బాబుపై ఏసీబీ కేసు.. వాట్ నెక్స్ట్?

ఎన్నికల్లో పరాజయం తర్వాత అనేక రకాలుగా ఇబ్బందులు ఎదుర్కొంటున్న తెలుగుదేశం పార్టీ అధినేత చంద్రబాబుకు ఏసీబీ కోర్టు రూపంలో మరో షాక్ తగిలింది. ఎప్పుడో 14 ఏళ్ల క్రితం ఆయనపై నమోదైన ఆదాయానికి మంచిన ఆస్తుల కేసులో విచారణ జరపనున్నట్టు ప్రకటించింది. ఈ కేసులో ఫిర్యాదుదారుగా ఉన్న వైఎస్సార్ సీపీ నాయకురాలు లక్ష్మీపార్వతి సాక్ష్యం నమోదు చేస్తామని పేర్కొంది.

ఈనెల 25న ఆమెను కోర్టుకు రావాలని సూచించింది. బాబును ఎలాగైనా జైలుకు పంపించాలనే లక్ష్యంతో ఉన్న వైఎస్సార్ సీపీకి ఈ పరిణామం సహజంగానే ఆనందం కలిగించింది. ఈ కేసులో చంద్రబాబుకు చిక్కులు తప్పవని ఆ పార్టీ నేతలు భావిస్తున్నారు. ఏపీలో వైఎస్సార్ సీపీ అధినేత వైఎస్ జగన్ మోహన్ రెడ్డి అధికారం చేపట్టిన వెంటనే గత ప్రభుత్వంలో చోటుచేసుకున్న అవినీతి వ్యవహారాలపై దృష్టి సారించిన సంగతి తెలిసిందే.

బాబును జైలుకు పంపించడమే లక్ష్యంగా తవ్వకాలు సాగుతున్నాయి. ఆయా వ్యవహారాలకు సంబంధించి 45 రోజుల్లో నివేదిక ఇవ్వాలని అప్పట్లో జగన్ ఆదేశించారు. కానీ ప్రభుత్వం ఏర్పడి దాదాపు ఆరు నెలలు అవుతున్నా ఏ విషయంలోనూ తమకు అనుకూలమైన అంశాలు అధికార పార్టీకి దొరకలేదు. సరిగ్గా ఇదే సమయంలో 14 ఏళ్ల క్రితం కేసు తెర పైకి వచ్చింది.

చంద్రబాబుకు ఆదాయానికి మించిన ఆస్తులు ఉన్నాయంటూ లక్ష్మీపార్వతి ఏసీబీ కోర్టులో ఫిర్యాదు చేశారు. దానిపై విచారణ జరగకుండా చంద్రబాబు హైకోర్టుకు వెళ్లి స్టే తెచ్చుకన్నారు. అది అప్పటి నుంచి అలాగే ఉండిపోయింది. ఇటీవల సుప్రీంకోర్టు ఇలాంటి కేసుల విషయంలో స్పష్టమైన తీర్పు వెలువరించింది. రాజకీయ నేతలపై దాఖలైన సివిల్, క్రిమినల్ కేసుల విషయంలో ఆరు నెలలకు మించి స్టే ఉండరాదని ఆదేశించింది.

ఈ తీర్పుతో చంద్రబాబు తెచ్చుకున్న స్టే ఆటోమేటిగ్గా తొలగిపోవడం.. మళ్లీ హైకోర్టు దానిని పొడిగించకపోవడంతో ఏసీబీ కోర్టు దీనిపై దృష్టి సారించి విచారణ ప్రారంభించింది. అయితే, ఈ కేసు విచారణ వల్ల బాబుకు ఏమైనా ఇబ్బంది తప్పదా అనే అంశంపై భిన్నాభిప్రాయాలు వినిపిస్తున్నాయి.

బాబును జైలుకు పంపడం అంత సులభం కాదని ఎక్కువమంది అభిప్రాయపడుతున్నారు. నేరుగా ఆధారాలు దొరికిన ఓటుకు నోటు కేసు ఏమైందో అందరికీ తెలిసిన విషయమేనని, అలాంటిది ఎప్పుడో 14 ఏళ్ల నాటి ఈ కేసులో సాక్ష్యాధారాలు నిరూపించడం అంత సులభం కాదని అంటున్నారు. మరోవైపు సరైన సమయానికి లభించిన ఈ అవకాశాన్ని ఎలాగైనా వినియోగించుకోవాలనే భావనతో అధికార పార్టీ కదులుతోందని తెలుస్తోంది. ఈ విషయంలో ఎవరిది పైచేయి అవుతుందో తెలియాలంటే కొంతకాలం వేచి చూడక తప్పదు.