ఢిల్లీకి సీఎం జగన్: ఈసారి ఏం అద్భుతాలు జరుగుతాయో.!

ముఖ్యమంత్రి వైఎస్ జగన్ మోహన్ రెడ్డి ఢిల్లీకి వెళుతున్నారు.. ఇందులో వింతేముంది.? రాష్ట్ర ముఖ్యమంత్రి ఢిల్లీకి వెళతారు, కేంద్ర ప్రభుత్వ పెద్దల్ని కలుస్తారు.. ఏ రాష్ట్రంలో ఏ ప్రభుత్వం వున్నాసరే.. ఇది తప్పదు. కానీ, తెలుగు రాష్ట్రాల్లో రాజకీయాలు చాలా ప్రత్యేకం. ఆంధ్రపదేశ్ అయితే ఇంకా ఇంకా ప్రత్యేకం.

చంద్రబాబు హయాంలో ముఖ్యమంత్రి ఢిల్లీ టూర్ చుట్టూ నానా యాగీ జరిగేది. ఇప్పుడు అంతకు మించిన యాగీ జరుగుతోంది. ముఖ్యమంత్రి వైఎస్ జగన్ ఢిల్లీకి వెళ్ళేది, తనపై వున్న కేసులకు సంబంధించి కేంద్ర ప్రభుత్వ పెద్దల నుంచి కొంత మేర ఊరట కోసం అన్నది టీడీపీ సాధారణంగా చేసే ఆరోపణ. కాదు కాదు, కేంద్ర ప్రభుత్వ పెద్దల కాళ్ళు పట్టుకోవడానికే.. అని టీడీపీ ఇంకాస్త గట్టిగా ఆరోపిస్తుంటుంది. ఇది నిజమేనా.? ముఖ్యమంత్రి ఢిల్లీకి వెళ్ళి, కేంద్ర ప్రభుత్వ పెద్దల్ని ప్రసన్నం చేసుకుంటే, ఆయనకు ఆయా కేసుల నుంచి ఉపశమనం లభిస్తుందా.? గతంలో చంద్రబాబు ఇలాగే చేశారా.? అన్నది ఇంకో చర్చ.

ముఖ్యమంత్రి ఢిల్లీకి వెళుతున్నారంటే, రాష్ట్రానికి సంబంధించిన పలు అంశాలపై ప్రజలకు స్పష్టత అవసరం. అందులో అతి ముఖ్యమైనది ప్రత్యేక హోదా. అదొక్కటే కాదు, రాజధాని సహా అనేక అంశాలున్నాయి. కానీ, ఇవేవీ గడచిన ఏడాదిన్నర కాలంగా జరుగుతున్న వైఎస్ జగన్ ఢిల్లీ టూర్లలో ప్రాధాన్యతాంశాలు కాలేకపోతుండడమే ఆశ్చర్యకరం. పోలవరం ప్రాజెక్టు వ్యవహారానికి సంబంధించి ఓ డమ్మీ రగడ బీజేపీ – వైసీపీ – టీడీపీ మధ్య జరిగింది. ఆ తర్వాత ఆ వివాదంపై కొంత స్పష్టత వచ్చింది. అంటే, ఇక్కడ సమస్యను పక్కదారి పట్టించే రాజకీయాలు గల్లీ నుంచి ఢిల్లీ స్థాయిలో మూడు ప్రధాన రాజకీయ పార్టీల మధ్య పక్కగా జరుగుతోందన్నమాట.

కేంద్రం మెడలు వంచి ప్రత్యేక హోదా తెస్తామని ప్రతిపక్షంగా వున్నప్పుడు నినదించిన వైసీపీ, అధికారంలోకి వచ్చాక… కేంద్రం ముందు తమ మెడలు వంచేసుకుంటుండడం హాస్యాస్పదం కాక మరేమిటి.? రాష్ట్రం నుంచి కేంద్రానికి వినతులు వెళతాయి.. కేంద్రం ఆయా అంశాలపై స్పందించినట్లు ఎలాంటి ప్రకటనా రాదు. ముఖ్యమంత్రి మాత్రం ‘అడిగాం.. అడుగుతూనే వుంటాం..’ అని చెబుతారు. ఇదొక నిరంతరం కొనసాగే ప్రసహనం అంతే.