సడలింపులతో సమస్యలు తప్పవా?

దేశంలో కరోనా వైరస్ నిరోధానికి విధించిన లాక్ డౌన్ కొనసాగుతోంది. అయినా వైరస్ వ్యాప్తికి మాత్రం అడ్డుకట్ట పడలేదు. రోజురోజుకూ కేసులు, మరణాలు పెరుగుతూనే ఉన్నాయి. ఈ నేపథ్యంలో కేంద్రం కొన్ని సడలింపులు ప్రకటించింది. వలస కూలీల పాట్లు చూసిన తర్వాత వారికి ఉపాధి కల్పించే ఉద్దేశంతోనూ, ఆర్థిక వ్యవస్థను కాపాడే క్రమంలోనూ ఈ మేరకు వెసులుబాట్లు కల్పించింది. రాష్ట్రాలు వీటిపై తగిన నిర్ణయం తీసుకోవచ్చని పేర్కొంది. దీంతో పలు అంశాల్లో రాష్ట్రాలు కూడా సడలింపులు ఇస్తున్నాయి.

నిజం చెప్పాలంటే ఖాళీ కడుపులను నింపలేక సతమతమవుతున్న సర్కారులు.. ఈ విధంగానైనా వారికి ఉపాధి కల్పించాలని చూస్తున్నాయి. కానీ దానివల్ల తలెత్తే పరిణామాలను మాత్రం అంచనా వేయలేకపోతున్నాయి. లాక్ డౌన్ ఉంటేనే ఇబ్బడిముబ్బడిగా కరోనా కేసులు పెరుగుతున్న తరుణంలో దానిని ఎత్తేసినా.. సడలింపులు ఇచ్చినా పరిస్థితి మరీ భయంకరంగా మారుతుందని నిపుణులు హెచ్చరికలు చేస్తున్నారు.

కష్టమో, నష్టమో ప్రజల ఆరోగ్యం కంటే ఏదీ ఎక్కువ కానందున మరికొంతకాలం సడలింపులు లేని లాక్ డౌన్ అమలు చేయాలని సూచిస్తున్నారు. కరోనా విషయంలో ప్రపంచ దేశాలను తప్పుదోవ పట్టించిన ప్రపంచ ఆరోగ్య సంస్థ కూడా లాక్ డౌన్ ఎత్తివేయొద్దు మొర్రో అని మొరపెట్టుకుంటోంది. ఈ పరిస్థితుల్లో లాక్ డౌన్ ఎత్తివేస్తే ఇప్పటివరకు పడ్డ శ్రమంతా బూడిదలో పోసిన పన్నీరేనని చెబుతోంది.

ఆంక్షలు ఎత్తివేసినా, సడలింపులు ఇచ్చినా అగ్రరాజ్యం అమెరికా మరింత కుదేలు కావడం తాజాగా పరిశోధకులు హెచ్చరించారు. అలా చేస్తే ఆగస్టు నాటికి అక్కడ మరణాలు రెట్టింపు అయ్యే ప్రమాదం ఉందని పేర్కొన్నారు. ఇప్పటివరకు అమెరికాలో దాదాపు 12 లక్షల మందికి కరోనా సోకగా.. సుమారు 70 వేల మంది మృత్యువాత పడ్డారు.

అక్కడ ప్రస్తుతం అమల్లో ఉన్న ఆంక్షలు ఈనెల రెండో వారంతో ముగియనున్నాయి. ఈ వేసవిలో వైరస్ మరింత విజృంభించే ప్రమాదం ఉందని, అదే సమయంలో ఆంక్షలు ఎత్తివేస్తే ఫలితం దారుణంగా ఉంటుందని వాషింగ్టన్ కు చెందిన హెల్త్ మెట్రిక్స్ ఎవాల్యుయేషన్ హెచ్చరించింది. ఆగస్టు నాటికి ఏకంగా లక్షా 40వేల మంది చనిపోయే అవకాశం ఉందని పేర్కొంది. ఈ నేపథ్యంలో అమెరికాలోనే కాదు.. వైరస్ విజృంభిస్తున్న భారత్ వంటి దేశాల్లో సైతం అత్యంత జాగ్రత్తతో ఉండాలని నిపుణులు స్పష్టంచేస్తున్నారు. సడలింపులు ఇచ్చే విషయంలో ఒకటికి రెండుసార్లు ఆలోచించాలని చెబుతున్నారు.