నా తల్లిదండ్రులు బతికుంటే నా హృదయం ముక్కలయ్యేది..

కరోనా లాక్ డౌన్ సమయంలో ఎంతో మందికి ఆపన్నహస్తం అందిస్తూ అండగా నిలుస్తున్న రియల్ హీరో సోనూసూద్.. ప్రస్తుత పరిస్థితులు చూసి తీవ్ర భావోద్వేగానికి లోనయ్యారు. ఇలాంటి క్లిష్టపరిస్థితుల్లో తన తల్లిదండ్రులు బతికి ఉంటే తన హృదయం ముక్కలయ్యేదని పేర్కొన్నారు. కరోనా సెకండ్ వేవ్ కారణంగా దేశంలో దుర్భర పరిస్థితులు నెలకొన్నాయని ఆవేదన వ్యక్తంచేశారు. ఆస్పత్రుల్లో పడకలు దొరక్క.. ప్రాణవాయువు అందక ప్రజలు పడుతున్న ఇబ్బందులు తనను ఎంతో ఆవేదనకు గురిచేస్తున్నాయని చెప్పారు. ‘తమ కుటుంబ సభ్యుల్ని, ఆప్తుల్ని, ప్రియమైన వారిని కోల్పోయి రోజూ ఎంతోమంది కన్నీరుమున్నీరు అవుతున్నారు.

ఈ పరిస్థితులన్నీ చూశాక నా తల్లిదండ్రులు సరైన సమయంలోనే కన్నుమూశారని అనిపిస్తోంది. ఒకవేళ వారే కనుక ఇప్పుడు బతికి ఉండి ఉంటే.. ఆరోగ్యపరంగా ఏమైనా ఇబ్బందులు ఎదురైతే.. ఆస్పత్రుల్లో పడకలు దొరక్క.. ఆక్సిజన్ అందక వారు పడే ఇబ్బంది చూసి నా హృదయం ముక్కలయ్యేది’ అని పేర్కొన్నారు. లాక్ డౌన్ కారణంగా వలస కార్మికులకు తనకు చేతనైనంత సాయం అందించినట్టు చెప్పారు. అసలైన సంతోషమంటే ఏమిటో దానివల్లే తెలిసి వచ్చిందన్నారు. ఇప్పటికైనా రాజకీయ నాయకులంతా ఒకరిపై మరొకరు బురల చల్లుకోవడం మాని ఐక్యంగా ప్రజలకు సాయం చేయాలని సోనూ సూద్  పిలుపునిచ్చారు.