ఓటిటి మూవీ రివ్యూ: బుచ్చినాయుడు కండ్రిగ తూర్పు వీధి – యాసే కాదు, కథ కూడా మారాలి.!

నూతన నటీనటులు మున్నా, దృషిక చందర్ హీరో హీరోయిన్లుగా కృష్ణ పోలూరు దర్శకుడిగా పరిచయం అవుతూ చేసిన సినిమా ‘బుచ్చినాయుడు కండ్రిగ తూర్పు వీధి’. లాక్ డౌన్ కి ముందే ఫస్ట్ కాపీ రెడీ అయినప్పటికీ థియేటర్స్ లేని కారణంగా కొద్ది నెలలు వెయిట్ చేసి ఫైనల్ గా ఓటిటి బాట పట్టిన సినిమాల్లో ఇదీ ఒకటి. నేడు ఆహా లో డైరెక్ట్ గా రిలీజైన ఈ విలేజ్ లైవ్ స్టోరీ ఎంత వరకూ ఆకట్టుకుందో ఇప్పుడు చూద్దాం..

కథ:

పవర్ స్టార్ పవన్ కళ్యాణ్ నటించిన సుస్వాగతం సినిమాలోని క్లైమాక్స్ డైలాగ్స్ తో సినిమా మొదలు పెట్టి, అలా తొలిప్రేమ సినిమా ఆడుతున్న హాల్లో నుంచి మన హీరో బాలు(మున్నా) ప్రేమకథ మొదలవుతుంది.. ఆ ఊరి పేరు బుచ్చినాయుడు కండ్రిగ తూర్పు వీధి… తన క్లాస్ మేట్ మరియు ఎదురింటి అమ్మాయి అయిన స్వప్న(దృషిక చందర్)ని ప్రేమిస్తుంటాడు. కానీ స్వప్న వాళ్ళ నాన్న అన్నిటికన్నా కులమే ముఖ్యం అనే మనస్తత్వం కలవాడు. అనుకున్నట్టే బాలు – స్వప్న ప్రేమలో పడతారు. పెద్దలు ఒప్పుకోని పరిస్థితి.. దాంతో లేచిపోతారు. ఇక అక్కడి నుంచి వారి ప్రేమ కథ ఏమైంది? కలిసే ఉన్నారా లేక విడకొట్టరా? పరువు కోసం ప్రాణం తీసే మనస్తత్వం ఉన్న స్వప్న వాళ్ళ నాన్న ఆ ప్రేమికులని ఏం చేశారు అనేదే కథ..

తెర మీద స్టార్స్..

మున్నా – దృషిక చందర్ లు హీరో హీరోయిన్లుగా కొన్ని ఎపిసోడ్స్ లో మంచి నటనని కనబరిచారు. ముఖ్యంగా చైల్డ్ హుడ్ ఎపిసోడ్స్ లో చాలా బాగా చేశారు. మున్నా ఎమోషనల్ సీన్స్ లో ఇంకా బెటర్ చేసి ఉంటే బాగుండేది. కేరాఫ్ కంచరపాలెం ఫేమ్ సుబ్బారావు ఫాదర్ పాత్రలో చాలా బాగా చేయడం వలన ఒకటి రెండు సీన్స్ లో ఎమోషనల్ ఫీల్ వస్తుంది. చైల్డ్ హుడ్ ఎపిసోడ్స్ లో హీరోకి, హీరోయిన్ కి ఫ్రెండ్స్ గా నటించిన ఇద్దరు లంబు – జంబులు(బొద్దుగా ఉన్న అబ్బాయి – అమ్మాయి) అక్కడక్కడా నవ్విస్తారు. మిగిలిన నటీనటులు వారి పాత్రల వరకూ న్యాయం చేశారు.

తెర వెనుక టాలెంట్..

