బీజేపీ, టీడీపీ, వైసీపీ.. ఎవరి ట్రాప్‌లో ఎవరు పడ్డారు.!

రాష్ట్రంలో హిందూ దేవాలయాలపై దాడులకు సంబంధించి ప్రధాన రాజకీయ పార్టీల మధ్య మాటల యుద్ధం జరుగుతోంది. బీజేపీ, తెలుగుదేశం పార్టీ, వైఎస్సార్‌ కాంగ్రెస్‌ పార్టీ.. ఒకరి మీద ఒకరు దుమ్మెత్తిపోసుకుంటోన్న విషయం విదితమే. ఈ వివాదానికి సంబంధించి బీజేపీ – జనసేన మిత్రపక్షాలు కావడంతో, రెండు పార్టీలూ ఓ కార్యాచరణ ప్రకారం ముందడుగు వేస్తున్నాయి.. ప్రభుత్వంపై ఒత్తిడి తీసుకొస్తున్నాయి. జనసేన మీద వైసీపీ విమర్శలు చూశాం. ఇప్పుడు బీజేపీ మీద వైసీపీ విమర్శలు చేస్తున్నాం.

అయితే, చంద్రబాబు మీదా.. పవన్‌ కళ్యాణ్‌ మీద రెచ్చిపోయే చాలామంది వైసీపీ నేతలు, ఇప్పుడు సైలెంటయిపోయారు. కొడాలి నాని, వెల్లంపల్లి శ్రీనివాస్‌ తదితర కొందరు ‘సెలక్టివ్‌ నేతలు’ మాత్రమే అత్యుత్సాహం చూపుతున్నారు. ఇదిలా వుంటే, బీజేపీ నేతలు టీడీపీ ట్రాప్‌లో పడ్డారంటూ వైసీపీ ఆరోపిస్తోంది. వైసీపీ నేతలేమో, బీజేపీ నేతలు టీడీపీ ట్రాప్‌లో పడ్డారని విమర్శిస్తుండడం గమనార్హం.

బీజేపీ వాదన ఇంకోలా వుంది. టీడీపీ ట్రాప్‌లో వైసీపీ పడిందన్నది బీజేపీ ఆరోపణ. ఎవరి ట్రాప్‌లో ఎవరు పడ్డారు.? అన్న విషయాన్ని పక్కన పెడితే, రాష్ట్రంలో మాత్రం ఓ పద్ధతి ప్రకారం హిందూ మతంపై దాడి జరుగుతోందన్నది నిర్వివాదాంశం. వరుసగా హిందూ దేవాలయాలపై దాడులు జరుగుతున్నాయి. దేవతా మూర్తుల విగ్రహాలపై దాడులు కొనసాగుతున్నాయి. అయినాగానీ, ప్రభుత్వం, అధికార పార్టీ స్పందించాల్సిన స్థాయిలో స్పందించడంలేదు.

తూర్పుగోదావరి జిల్లాలో ఓ చర్చికి సంబంధించిన విగ్రహాలు ధ్వంసమైతే, ‘ఇది అసాంఘీక శక్తుల కుట్ర’ అని వైసీపీ నేత ఒకరు ఆరోపించారు. మరి, అంతర్వేది రధం దగ్ధం కేసులో ‘తేనె తుట్టె’ కథ ఎలా తెరపైకొచ్చింది.? బిట్రగుంటలో ఓ రధం దగ్ధమైతే ‘ఆకతాయి పని’ అంటూ అధికార పార్టీ నేతలు ఎలా మాట్లాడగలిగారు.? పిఠాపురంలోని ప్రముఖ దేవాలయంలో దేవతా మూర్తుల విగ్రహాల్ని దుండగులు ధ్వంసం చేస్తే, ‘ఆకతాయిల పని’ అని ఎలా వైసీపీ కొట్టి పారేయగలిగింది.?

చర్చికి సంబంధించిన ఘటనలేమో అసాంఘీక శక్తుల కుట్రల కారణంగా జరిగినట్లు.. హిందూ దేవాలయాల విషయానికొస్తే మాత్రం ఆకతాయిల పనులని అధికార పార్టీ ఎలా చెప్పగలుగుతోంది.? తొలుత అధికార పార్టీ నేతలు ఏ ట్రాప్‌లో పడ్డారో తేల్చుకుని, హిందూ మతంపై జరుగుతున్న దాడులపై విశ్లేషించుకుని.. ఆ తర్వాత ఇతర పార్టీల గురించి మాట్లాడితే మంచిదేమో.!