దేవినేని ఉమకి సీఐడీ నోటీసులు.. కామెడీ అయిపోతున్నాయ్.!

మాజీ మంత్రి, టీడీపీ సీనియర్ నేత దేవినేని ఉమామహేశ్వరరావు, తిరుపతి ఉప ఎన్నిక నేపథ్యంలో అధికార వైసీపీ మీద విమర్శలు చేస్తూ, వైఎస్ జగన్ మోహన్ రెడ్డికి సంబంధించిన ఓ వీడియో ప్లే చేశారు ప్రెస్ మీట్ ద్వారా. అందులో వున్నవన్నీ అసత్యాలేననీ, వీడియో మార్ఫింగ్ చేసి, వైఎస్ జగనని అనని మాటలు అన్నారని ఆరోపిస్తున్నారంటూ ఓ వ్యక్తి (వైసీపీ నేత, న్యాయవాది) చేసిన ఫిర్యాదు నేపథ్యంలో ఏపీ సీఐడీ కేసు నమోదు చేసింది.

నిజానికి, ఏపీ సీఐడీ కేసు నమోదు చేయడాన్ని తప్పు పట్టలేం. వ్యవస్థలు తమ పని తాము చేసుకుపోవాల్సిందే. అంతిమంగా అసలు నేరం జరిగిందా.? లేదా.? అన్నది కోర్టులు తేలుస్తాయి. ఇక, సీఐడీ ఈ రోజు ఉదయం దేవినేని ఉమామహేశ్వరరావు ఇంటికి నోటీసులు అంటించింది. అందులో ఈ రోజు ఉదయం కర్నూలులో సీఐడీ యెదుట విచారణకు హాజరు కావాలని పేర్కొన్నారు.

ఉదయం 9.35 గంటలకు నోటీసులు అంటించి, ఉదయం 10.30 నిమిషాలకే.. విజయవాడకి చాలా దూరంలో వున్న కర్నూలులో విచారణకు హాజరు కావాలనడమేంటి.? అన్నది టీడీపీ ప్రశ్న. ‘ఇలా చేస్తున్నారు కాబట్టే, సీఐడీ అంటే రాష్ట్రంలో కామెడీ అయిపోయింది..’ అని టీడీపీ నేతలు ఎద్దేవా చేస్తున్నారు.

రాష్ట్ర చరిత్రలో కనీ వినీ ఎరుగని స్థాయిలో వ్యవస్థల పట్ల ఈ భావన ప్రజల్లో బలపడిపోవడానికి కారణమేంటి.? నో డౌట్.. రాజకీయ పెత్తనమే. న్యాయస్థానాల్లో పదే పదే పోలీసు వ్యవస్థకు చీవాట్లు పడుతున్నాయంటే, వ్యవస్థల్లో పనిచేస్తున్నవారు ఆత్మపరిశీలన చేసుకోవాల్సి వుంటుందన్నది రాజకీయ విశ్లేషకుల వాదన.

ఇక, దేవినేని ఆరోపణల విషయానికొస్తే.. రాజకీయాల్లో ఆరోపణలు సర్వసాధారణం. మార్ఫింగ్ వీడియోల గురించి మాట్లాడుకోవాలంటే.. అలాంటివారందర్నీ అరెస్టు చేయాలంటే.. రాష్ట్ర పరిధిలో జరుగుతున్న వ్యవహారాలకు సంబంధించి నిందితుల్ని అరెస్టు చేస్తే.. దేశంలోని జైళ్ళన్నీ కూడా సరిపోవేమో. అంత చెత్త ఫుటేజ్ రాజకీయ నాయకుల నుంచి మీడియాకి అందుతోంది మరి.