొన్ని సుముఖత వ్యక్తం చేయడంతో, అత్యంత దయనీయ స్థితిలో ప్రాణాలు కోల్పోతున్నవారి సంఖ్య పెరుగుతోంది. బాధిత కుటుంబాలు తమ ఆవేదనను సోషల్‌ మీడియా వేదికగా వెల్లగక్కుతున్నాయి. హైకోర్టు పదే పదే హెచ్చరిస్తున్నా, తెలంగాణలో కరోనా టెస్టుల సంఖ్య ఐదంకెలకు చేరుకోవడంలేదు. చాలా కష్టపడి రోజువారీ టెస్టుల సంఖ్య ఐదు వేలు దాటిస్తోంది తెలంగాణ ప్రభుత్వం. ధనిక రాష్ట్రం తెలంగాణలో వైద్య రంగం ఇంతటి దుస్థితిలో వుందా.? అని సగటు తెలంగాణ ప్రజానీకం ముక్కున వేలేసుకుంటోంది.

‘ఏం భయపడాల్సిన పనిలేదు..’ అని ప్రభుత్వం చెబుతున్నా, కరోనా వైరస్‌ కారణంగా అభాగ్యులు అత్యంత ఆవేదనా భరితంగా ప్రాణాలు కోల్పోతున్న వైనం.. సున్నిత మనస్కుల్ని కుంగదీసేస్తోంది. మరీ ముఖ్యంగా, ‘హైద్రాబాద్‌లో ఇక బతకలేం..’ అన్న భావనతో మహా నగరాన్ని వీడుతున్నవారి సంఖ్య రోజురోజుకీ పెరిగిపోతోంది. ఏదిఏమైనా, మహారాష్ట్ర లాంటి పరిస్థితి ఆంధ్రప్రదేశ్‌కి రాకుండా ఇప్పటికైనా తెలంగాణ ప్రభుత్వం మేల్కోవాలి.