స్టార్స్‌కు మానవత్వం లేదా అంటూ రోజా భర్త సంచలన కామెంట్స్‌

లాక్‌ డౌన్‌ కారణంగా సినిమా పరిశ్రమ కార్మికులు తీవ్ర అవస్థలు పడుతున్న విషయం తెల్సిందే. టాలీవుడ్‌ సినీ కార్మికుల కోసం చిరంజీవి ఆధ్వర్యంలో కరోనా క్రైసిస్‌ ఛారిటీ ఏర్పాటు చేసి సాయం చేస్తున్న విషయం తెల్సిందే. ఇదే విధంగా తమిళ సినీ పరిశ్రమకు చెందిన దక్షిణ భారత సినీ కార్మికుల సమాఖ్య ఆధ్వర్యంలో సినీ కార్మికులకు సాయం చేసేందుకు అధ్యక్షుడు ఆర్‌ కె సెల్వమణి విరాళాలను సేకరించేందుకు సిద్దం అయ్యారు. సినీ కార్మికుల కోసం ప్రతి ఒక్కరు సాయం చేయాంటూ ఆయన విజ్ఞప్తి చేశాడు.

ఇప్పటి వరకు దక్షిణ భారత సినీ కార్మికుల సమాఖ్య సభ్యుల నుండి నగదు, బియ్యం రూపంలో రెండు కోట్ల వరకు అందినట్లుగా ఆయన చెప్పుకొచ్చాడు. మొత్తం 25 వేల మంది ఈ సమాఖ్యలో సభ్యులుగా ఉన్నారు. వారిలో 18 వేలకు పైగా డైలీ రెమ్యూనరేషన్‌ బెసిస్‌తో వర్క్‌ చేసేవారే. వారంతా కూడా ఇప్పుడు తీవ్రమైన ఆర్థిక ఇబ్బందులతో బాధపడుతున్నారు. వారిని ఆదుకునేందుకు స్టార్స్‌ సాయం చేసేందుకు ముందుకు రావాలి. కాని ఇప్పటి వరకు కొద్ది మంది మాత్రమే సాయంకు ముందుకు వచ్చారు.

ఇంకా ఎంతో మంది స్టార్స్‌ సాయం చేసేందుకు ముందుకు రావడం లేదని అసహనం వ్యక్తం చేశాడు. స్టార్స్‌కు కనీస మానవత్వం లేకుండా పోయిందని.. ఈ సమయంలో తమ కోసం పని చేసే సినీ కార్మికులకు అండగా ఉండాల్సిన అవసరం ఉంది. వారి కడుపు నింపేందుకు సాయం చేసేందుకు ఎందుకు ముందుకు రావడం లేదు అంటూ ఆగ్రహం వ్యక్తం చేశాడు. సినీ కార్మికులకు ఇప్పటికే కుటుంబంకు 500 చొప్పున నగదు ఇవ్వడంతో పాటు 25 కేజీల బియ్యంను ఇచ్చినట్లుగా ఆయన పేర్కొన్నాడు.