‘మెరుగైన’ కుట్ర: ఆంధ్రప్రదేశ్‌ని ముక్కలు చేయడానికేనా?

ఉమ్మడి ఆంధ్రప్రదేశ్‌ రెండుగా విడిపోయాక.. ఆంధ్రప్రదేశ్‌కి రాజధాని అంటూ లేకుండాపోయింది. పేరుకే అమరావతి అనేది రాజధాని. కానీ, అక్కడ ఇంకా శాశ్వత అధికారిక నిర్మాణాలు ఏమీ లేవు. రాజధాని నిర్మాణం అత్యంత క్లిష్టమైన వ్యవహారంగా మారిపోయింది. పైగా, ప్రభుత్వం మారడంతో అమరావతి అయోమయంలో పడిపోయింది. కొత్త రాజధాని ఊహాగానాలు విన్పిస్తున్నాయక్కడ. ఈ పరిస్థితుల్లో ఆంధ్రప్రదేశ్‌ నెత్తిన ‘మెరుగైన’ కుట్ర షురూ అయ్యింది. ఓ ప్రముఖ రాజకీయ పార్టీకి అత్యంత సన్నిహితంగా మెలిగే సదరు మీడియా సంస్థ, ఈ కుట్రలో భాగం పంచుకుంటోందంటూ ఆంధ్రప్రదేశ్‌కి చెందిన నెటిజన్లు భగ్గుమంటున్నారు.

అమరావతి పరిధిలో ఇటీవలే హైకోర్టు భవనం పూర్తవడం, అక్కడ కార్యకలాపాలు కూడా మొదలవడం తెలిసిన విషయాలే. అయితే, అది తాత్కాలిక హైకోర్టుగానే ప్రాచుర్యం పొందుతోంది. శాశ్వత హైకోర్టు రాయలసీమలో ఏర్పాటు చేయాలన్నది కొందరి వాదన. మరికొందరి వాదన విశాఖలో హైకోర్టు వుండాలని. మరోపక్క, అమరావతి నుంచి హైకోర్టుని తరలించొద్దంటూ ఆందోళనలు మొదలయ్యాయి. అసలంటూ రాజధాని ఎక్కడో తెలియని అయోమయంలో ఆంధ్రప్రదేశ్‌ ప్రజలుంటే, ప్రాంతాల మధ్య హైకోర్టు లొల్లి ఏంటన్న ఆవేదన సర్వత్రా వ్యక్తమవుతోంది.

దీనంతటికీ వైఎస్‌ జగన్‌ సర్కార్‌ నిర్లక్ష్య వైఖరే కారణమన్నది నిర్వివాదాంశం. అమరావతిపై సందేహాలకు తెరలేపిందే వైఎస్‌ జగన్‌ సర్కార్‌. కర్నూలులో హైకోర్టు పెట్టాలనే ఆలోచన జరుగుతోందని వైసీపీ నేతలంటున్నారు. బీజేపీ, దానికి మద్దతిస్తోంది కూడా. రాష్ట్ర ప్రయోజనాలు బీజేపీకి ఎటూ పట్టడంలేదు.. రాష్ట్రంలో అధికార పార్టీ అయిన వైసీపీ సైతం అదే తీరులో వ్యవహరిస్తే ఎలా.? కర్నూలుకి హైకోర్టు తరలించాలనుకుంటే.. ఆ విషయం స్పష్టం చేసెయ్యాలి. రాజధానిని మార్చాలనుకుంటే అందులో అయినా క్లారిటీ వుండాలి.

కన్‌ఫ్యూజన్‌లో రాష్ట్రాన్ని కొనసాగించాలనుకోవడం ప్రభుత్వానికి ఏమాత్రం సబబు కాదు. ఆంధ్రప్రదేశ్‌లో హైకోర్టు ఎక్కడుండాలో పొరుగు రాష్ట్రం నుంచి ‘పెద్దలు’ స్కెచ్‌ వేస్తున్నారంటే.. పరిస్థితి ఎంత దారుణంగా వుందో అర్థం చేసుకోవచ్చు. ఆంధ్రప్రదేశ్‌ ప్రభుత్వం తరఫున నామినేటెడ్‌ పోస్ట్‌ పొందిన సదరు పెద్ద మనిషి, తన మీడియా ద్వారా రాష్ట్రంలో చిచ్చుకు కారణమవుతున్నారనే ప్రచారం నిజమేనా.?