అక్రమ సంబంధం.. ఒక కుటుంబాన్నే పొట్టన పెట్టుకుంది

అక్రమ సంబంధాలు సమాజానికి ఎంత చేటు చేస్తాయో తెలపడానికి మరొక ఉదాహరణ ఇది. అక్రమ సంబంధం మత్తులో పడి తనను మోసం చేస్తోందన్న విషయాన్ని తెలుసుకోలేక మొత్తం కుటుంబాన్నే హత్య చేయించాడు ఒక ప్రబుద్దుడు. ఇప్పుడు లబోదిబోమంటున్నా పోయినవారు తిరిగిరారు. చేసిన తప్పుకు ఊచలు లెక్కపెట్టాల్సిన పరిస్థితి. వివరాల్లోకి వెళితే.. ఉత్తరప్రదేశ్ రాష్ట్రంలోని ప్రయాగ్ రాజ్ ప్రీతమ్ నగర్ కు చెందిన అతీష్ ది చింతలేని కుటుంబం. తండ్రి తులసీదాస్ (65), తల్లి కిరణ్ (60), భార్య ప్రియాంక (22), సోదరి నిహారిక (37)లతో కలిసి జీవిస్తున్న అతీష్ ఉన్నట్లుండి, తన కుటుంబ సభ్యులు మరణించిన విషయాన్ని పోలీసులకు చేరవేసాడు.

పోలీసులు వివరాలు సేకరించి విచారణ ప్రారంభించగా అతీష్ సహకరించడానికి నిరాకరించాడు. ఇంటి సీసీటీవీ ఫుటేజ్ పనిచేయడం లేదని, వీడియో రికార్డుల పాస్ వార్డ్ ఇవ్వడానికి నిరాకరించడం వంటివి చేయడంతో అనుమానం వచ్చి పోలీసులు అతీష్ ను అదుపులోకి తీసుకుని విచారణ చేయగా నిజం బయటపెట్టాడు.

అతీష్ అదే ప్రాంతానికి చెందిన రంజనా శుక్లాతో అక్రమ సంబంధం పెట్టుకున్నాడు. అతని ఆస్తిపై కన్నేసిన రంజనా, తమకు అడ్డంగా అతీష్ కుటుంబం లేకుండా చేయాలని పథకం వేసి మాయమాటలతో అతీష్ ను ఒప్పించింది. దాంతో అతీష్ అనుజ్ శ్రీవాస్తవ అనే కిరాయి హంతకుడికి 8 లక్షల రూపాయలు ఇచ్చి తన కుటుంబం మొత్తాన్ని హత్య చేయించాడు. పోలీసులు అతీష్, రంజనా, అనుజ్, అతనికి సహకరించిన ఉమేంద్ర ద్వివేదిలను అదుపులోకి తీసుకున్నారు.