అను‘కుల’ మీడియా.. ఎవరి కులం.? ఎవరి మీడియా.?

ఎవరు ఔనన్నా ఎవరు కాదన్నా, తెలుగు నాట మీడియా రాజకీయ పార్టీల వశమైపోయింది. ఓ పార్టీ తరఫున కొన్ని మీడియా సంస్థలు, మరో పార్టీ తరఫున ఇంకొన్ని మీడియా సంస్థలు వకాల్తా పుచ్చుకోవడమనేది ఇప్పుడు కొత్తగా తెరపైకొచ్చిన వ్యవహారం కాదు. చాలాకాలంగా నడుస్తున్న తంతు ఇది. నిజానికి, ఇటీవలి కాలంలో అది మరింత దుర్భర స్థాయికి దిగజారిపోయిందంతే. ఇక్కడ ఏ రాజకీయ పార్టీకి చెందిన నాయకుడైనా అను‘కుల’ మీడియా అని అన్నాడంటే, అంతకన్నా హాస్యాస్పదం ఇంకోటుండదు. ఎవరైతే, పేరు చివర్న ‘కులం తోకలు’ తగిలించుకుని వున్నారో, వాళ్ళే కులాల కుంపట్లను రగుల్చుతూ, రాజకీయ ప్రత్యర్థుల మీద విమర్శలు చేస్తుంటారు. సరే, అసలు విషయానికొద్దాం.

వైసీపీ నేత, రాజ్యసభ సభ్యుడు విజయసాయిరెడ్డి.. టీడీపీ అను’కుల‘ మీడియా మీద సెటైర్లేశారు సోషల్ మీడియా వేదికగా. ‘ఒక దురుద్దేశ భావనను నిజం అని చూపించడానికి బాబు అను’కుల‘ మీడియా చేస్తున్న కుతంత్రాలు చౌకబారుగా, అసహ్యంగా వుంటున్నాయి. ఢిల్లీలో జగన్ గారు చేసిన అభ్యర్థనల్ని కేంద్రం తిరస్కరిస్తే బాగుండనే దుర్మార్గపు ఆలోచనలను ఏమనాలి? అలా అనుకోవడం ప్రజలకు నష్టం జరగాలని కోరుకోవడమే..’ అని విసారెడ్డి ట్వీటేశారు.

అంతా బాగానే వుందిగానీ, 2014 నుంచి 2019 వరకు వైసీపీ అను’కుల‘ మీడియా చేసిందేంటి.? అప్పటి ముఖ్యమంత్రి చంద్రబాబు ఢిల్లీకి వెళ్ళిన ప్రతిసారీ, తెలుగు నాట పెంట పెంట చేసేసింది ఈ కల గజ్జి మీడియా. నిజానికి, ఆ మీడియా.. ఈ మీడియా అన్న తేడాల్లేవ్.. అంతిమంగా అందరూ కలిసి, అన్ని ప్రధాన రాజకీయ పార్టీలూ కలిసి.. విడివిడిగా ఆంధ్రపదేశ్ అనే రాష్ట్రం బాగుపడకూడదనే కంకణం కట్టుకుని వున్నట్టున్నాయి. గడచిన ఏడేళ్ళుగా రాష్ట్రంలో జరుగుతున్నది అదే. అప్పట్లో ప్రత్యేక హోదా కోసం నిరాహార దీక్షలు చేసిన నాయకులు, ఇప్పుడు గమ్మునుండిపోయారంటే దానర్థమేంటి.?

ఢిల్లీకి ఏ ముఖ్యమంత్రి వెళ్ళినా దాన్ని స్వాగతించాల్సిందే. కానీ, వెళ్ళినోళ్ళు రాష్ట్రం గురించి ఎంతలా అక్కడ పట్టుబడుతున్నారన్నదే కీలకం. ‘ఫలప్రదం’ అని ప్రకటనలు చేసుకుంటున్న నేతలు, ఏ ఫలాలు రాష్ట్రానికి అందాయో చెప్పరుగానీ, ప్రత్యర్థుల మీద విరుచుకుపడతారు. జనాన్ని వెర్రి వెంగళప్పల్ని చేయడం తప్ప, రాష్ట్రానికి మేలు చేద్దామన్న సోయ అధికారంలో వున్నవారికి లేకపోవడం శోచనీయం. ‘కుల’ మీడియా (పచ్చ మరియు బులుగు) సైతం ఈ విషయంలో తనవంతు ‘కుట్రపూరిత’ పాత్ర పోషిస్తుండడం దారుణం.