బాబుకు బీజేపీ దారులు మూసుకుపోయినట్టేనా?

కేంద్రంలోని బీజేపీకి మళ్లీ దగ్గర కావాలని టీడీపీ అధినేత చంద్రబాబు భావిస్తున్నారా? ఇందుకు సంబంధించి తెర వెనుక కసరత్తు షురూ చేశారా? అంటే ఔననే సమాధానం వినిపిస్తోంది. ఎన్నికల్లో ఓటమి తర్వాత తీవ్ర అంతర్మథనం చెందుతున్న చంద్రబాబు.. బీజేపీతో విభేదించి బయటకు రావడం తీవ్రమైన తప్పిదమని బహిరంగంగానే అంగీకరించారు. 2014 ఎన్నికల్ల తరహాలో బీజేపీ, జనసేనతో కలిసి వెళ్లి ఉంటే ఫలితం మరోలా ఉండేదని పేర్కొన్నారు.

ప్రత్యేక హోదా విషయంలో యూ టర్న్ తీసుకుని కేంద్రంలోని ఎన్డీఏ ప్రభుత్వం నుంచి బయటకు వచ్చిన తర్వాత చంద్రబాబు బీజేపీ లక్ష్యంగా విమర్శలు గుప్పించిన సంగతి తెలిసిందే. ఓ దశలో ప్రధాని మోదీపై తీవ్రంగా విరుచుకుపడ్డారు. పనిలో పనిగా బీజేపీ జాతీయ అధ్యక్షుడు అమిత్ షా పైనా విమర్శలు చేశారు. తిరుపతి వచ్చిన షాను టీడీపీ కార్యకర్తలు అడ్డుకునేలా చేశారు. ఇవన్నీ ఏపీలో రాజకీయంగా మైలేజీ పొందడానికే చేశారు. కానీ ఎన్నికల ఫలితాలు సానుకూలంగా రాలేదు. దీంతో ఆయనకు కష్టాలు మొదలయ్యాయి. పార్టీ నుంచి వలసలు పెరిగిపోయాయి.

మరోవైపు ఏ క్షణమైనా నెత్తిన పిడుగులా పడటానికి కేసులు కాచుకుని ఉన్నాయి. ఈ నేపథ్యంలోనే బీజేపీతో మళ్లీ కలవాలని బాబు యోచిస్తున్నట్టు తెలుస్తోంది. ఇందుకోసం అందుబాటులో ఉన్న మార్గాలన్నీ అన్వేషిస్తున్నారు. అయితే, ఈ ప్రయత్నాలు ఎంత వరకు ఫలిస్తాయన్నది అంతుబట్టకుండా ఉంది.

ఒకప్పుడు గుజరాత్ సీఎంగా ఉన్న నరేంద్ర మోదీని ఉరి తీయాలంటూ వ్యాఖ్యలు చేసిన చంద్రబాబు.. అనంతరం అదే మోదీతో కలిసి 2014లో ఎన్నికలకు వెళ్లారు. బీజేపీతో తెగతెంపులు చేసుకున్న తర్వాత మోదీని రాజకీయ ఉగ్రవాదిగా అభివర్ణించారు. కమలనాథులు ఈ విషయాలను అంత తేలిగ్గా ఎందుకు మరచిపోతారు? పైగా చంద్రబాబుకు శాశ్వతంగా తలుపులు మూసేశామని గత ఎన్నకల సమయంలోనే అమిత్ షా స్పష్టంచేశారు.

ప్రస్తుతం వారికి ఉన్న మెజార్టీ నేపథ్యంలో అసలు ఎవరి అవసరమూ కమలనాథులకు లేదు. తాజాగా ఇదే విషయాన్ని బీజేపీ ఏపీ వ్యవహారాల ఇన్ చార్జి సునీల్ దేవ్ దార్ స్పష్టంగా చెప్పారు. చంద్రబాబుతో తాము కలిసే ప్రసక్తే లేదన్నారు. బోలెడు అవినీతి కేసుల్లో బాబు పీకలదాకా కూరుకపోయారని, ఆయనతో జట్టు కట్టాల్సిన అవసరం లేదని సునీల్ ఉద్ఘాటించారు. ఈ నేపథ్యంలో బాబు ప్రయత్నాలు ఎంతవరకు ఫలిస్తాయో చూడాలి.