బిగ్‌ క్వశ్చన్‌: బీజేపీ పతనం మొదలైందా.?

దేశంలో బీజేపీ తప్ప, ఇంకో పార్టీ ఏదన్నా సమీప భవిష్యత్తులో అధికారంలోకి వచ్చేంత స్థాయిలో ‘బలం’ పుంజుకునే పరిస్థితి వుందా.? ఈ ప్రశ్నకు చిన్న పిల్లాడినడిగినా సమాధానం ఒకటే వస్తుంది.. ‘లేదు’ అని.! ప్రస్తుతం పొలిటికల్‌ ఈక్వేషన్స్‌ అలా వున్నాయి. అయితే, రాజకీయాల్లో ఈక్వేషన్స్‌ ఎప్పుడైనా మారిపోవచ్చు. ‘అధికారం’ తలకెక్కించుకుని, విర్రవీగితే.. ఎంతటి బలవంతులైనా, చరిత్ర హీనులుగా మిగిలిపోయారనడానికి చాలా ఉదాహరణలు కనిపిస్తాయన్నది వేరే చర్చ.

విపక్షాల అనైక్యతే, ప్రస్తుతానికి బీజేపీ బలం. కాంగ్రెస్‌ పార్టీ.. తిరిగి పూర్వ వైభవం సంపాదించుకోవడం అంత తేలిక కాదు. ఇక, ప్రాంతీయ పార్టీల విషయానికొస్తే.. ఏ పార్టీకి ఆ పార్టీకే అంతర్గతంగా చాలా సమస్యలున్నాయి. కొన్ని రాష్ట్రాల్లో ప్రాంతీయ పార్టీలు ‘బలంగా’ వున్నట్లు కనిపిస్తున్నా.. ఆ పార్టీల్ని పీల్చి పిప్పి చేసే దిశగా బీజేపీ దగ్గర బీభత్సమైన వ్యూహాలున్నాయి.. ఈ వ్యూహాల్లో కొన్ని ఇప్పటికే సమర్థవంతంగా అమలయ్యాయి.. చాలా ప్రాంతీయ పార్టీలు కాలగర్భంలో కలిసిపోయే దుస్థితిని ఎదుర్కొంటున్నాయి. అలాంటివాటిల్లో టీడీపీ కూడా ఒకటి.

అయితే, దేశంలో ‘వేవ్‌’ మారుతోంది. బీజేపీకి వ్యతిరేకంగా గాలి వీస్తోంది. కానీ, ఆ బీజేపీ వ్యతిరేక గాలి.. ఇంకో వైపుకి వెళ్ళడానికే పరిస్థితులు అనుకూలంగా లేవు. అదే బీజేపీకి అడ్వాంటేజ్‌. త్వరలో బీహార్‌ ఎన్నికలు జరగనున్నాయి. పరిస్థితులేమో అక్కడ బీజేపీకి వ్యతిరేకంగా కనిపిస్తున్నాయి. వివిధ రాష్ట్రాల్లో ఉప ఎన్నికలూ జరగనున్నాయి ముందు ముందు. వాటిల్లోనూ బీజేపీకి షాక్‌ల మీద షాక్‌లు తప్పకపోవచ్చు.

కరోనా వైఫల్యాల్ని, చైనాతో యుద్ధమంటూ.. పక్కదారి పట్టిస్తోంది మోడీ సర్కార్‌. వ్యవసాయ రంగంలో కొత్త చట్టాలంటూ మోడీ సర్కార్‌ అభాసుపాలవుతోంది. నేషనల్‌ మీడియా ఎంతగా మేనేజ్‌ చేస్తున్నా.. రైతుల ఆందోళనలు మాత్రం, బీజేపీ రాజకీయ వ్యూహాల్ని తిప్పి కొట్టేస్తున్నాయి. ఎలా చూసుకున్నా.. రానున్న కాలం బీజేపీకి అత్యంత కష్ట కాలమేనన్నది రాజకీయ విశ్లేషకుల అభిప్రాయం.

మిత్రపక్షాలేవీ బీజేపీని మళ్ళీ ఇదివరకటిలా నమ్మే పరిస్థితి లేదు. బీజేపీ పంచన చేరే కొత్త మిత్రులూ కనిపించడంలేదు. సో, రెండోసారి అధికారంలోకి వచ్చాక.. బీజేపీ తిరోగమనం వైపు రాజకీయంగా అడుగులేస్తోందని అనుకోవాలేమో.! దానర్థం రాజకీయంగా బీజేపీ పతనం మొదలైనట్లేనా.?