మెగాస్టార్ బర్త్ డే స్పెషల్స్: చిరంజీవి నట విశ్వరూపం చూపిన ‘పున్నమినాగు’

చదువు తర్వాత సినిమాల్లోకి వెళ్లాలనుకున్న చిరంజీవి.. ఇదే విషయం తండ్రి వెంకట్రావు గారికి చెప్తే ప్రోత్సహించారు. అయితే.. సక్సెస్ కాలేకపోతే పరిస్థితి ఏంటని అడిగితే.. ‘ఏముంది.. తెలుగు చిత్ర పరిశ్రమ ఒక మంచి నటుడిని కోల్పోతుంది’ అన్నారట చిరంజీవి. తనపై, తనలోని టాలెంట్ పై చిరంజీవికి అంతటి నమ్మకం. దానిని నిరూపించుకునేందుకు ఎక్కువ సమయం తీసుకోలేదు. వచ్చిన అవకాశాలను అందిపుచ్చుకుని తన నటనలోని పదును చూపించారు చిరంజీవి. అలా ప్రముఖ తమిళ సినీ దిగ్గజ నిర్మాణ సంస్థ ఏవీఎం దృష్టిలో పడ్డారు. ఏవీఎంలో అవకాశం దొరికితే వర ప్రసాదమే ఆరోజుల్లో. ఆ వరాన్ని పొందారు చిరంజీవి. ఆ సినిమానే ‘పున్నమినాగు’.

నాగులు పాత్ర వరంలా భావించి..

అప్పట్లో.. ఏవీఎం తెలుగు, తమిళంలో సినిమాలు తెరకెక్కించేది. అలా మంచి సత్తా ఉన్న కథను సిద్దం చేసింది. పాము ప్రధాన అంశంగా కథ సిద్ధం చేసింది. సినిమాలో నరసింహరాజు హీరో అయినా.. చిరంజీవిదే ప్రధాన పాత్ర. తన ఒంటి నిండా విషం ఉన్నా తనకు తెలీకుండా పాముగా మారిన మనిషి. కోర్కెలు, ఆలోచనలు ఉన్నా కూడా పాములా నటించాలి. పాము కదలికలు, హావభావాలు, కళ్ళలో క్రూరత్వం, మొహంలో గాంభీర్యం, అమాయకత్వం సమపాళ్లలో చుపించగలగాలి. ఇందుకు వర్ధమాన నటులైతే బాగుంటుందని భావించిన ఏవీఎం సంస్థకు తెలుగులో అప్పుడే వెలుగులోకి వస్తున్న చిరంజీవి వరంలా దొరికారు. మంచి పాత్రల కోసం ఎదురుచూస్తున్న చిరంజీవికి ఏవీఎంలో అవకాశం వరంలా.. డిఫరెంట్ వేరియేషన్స్ ఉన్న నాగులు పాత్ర దక్కడం అదృష్టంలా భావించారు.

కన్నీళ్లు పెట్టించిన పాత్ర..

అమాయకుడిలా ఉన్న చిరంజీవి పున్నమి రాత్రిళ్ళు కామంతో రగిలిపోతాడు. తాను విషంతో నిండిపోయానని తెలిసి నిస్సహాయుడిలా మిగిలిపోతాడు. ఈ వేరియేషన్లలో చిరంజీవి చూపిన నట వైవిధ్యం ప్రేక్షకులని కట్టిపడేసింది. పాములా మారే సమయంలో కళ్ళలో రౌద్రం చూపిస్తూ, నాలుక బయట పెట్టి చేసిన సహజ నటన, తన చర్మంపై పాము పుసను తీసే సమయంలో ప్రేక్షకులకు భయం కలిగేలా నటించారు. క్లైమాక్స్ లో పాము గుట్టల్లో, పుట్టల్లోకి వెళ్తున్నట్టు చిరంజీవి కొండల్లోకి పారిపోయే సన్నివేశం ఉంటుంది. నరసింహరాజు పారిపో అంటే.. ‘ ఎక్కడికి పోవాలి.. పోతే పుట్టలోకే పోవాలి ‘ అని చిరంజీవి చెప్పినప్పుడు.. ఆత్మహత్య చేసుకున్నప్పుడు ఆయన నటన, హావభావాలు ప్రేక్షకులకు కన్నీళ్లు తెప్పిస్తాయి. ‘నటుడు పాత్రలో జీవించాలి’ అనే సినీ మాటను చిరంజీవి తొలిరోజుల్లోనే ‘పున్నమినాగు’తో నిరూపించారు.

తొలి ఫిలింఫేర్ అవార్డు..

1980లో విడుదలైన ఈ సినిమా కన్నడ సినిమాకు రీమేక్. కుమరన్, శరవణన్, బాలసుబ్రమణియన్ నిర్మాణ సారధ్యంలో రాజశేఖర్ దర్శకత్వంలో తెరకెక్కిన పున్నమినాగు సినిమా అద్భుత విజయం సాధించి శతదినోత్సవం జరుపుకుంది. అనేక అవార్డులు సొంతం చేసుకుంది. కెరీర్లో చిరంజీవి తొలిసారి ఫిల్మ్ ఫేర్ అవార్డు దక్కించుకున్నారు. క్రిటిక్స్ సైతం చిరంజీవి నటనకు మంత్ర ముగ్ధులయ్యారు. ఈ సినిమాతో తన నటనతో ఎంతగా ప్రేక్షకుల్ని మెప్పించగలనో నిరూపించారు. ఈ సినిమాలో నటనతో చిరంజీవి మరో మెట్టు ఎక్కారు. ఆనాడు తండ్రితో చెప్పిన మాట విలువెంతో ఆనతి కాలంలోనే ‘పున్నమినాగు’తో నిరూపించుకున్నారు చిరంజీవి.