అమరావతిపై ఈ ‘కులాల కుంపటి’ చల్లారేదెప్పుడు.?

ఆంధ్రప్రదేశ్‌ రాజధాని అమరావతి విషయంలో మొదటి నుంచీ ‘కులం’ పేరుతో ఆరోపణలు వెల్లువెత్తుతూనే వున్నాయి. ఓ బలమైన సామాజిక వర్గ ప్రముఖులు చంద్రబాబు హయాంలో అమరావతిపై ‘కన్నేసిన’ మాట వాస్తవం. అప్పట్లో అమరావతి ఆ సామాజిక వర్గం చెప్పుచేతల్లోకి వెళ్ళిపోయిన మాట కూడా వాస్తవమే. అమ్మకాలు, కొనుగోళ్ళలో ఆ సామాజిక వర్గం పెత్తనమే గట్టిటా నడిచింది. అలాగని, అమరావతి ప్రాంతానికి కులాన్ని ఆపాదించగలమా.? ప్రభుత్వం మారింది.. అమరావతిపై ‘కులం ముద్ర’ అలాగే వుంది.

ఈ కారణంగానే అమరావతితోపాటు మరో రెండు కొత్త రాజధానులు ప్రచారంలోకి వచ్చాయి. అమరావతిని కేవలం శాసన రాజధానికే పరిమితం చేసి, ఎగ్జిక్యూటివ్‌ క్యాపిటల్‌ని విశాఖకి, న్యాయ రాజధానిని కర్నూలుకి తీసుకెళ్ళేందుకు ప్రయత్నాలు జరుగుతున్నాయి. ఈ క్రమంలో ‘ఏ సామాజిక వర్గం ఎంత భూమిని అమరావతికి ఇచ్చింది.?’ అన్న విషయమై లెక్కలు తీస్తున్నారు కొందరు. ఈ మేరకు సోషల్‌ మీడియాలో ఆ లెక్కలు విస్తృతంగా ప్రచారమవుతున్నాయి. ‘అధికార పార్టీ చెప్పిన లెక్క తప్పు.. కమ్మ సామాజిక వర్గం ఇచ్చిన భూమి ఇంత.. కాపు సామాజిక వర్గం ఇచ్చిన భూమి ఇంత.. దళితుల భూముల లెక్కలు ఇంత.. బీసీల భూముల లెక్కలు ఇంత..’ అంటూ లెక్కలు చూపిస్తూ, ‘ఇప్పుడేమంటావ్‌.?’ అంటూ ముఖ్యమంత్రి వైఎస్‌ జగన్‌ని సూటిగా ప్రశ్నిస్తున్నారు కొందరు నెటిజన్లు.

ఇదే, ఈ ‘కుల లెక్కల’ పిచ్చి కారణంగా ఆంధ్రప్రదేశ్‌ ఇలా తగలడింది. అప్పుడు వైసీపీ ఇదే చేసింది.. ఇప్పుడు టీడీపీ అదే చేస్తోంది. అంతిమంగా రాష్ట్రానికే అన్యాయం జరుగుతోంది. ఇదిలా వుంటే, హైకోర్టులో రాష్ట్ర రాజధాని / రాజధానుల అంశం గురించీ, హైకోర్టు నిర్మాణం గురించీ పలు పిటిషన్లు దాఖలయ్యాయి. గవర్నర్‌ ఆమోదం పొందితే, ప్రభుత్వం మూడు రాజధానుల విషయమై ముందడుగు వేసేస్తుంది గనుక.. ఈ విషయమై జోక్యం చేసుకోవాలన్నది ఓ పిటిషన్‌ సారాంశం. అయితే, సంబంధిత బిల్లులకు గవర్నర్‌ ఆమోద ముద్ర వేసినా, న్యాయ సమీక్షకు అవకాశం వుంటుందని న్యాయస్థానం తేల్చి చెప్పింది.

మరోపక్క, ప్రస్తుత హైకోర్టు భవనం, అవసరాలకు తగిన విధంగా లేదనీ, కొత్త హైకోర్టు నిర్మాణం అవసరం వుందంటూ దాఖలైన పిటిషన్‌పైనా విచారణ జరిగింది. ఈ రెండు పిటిషన్లపైనా విచారణ ఆగస్ట్‌ 6వ తేదీకి వాయిదా వేశారు. మొత్తమ్మీద, ఓ వైపు గవర్నర్‌ వద్ద పంచాయితీ, ఇంకో వైపు కేంద్రం ఆరా, మరో వైపు హైకోర్టులో పిటిషన్లు.. ఇవన్నీ ఓ ఎత్తు.. రాజధాని చుట్టూ ఇంకా కుల జాడ్యం కొనసాగుతుండడం ఇంకో ఎత్తు.