ఈటలకు తప్పిన ముప్పు

బీజేపీలో చేరిన మాజీ మంత్రి ఈటల రాజేందర్ కు పెద్ద ప్రమాదం ముప్పు తప్పింది. ఆయన ప్రయాణిస్తున్న విమానంలో సాంకేతిక సమస్య తలెత్తింది. అయితే, ఈ విషయాన్ని పైలట్ ముందుగానే గుర్తించడంతో ఈటల పెను ముప్పు నుంచి తప్పించుకున్నారు. మంత్రివర్గం నుంచి బర్తరఫ్ చేసిన తర్వాత ఈటల బీజేపీలో చేరాలని నిర్ణయించుకున్న సంగతి తెలిసిందే. ఈ నేపథ్యంలో ఆయన సోమవారం ప్రత్యేక విమానంలో ఢిల్లీ వెళ్లి కేంద్ర మంత్రి ధర్మేంద్ర ప్రధాన్, పార్టీ రాష్ట్ర వ్యవహారాల ఇన్ చార్జి తరుణ్ చుగ్ సమక్షంలో బీజేపీలో చేరారు. అనంతరం తనతోపాటు బీజేపీలో చేరిన మాజీ ఎంపీ రమేశ్ రాథోడ్, మాజీ ఎమ్మెల్యే ఏనుగు రవీందర్ రెడ్డి తదితరులతో ప్రత్యేక విమానంలో తిరుగు ప్రయాణమయ్యారు. విమానం టేకాఫ్ అయ్యే సమయంలో సాంకేతిక సమస్య తలెత్తిన విషయాన్ని పైలట్ గుర్తించి వెంటనే అప్రమత్తమయ్యారు. అనంతరం టేకాఫ్ తీసుకోవడంతో అందరూ ఊపిరి పీల్చుకున్నారు.