కేసులు పెరుగుతోంటే, టెస్టులు తగ్గుతున్నాయెందుకు.?

ఆ మధ్య ఒక రోజులో దాదాపు 40 వేల టెస్ట్‌లు చేసింది ఆంధ్రప్రదేశ్‌ ప్రభుత్వం కరోనా వైరస్‌ నేపథ్యంలో. కానీ, ఆ తర్వాత ఆ స్థాయి ఫిగర్‌ ఇంకోసారి అందుకోలేదు సరికదా.. ఈ మధ్య 25 వేల టెస్ట్‌లకు చేరుకోవడం కూడా కష్టమైపోతోంది ఏ రోజు చూసినా. అప్పుడప్పుడూ టెస్టుల సంఖ్య 20 వేల దిగువకు కూడా పడిపోతోంది. కానీ, అదే సమయంలో కరోనా పాజిటివ్‌ కేసుల సంఖ్య పెరుగుతోంది. చిత్రమేంటంటే, తెలంగాణలో కరోనా పాజిటివ్‌ కేసుల సంఖ్య క్రమంగా తగ్గుతోంది. తెలంగాణలో టెస్టుల సంఖ్య పెరుగుతోంది. ఇంతకీ, ఏం జరుగుతోంది తెలుగు రాష్ట్రాల్లో.

విపక్షాల నుంచి వస్తున్న విమర్శలు కావొచ్చు, పెరుగుత్ను కేసులు, ప్రజల నుంచి వస్తున్న వ్యతిరేకత.. ఇవన్నీ దృష్టిలో పెట్టుకుని తెలంగాణ ప్రభుత్వం టెస్టుల సంఖ్య పెంచక తప్పడంలేదు. అయితే, అలా పెంచడం ద్వారా కేసుల సంఖ్య తగ్గుతుండడంతో తెలంగాణ ఇప్పుడిప్పుడే ఊపిరి పీల్చుకుంటోంది. మరీ ముఖ్యంగా గ్రేటర్‌ హైద్రాబాద్‌లో కరోనా పాజిటివ్‌ కేసుల సంఖ్యలో తగ్గుదల నమోదవుతోంది రోజువారీ లెక్కల్లో.

గ్రేటర్‌ హైద్రాబాద్‌లో జనాభాని పరిగణనలోకి తీసుకుంటే.. ఈ స్థాయిలో కేసులు నమోదవడం అసహజమేమీ కాదు. కానీ, ఆంధ్రప్రదేశ్‌ పరిస్థితేంటి.? ఈ రోజు కొన్ని జిల్లాల్లో 300కి పైగా కరోనా పాజిటివ్‌ కేసులు నమోదవడంతో మొత్తం ఆంధ్రప్రదేశ్‌ ఉలిక్కిపడింది. రికార్డు స్థాయిలో కరోనా టెస్టులు చేసినప్పుడు, ట్రేసింగ్‌ విషయంలో అత్యద్భుతంగా పనిచేస్తున్నప్పుడు.. కేసుల సంఖ్య తగ్గాలిగానీ, ఎందుకు పెరుగుదల కన్పిస్తోంది.?

పైగా, తెలంగాణలోకి ఇతర రాష్ట్రాల నుంచి వచ్చేవారి విషయంలో ఆంక్షలు లేవు. కానీ, ఆంధ్రప్రదేశ్‌లోకి వెళ్ళాలంటే కొన్ని ఆంక్షలున్నాయి. కానీ, ఆంధ్రప్రదేశ్‌లోనే తెలంగాణ కంటే ఎక్కువ కేసులు నమోదవుతున్న పరిస్థితిని ఇప్పుడు చూస్తున్నాం. అధికార పార్టీకి చెందిన నేతలు విచ్చలవిడిగా రాజకీయ కార్యక్రమాలు చేపడుతుండడం వల్లే ఈ దుస్థితి అన్న విపక్షాల విమర్శల్ని తేలిగ్గా కొట్టిపారేయలేం. కీలక పదవుల్లో వున్న ‘పెద్దలు’ మాస్క్‌లు లేకుండా జనంలోకి వెళ్ళడం, వారిని ఆదర్శంగా తీసుకుని పార్టీ కార్యకర్తలూ విచ్చలవిడిగా తిరిగేస్తుండడం ద్వారా రాష్ట్రంలో కరోనా కేసులు పెరిగిపోతున్నాయన్న విమర్శలకు అధికార పక్షం ఏం సమాధానం చెబుతుంది.?