ఈ సినిమా చూస్తున్నంత సేపు కళ్ళకి నేత్రానందం, చెవులకు శ్రవణానందం ఉంటుంది.. అనగా డీఓపీ రామ్ మహేషన్ పల్లెటూరిని, సింపుల్ లొకేషన్స్ అయినా వాటిని చూపించిన విధానం సూపర్బ్.. ఆ విజువల్స్ కి ప్రాణం పోసేలా మిహిరాంశ్ పాటలు, నేపధ్య సంగీతమే అందించారు. ఈ రెండు ఈ సినిమాకి బిగ్గెస్ట్ హైలైట్స్. ఆ తర్వాత చెప్పుకోవాల్సింది కెప్టెన్ అఫ్ ది షిప్ కృష్ణ పోలూరు గురించి.. కథ పరంగా పెద్ద విషయం లేదు.. ఇద్దరి మధ్య ప్రేమ.. దానికి కులం అడ్డు.. పారిపోవడం, చంపుకోవడం.. ఇలా రొటీన్ పాత చింతకాయపచ్చడి స్టోరీ.. పోనీ అలాంటికథకి కథనం అన్నా ఆసక్తిగా ఉందా అంటే అదీ లేదు.. చాలా నిధానంగా సాగుతూ చూసే వారిని నిదురపుచ్చేలా సాగుతుంది. డైరెక్టర్ గా అనుకున్న ఎమోషన్ తో అయినా కట్టిపడేశాడా? ప్రేమలో ఎడబాటుతో ఏడిపించాడా? అంటే అదీ లేదు.. ప్రేమ కథలో ఉండాల్సిన ఎమోషన్ ని పర్ఫెక్ట్ గా చూపించకపోవడం వలనే బోరింగ్ గా అనిపిస్తుంది. కానీ కథా పరంగా ఎంచుకున్న విలేజ్ బ్యాక్ డ్రాప్ వలన అక్కడి యాసలో రాసుకున్న డైలాగ్స్ మాత్రం కాస్త రొటీన్ కి భిన్నంగా అనిపించడం వలన బాగున్నాయి. డైరెక్టర్ మొదటి నుంచి హీరోయిన్ ఫాదర్ పాత్రలో కుల పిచ్చి ఈ రేంజ్ లో ఉంటుందా? అనేలా ఎలివేట్ చేసి.. ఎందుకు? ఏమిటి? ఎలా? అనేది లేకుండా క్లైమాక్స్ లో పాత్రని ఎందుకు మార్చేశాడా అనేది ఓ మిలియన్ డాలర్ ప్రశ్న.

ఎడిటర్ మార్తాండ్ కె వెంకటేష్ చాలా కట్ చేస్తేనే 2 గంటల సినిమా అయ్యింది.. ఇంకో 30 నిమిషాలు కోసేసినా సినిమా ఫీల్ లో పెద్ద మార్పు ఉండదు. దాన్నిబట్టి ఎడిట్ లో ఎంత లాగ్ ఉందో మీరు ఊహించవచ్చు. నిర్మాణ విలువలు బాగున్నాయి.

విజిల్ మోమెంట్స్:

– వండర్ఫుల్ విజువల్స్
– సూపర్బ్ మ్యూజిక్
– నేటివిటీ అండ్ చైల్డ్ హుడ్ ఎపిసోడ్

బోరింగ్ మోమెంట్స్:

– తరతరాల నుంచీ వస్తున్న అదే ప్రేమ కథ
– నీరసం తెప్పించే కథనం
– ఆకట్టుకొని ఎమోషన్
– 2 గంటల నిడివి
– ఎంటర్టైన్మెంట్ లేకపోవడం
– సహనాన్ని పరీక్షించే సెకండాఫ్

విశ్లేషణ:

ఇప్పటికి లెక్కలేనన్ని సార్లు చూసేసిన ఓ విలేజ్ ప్రేమకథని ఈ సారి చిత్తూరు యాసలో చేసిన సినిమానే ఈ ‘బుచ్చినాయుడు కండ్రిగ తూర్పు వీధి’. ఆ యాస తప్ప కొత్తగా చెప్పుకోవడానికి ఏమీ లేదు, చూసి ఎంటర్టైన్ అవ్వడానికి, ఎమోషనల్ గా కనెక్ట్ అవ్వడానికి కూడా ఏమీ లేని ఈ సినిమాని చూడడం కష్టం, అలాంటిది చివరి దాకా చూడడం చాలా చాలా కష్టం సుమీ..

చూడాలా? వద్దా?: లైట్ తీస్కోండి..!

తెలుగుబులెటిన్.కామ్ రేటింగ్ : 1.5/5