ఆగస్టు నుండే మొదలెడతారట..!

‘సింహా’, ‘లెజెండ్‌’ వంటి బ్లాక్‌బస్టర్‌ చిత్రాలను అందించిన బాలకృష్ణ – బోయపాటి శ్రీనుల క్రేజీ కాంబినేషన్ మరో సంచలన చిత్రానికి సిద్ధమవుతున్నారు. నేడు బోయపాటి శ్రీను పుట్టినరోజు సందర్భంగా జరిగిన వేడుకల్లో బాలకృష్ణతో చేయనున్న సినిమా గురించి ఆయన ప్రకటించారు. ఆగస్ట్‌ రెండో వారంలో షూటింగ్‌ ఆరంభించి, వచ్చే ఏడాది వేసవికి విడుదల చేయాలనుకుంటున్నామని బోయపాటి శ్రీను తెలిపారు. ఇండస్ట్రీలోని పలువురు నిర్మాతలు, దర్శకులతో పాటు ఎంతోమంది టెక్నీషియన్లు ఆయనకు పుట్టినరోజు శుభాకాంక్షలు తెలిపారు.

ఈ సందర్బంగా బోయపాటి మరిన్ని వివరాలు తెలియచేస్తూ.. ఇప్పటికే బాలయ్య కోసం ఓ పవర్ ఫుల్ కథను సిద్ధం చేసినట్టు తెలిపాడు. కథ విషయంలో వీరిద్దరి మధ్య చర్చలు జరిగాయట. లైన్ నచ్చడంతో ఫుల్ స్క్రిప్ట్ సిద్ధం చేయమని చెప్పాడట బాలయ్య. ప్రస్తుతం అదేపనిలో బిజీగా ఉన్నాడు బోయపాటి శ్రీను. బాలయ్య కెరీర్ లో నిలిచిపోయేలా సింహ, లెజెండ్ లాంటి రెండు బ్లాక్ బస్టర్ హిట్స్ తరువాత వీరి కాంబినేషన్ లో సినిమా అనగానే నందమూరి ఫాన్స్ లో భారీ అంచనాలు నెలకొన్నాయి.

వరుసగా ఎన్టీఆర్, కథానాయకుడు, మహానాయకుడు అంటూ రెండు డిజాస్టర్స్ తో టెన్షన్ మీదున్న బాలయ్యకు ఇప్పుడు సరైన సక్సెస్ అవసరం. అందుకే ఆయన బోయపాటి శ్రీనుతో సినిమాకు ఓకేచెప్పాడు. మాస్ చిత్రాల దర్శకుడిగా ఇమేజ్ తెచ్చుకున్న బోయపాటి కి రామ్ చరణ్ తో చేసిన వినయ విధేయ రామ డిసాస్టర్ ని తెచ్చిపెట్టింది. దాంతో తనకు సరైన హిట్టు అవసరం కాబట్టి ఆ దిశగా ప్రయత్నాలు మొదలు పెట్టాడు బోయపాటి. ఈ చిత్రాన్ని బాలయ్య సొంత బ్యానర్ లోనే నిర్మించే అవకాశాలు ఉన్నాయట. ఎన్టీఆర్ సినిమా కోసం ఎన్ బికే బ్యానర్ ని మొదలు పెట్టిన బాలయ్య తన సొంత బ్యానర్ లో సినిమాలు తీయడానికి ఆసక్తి చూపిస్తున్నాడు. సో త్వరలోనే ఈ సినిమాకు సంబందించిన అధికారిక ప్రకటన వచ్చే అవకాశాలు ఉన్నాయి.