అక్కీ.. అసలైన హీరో

పెద్ద మొత్తంలో డబ్బు ఉంటే కాదు.. నలుగురికీ సాయం చేయాలనే పెద్ద మనసు కూడా ఉండాలి. అలా సాయం చేసినవారు రీల్ లోనే కాదు రియల్ లైఫ్ లోనూ హీరోలనిపించుకుంటారు. ప్రపంచం చేత సలాం చేయించుకుంటారు. బాలీవుడ్ నటుడు అక్షయ్ కుమార్ కు ఇప్పుడు అందరూ జైకొడుతున్నారు. కరోనా సహాయ చర్యల కోసం ప్రధానమంత్రికి ఏకంగా రూ.25 కోట్ల మొత్తం విరాళంగా ప్రకటించారు. వ్యక్తుల్లో ఇంత పెద్ద మొత్తంలో విరాళం ఇచ్చింది అక్కీనే కావడం విశేషం. దీంతో ఆయనపై అందరూ ప్రశంసల జల్లు కురిపిస్తున్నారు.

క్లిష్ట సమయంలో పెద్ద మనసుతో స్పందించిన అక్షయ్ పట్ల విపరీతమైన అభిమానం ప్రదర్శిస్తున్నారు. ఈ నేపథ్యంలో అక్షయ్ భార్య ట్వింకిల్ ఖన్నా చేసిన ట్వీట్ మరింత వైరల్ గా మారింది. ఇంత పెద్ద మొత్తం ఇస్తున్నావు కదా.. కాస్త ఆలోచించుకో.. మనకు కూడా డబ్బు అవసరమే కదా అని ఆమె ప్రశ్నించిందట. నేను నా జీవితం మొదలుపెట్టినప్పుడు నాకు ఏమీ లేదు. అలాంటిది ఇప్పుడు ఈ పొజిషన్ లో ఉన్నాను. ఇప్పుడు ఏమీ లేనివారికి నేను ఇవ్వకపోతే ఎలా అని సమాధానమిచ్చాడట. ఈ విషయాన్ని ట్వింకిల్ ఖన్నాయే వెల్లడించింది.

బాలీవుడ్ హీరోల్లో సంపదపరంగా నాలుగో స్థానంలో ఉన్న అక్షయ్ ది పంజాబ్. ఆయన తండ్రి ఆర్మీ ఆఫీసర్. ప్రస్తుతం అక్షయ్ ఆస్తుల విలువ దాదాపు రూ.1100 కోట్లు. ఈ జాబితాలో దాదాపు రూ.5,250 కోట్ల ఆస్తులతో షారుక్ ఖాన్ ఉండగా.. తర్వాతి స్థానాల్లో అమితాబ్ బచ్చన్, సల్మాన్ ఖాన్ ఉన్నారు.