పైశాచికానందం.. సాయిధరమ్ తేజ్‌కి అలా జరిగి వుంటే.!

సినీ నటుడు సాయి ధరమ్ తేజ్ రోడ్డు ప్రమాదానికి గురైన వార్త అటు సినీ పరిశ్రమనీ, ఇటు ప్రేక్షకాభిమాల్నీ షాక్‌కి గురిచేసింది. ‘ఖరీదైన బైక్‌ల మీద అత్యంత వేగంగా వెళ్ళి ప్రాణాల మీదకు తెచ్చుకోవడమేంటి.?’ అన్న ప్రశ్నే అందరి మదిలోనూ ముందుగా మెదిలింది. కారణం, చాలామంది ప్రముఖుల వారసులు, ఇలాగే రోడ్డు ప్రమాదాలకు గురయ్యారు. కొందరు ప్రాణాలు కోల్పోయి, కన్నవారికి కడుపు కోత మిగిల్చారు.

ఇక, సాయిధరమ్ తేజ్ విషయానికొస్తే, ప్రస్తుతం ఆయన ఆరోగ్య పరిస్థితి నిలకడగా వుంది. ఇంకోపక్క, రోడ్డు ప్రమాదం ఎలా జరిగిందన్నదానిపై మీడియాలో చిత్ర విచిత్రమైన విశ్లేషణలు కనిపిస్తున్నాయి. ప్రమాదం జరిగిన కొద్ది గంటల్లోనే సీసీటీవీ ఫుటేజ్ బయటకు వచ్చేసింది. ఆ సమయంలో కాస్త వేగంగానే బైక్ మీద సాయి ధరమ్ తేజ్ వెళుతూ ప్రమాదానికి గురైనట్లు అందులో కనిపిస్తోంది. అది ఎంత వేగం.? అన్నదానిపై అధికారిక ప్రకటన పోలీసుల నుంచి రావాల్సి వుంది.

కానీ, గంటకు 120 కిలోమీటర్ల వేగంతో వెళుతున్న బైక్.. అని కొన్ని న్యూస్ ఛానళ్ళు ధృవీకరించేశాయి. మరోపక్క, ‘ఇలా జరిగి వుంటే, ప్రాణాలు దక్కడం చాలా కష్టం..’ అంటూ విశ్లేషణలు షురూ అయ్యాయి. ‘సాయిధరమ్ తేజ్ ప్రాణం గట్టిదే..’ అంటూ వెటకారాలూ షురూ అయ్యాయి. సోషల్ మీడియాలో కొందరు నెటిజన్లు ‘రెస్ట్ ఇన్ పీస్’ అని ముందుగానే పెట్టేశారు. బాధిత కుటుంబానికి ఇవన్నీ ఈ సమయంలో ఎంత ఆవేదన కలిగిస్తాయి.? అన్న కనీస ఇంగితం వుంటే, అసలిలాంటి కామెంట్లే రావు. కొందరిలో పెరిగిపోతున్న పైశాచిక ఆలోచనలకు నిదర్శనమిది.

మీడియాలోనూ ఆ పైశాచికానందం చాలా ఎక్కువగానే పెరిగిపోయింది ఇటీవలి కాలంలో. తీవ్ర గాయాలతో ఆసుపత్రిలో చికిత్స పొందుతున్న వ్యక్తి.. సెలబ్రిటీనే అయి వుండొచ్చు, కానీ, ఆయన కుటుంబాన్ని ఈ సమయంలో ఇంతలా వేధించడమా.? ప్రధానంగా యెల్లో మీడియా, బ్లూ మీడియా.. సాయిధరమ్ తేజ్ రోడ్డు ప్రమాదానికి గురి కావడంపై అత్యుత్సాహపూరిత కథనాల్ని, కల్పనలు జోడించి మరీ ప్రసారం చేసేశాయి. ఈ వ్యవహారంపై సోషల్ మీడియా వేదికగా మెగాభిమానులే కాదు, సగటు సినీ అభిమానులు తీవ్రంగా స్పందిస్తున్నారు.