మోడీ మాటలు.. ‘లాక్‌డౌన్‌’ ఎత్తివేతకు సంకేతాలా.?

‘లాక్‌డౌన్‌’ అంటే ఆషామాషీ వ్యవహారం కాదని ఆర్థిక రంగ నిపుణులు నెత్తీ నోరూ బాదుకుంటున్నారు. కానీ, కరోనా వైరస్‌ని కట్టడి చేయాలంటే ‘లాక్‌డౌన్‌’ తప్ప ఇంకో మార్గం లేదు. ‘లాక్‌డౌన్‌’కి ససేమిరా అనడంతోనే అగ్రరాజ్యం అమెరికా ఇప్పుడు వేలాది మంది ప్రజల ప్రాణాల్ని బలిపెట్టాల్సి వచ్చింది కరోనా వైరస్‌కి.

అగ్రరాజ్యమే ఈ స్థాయిలో విలవిల్లాడుతోంటే, భారతదేశం పరిస్థితేంటి.? అదృష్టవశాత్తూ దేశంలో కాస్త లేటుగానే అయినా ‘లాక్‌డౌన్‌’ నిర్ణయం అమల్లోకి వచ్చింది. దాంతో, కోనా వైరస్‌ ప్రస్తుతానికి అదుపులో వుంది. కానీ, ఎన్నాళ్ళు.? కరోనా వైరస్‌కి వ్యాక్సిన్‌ అందుబాటులోకి రావాలంటే సుమారు ఏడాదిన్నర సమయం పడుతుందని నిపుణులు అంచనా వేస్తున్నారు. అప్పటిదాకా మన దేశంలో లాక్‌డౌన్‌ని కొనసాగించలేం. ఈలోగా కరోనా వైరస్‌ని దేశం నుంచి పూర్తిగా తరిమేయగలమా.? అంటే, అదీ అనుమానమే.

ప్రస్తుతం నమోదవుతున్న కేసుల తీవ్రత చూస్తోంటే, ఇంకో రెండు మూడు నెలలు కష్ట కాలమే. కానీ, ఓ వైపు ప్రాణాలు కాపాడుకోవాలి.. ఇంకో వైపు ఆర్థికంగానూ నిలదొక్కుకోవాలి. లేకపోతే, దేశంలో ఆకలి చావులు.. అత్యంత భయంకరంగా వుంటాయని ఆర్థిక రంగ నిపుణులు హెచ్చరిస్తున్నారు.

నిజానికి కరోనా వైరస్‌తో చనిపోయినవారి సంగతెలా వున్నా, కరోనా లాక్‌డౌన్‌ కారణంగా ప్రాణాలు కోల్పోయినవారి సంఖ్య కూడా గణనీయంగానే కన్పిస్తోందన్న వాదన లేకపోలేదు. ఈ నేపథ్యంలో లాక్‌డౌన్‌ ఎక్కువ కాలం కొనసాగించడం కొత్త ప్రమాదాలకు కారణమవుతుంది. మెజార్టీ రాష్ట్రాలు లాక్‌డౌన్‌ని కొనసాగించాలనే కోరుతున్నా, ప్రధాని నోటా ‘జాన్‌ బీ.. జహాన్‌ బీ..’ అనే మాట ఈ రోజు విన్పించింది.

దానర్థం లాక్‌డౌన్‌ని దశల వారీగా ఎత్తివేయడానికి సుముఖంగా వున్నట్లేనని రాజకీయ విశ్లేషకులు అభిప్రాయపడుతున్నారు. అయితే దేశంలో ఇప్పటికే రెండు రాష్ట్రాలు ఏప్రిల్‌ నెలాఖరు వరకు లాక్‌డౌన్‌ని పొడిగిస్తున్నట్లు ప్రకటించేశాయి. తాజాగా తెలంగాణ కూడా ఈ లిస్ట్‌లో చేరిపోయింది. మరి, ప్రధాని నిర్ణయం ఎలా వుండబోతోంది.? వేచి చూడాల్సిందే.