కరోనా టెర్రర్: ఈ సూపర్ స్పెడర్స్ వల్లే ఇంతటి పెను విషాదం.!

దేశంలో ఏ వ్యక్తిని కదిలించినా కనీసం తనకు తెలిసినవారిలో నలుగురి నుంచి ఎనిమిది మంది వరకు సన్నిహితులనో, కుటుంబ సభ్యులనో కోల్పోతున్నాడట కరోనా కారణంగా.. ఇది ఓ అధ్యయన సారాంశం మాత్రమే కాదు, చాలామందికి అనుభవమవుతోన్న విషయమే. కరోనా ఎంత తీవ్ర ప్రభావం చూపుతుందో చెప్పడానికి ఇంతకన్నా నిదర్శనం ఇంకేం కావాలి.? మామూలుగా అయితే, సన్నిహితుల్ని కోల్పోతున్నారు గనుక.. ప్రతి ఒక్కరూ బాధ్యతగా మెలగాలి. కానీ, అంత ‘బుద్ధి’ వుంటే ఇంత కష్టమెందుకు వచ్చిపడుతుంది.?

తెలంగాణలో లాక్ డౌన్ పకడ్బందీగా అమలవుతోంది.. అదీ ఉదయం ఉదయం 10 గంటల నుంచి మరుసటి రోజు ఉదయం 6 గంటల వరకు. మిగిలిన నాలుగు గంటల సమయంలోనే కాస్తంత వెసులుబాటు.. బయకు వెళ్ళి నిత్యావసర వస్తువుల్ని, కూరగాయలు, పళ్ళు.. వంటివాటిని కొనుగోలు చేసేందుకోసం. అత్యవసరమైతే అలాంటివారి కోసం ఈ-పాసులు జారీ చేస్తోంది తెలంగాణ ప్రభుత్వం. కానీ, అవి దుర్వినియోగమవుతున్నాయి.

మరోపక్క, మీడియా అనీ, ఆసుపత్రి సిబ్బంది అనీ.. ఇంకోటనీ కారణాలు చూపుతూ, జనం నిర్లజ్జగా రోడ్ల మీద తిరిగేస్తున్నారు.. కరోనా వ్యాప్తికి కారణమవుతున్నారు. 6 నుంచి 10 గంటల వరకు వెసులుబాటు అంటే.. ఆ సమయంలో జాతరను తలపించేస్తున్నాయి రోడ్లు. మరీ ఇంత దారుణమా.? ఇంతే కాదు, ఇంకా చాలా వుంది. కరోనా సోకితే, ఐసోలేషన్ చేసుకోవాల్సిన కొందరు, సొంతూళ్ళకు పయనమవుతున్నారు.. తమకు కరోనా సోకిన విషయాన్ని దాచిపెడుతూ.

మార్గమధ్యంలో చాలామందికి కరోనా అంటించేస్తున్నారు ఇలాంటివాళ్ళంతా. వెరసి, కరోనా వ్యాప్తి కోసం చాలా తీవ్రంగా కృషి చేస్తున్నారన్నమాట ఈ సూపర్ స్ప్రెడర్స్. మొదటి వేవ్ కంటే బీభత్సంగా రెండో వేవ్ వుండటానికి కారణం ఇదే. గ్రామాల్లోకి కరోనా చొచ్చుకుపోవడానికి కూడా ఈ సూపర్ స్ప్రెడర్స్ కారణమన్న భావన వైద్య నిపుణుల నుంచి వ్యక్తమవుతోంది.

తమ జీవితాల్ని పణంగా పెట్టి.. తమ కుటుంబాలు ప్రమాదంలోకి నెట్టివేయబడతాయన్న భయాన్ని పక్కన పెట్టి.. పోలీసులు, రోడ్ల మీద కష్టపడుతున్నారు. అలాంటివారికోసమైనా ప్రజలు బాధ్యతగా వ్యవహరిస్తే, కరోనా త్వరగా అంతమవుతుంది. కానీ, అంత బాధ్యతని సూపర్ స్ప్రెడర్స్ నుంచి ఆశించలేం. దీన్ని కరోనా తీవ్రవాదం.. అనడం సబబేమో.