నాని వ్యాఖ్యలు బాబు పైనేనా?

విజయవాడ ఎంపీ కేశినేని నాని అప్పుడప్పుడూ వివాదాస్పద కామెంట్లతో వార్తల్లో నిలుస్తుంటారు. ట్విట్టర్ లో యాక్టివ్ గా ఉండే ఆయన.. అటు వైరి పక్షాలతోపాటు ఇటు స్వపక్ష నేతలపైనా విమర్శలు చేస్తుంటారు. తాజాగా ఆయన ట్విట్టర్ లో చేసిన కామెంట్ కలకలం రేపుతోంది.

‘మన కలలు మనమే సాకారం చేసుకోవాలి. మన కలలు ఎదుటివారు సాకారం చేయాలని కోరుకోవడం అవివేకం. అమరావతి ఈ రాష్ట్ర భవిష్యత్తు కోసం కన్న కల. అది సాకారం అవ్వాలంటే 2024లో టీడీపీ అధికారంలోకి రావాలి. ఆ దిశగా పార్టీలో అందరూ పాటుపడాలి. మీడియా సమావేశాల వల్ల, పేపర్ స్టేట్ మెంట్స్ వల్ల ప్రయోజనం లేదు‘ అని చేసిన ట్వీట్ ఎవరిని ఉద్దేశించిందో అంటూ జోరుగా చర్చ జరుగుతోంది. అది పార్టీ అధినేత చంద్రబాబును నేరుగా ఉద్దేశించి చేసిందే అని పలువురు అభిప్రాయపడుతున్నారు.

మన కలలు మనమే సాకారం చేసుకోవాలి మన కలలు ఎదుటి వారు సాకారం చేయాలని కోరుకోవడం అవివేకం అమరావతి @ncbn ఈ రాష్ట్ర భవిష్యత్తు కోసం కన్న కల అది సాకారం అవ్వాలంటే 2024 లో @JaiTDP అధికారంలోకి రావాలి ఆ దిశగా పార్టీలో అందరూ పాటుపడాలి మీడియా సమావేశాల వల్ల పేపర్ స్టేట్మెంట్స్ వల్ల ప్రయోజనం లేదు

— Kesineni Nani (@kesineni_nani) August 6, 2020

అమరావతిని శాసన రాజధానిగా పరిమితం చేసి, కార్యనిర్వాహక రాజధానిగా విశాఖను చేయాలనే పట్టుదలతో అధికార పార్టీ ముందుకెళుతున్న సంగతి తెలిసిందే. దీనిపై అమరావతిలో నిరసనలు వ్యక్తమవుతున్నా.. వైసీపీ మాత్రం వెనక్కి తగ్గడంలేదు. ఇక టీడీపీ అధినేత చంద్రబాబు ప్రభుత్వానికి 48 గంటల డెడ్ లైన్ విధిస్తున్నామని హెచ్చరికలు జారీచేసి చివరకు చేతులెత్తేశారు. దమ్ముంటే అసెంబ్లీ రద్దు చేసి ఎన్నికలకు వెళ్లాలని వైసీపీకి సవాల్ చేస్తున్నారు.

నిజానికి తమ పార్టీకి చెందిన ఎమ్మెల్యేల చేత రాజీనామా చేయించాలని భావించినట్టు తొలుత వార్తలొచ్చినా.. ఆ ప్రయత్నం విరమించుకున్నారు. గతంలో తెలంగాణ ఉద్యమ సమయంలో టీఆర్ఎస్ పలుమార్లు తమ ఎమ్మెల్యేల చేత రాజీనామా చేయించి ప్రజల్లోకి వెళ్లింది. ఇప్పుడు అదే విధంగా టీడీపీ చేసే అవకాశం ఉన్నా.. బాబు మాత్రం అందుకు సాహసించడంలేదు.

జూమ్ మీటింగుల ద్వారా సవాళ్లు, విమర్శలు చేయడం తప్ప.. సరైన కార్యాచరణకు దిగడంలేదనే అభిప్రాయాలు వినిపిస్తున్నాయి. ఈ నేపథ్యంలోనే నాని చేసిన ట్వీట్ ఆసక్తికరంగా మారింది. గతంలో కూడా కేశినేని నాని సొంత పార్టీ నేతలపై పలు విమర్శలు చేశారు. అయితే, చంద్రబాబు రంగంలోకి దిగి బుజ్జగించడంతో అప్పట్లో సద్దుమణిగింది. తాజాగా నాని మరోసారి సొంత పార్టీపైనే విమర్శలు ఎక్కుపెట్టడం చర్చనీయాంశమైంది.