బిగ్‌ స్టోరీ: వెండితెరపై ముద్దుల పండగ.. ఇకపై వుండదా.?

కరోనా వైరస్‌ దెబ్బకి ప్రపంచం చాలా పాఠాలే నేర్చుకుంటోంది. షేక్‌ హ్యాండ్‌ వద్దు.. నమస్కారమే ముద్దు.. అని ఇప్పటికే ప్రపంచ దేశాలు స్పష్టం చేస్తున్నాయి. భారతీయ సంస్కృతీ సంప్రదాయాల గురించి ప్రపంచ వ్యాప్తంగా చర్చ జరుగుతోంది. మిగతా దేశాల సంగతి తర్వాత, మనం మర్చిపోయిన.. మన సంస్కృతీ సంప్రదాయాల్ని మనం కాపాడుకోగలమా.? వెండితెరపై లిప్‌ టు లిప్‌ కిస్‌ల సంగతేంటి.? షేక్‌ హ్యాండ్‌లు మాత్రమే కాదు, ఆలింగనాలు చేసేసుకుంటూ.. అదేదో ట్రెండీ కల్చర్‌ అనీ, నమస్కారం పెట్టడం నేరమనీ భావించిన సెలబ్రిటీలు ఇకపై ఏం చెబుతారు.? ఎలా వ్యవహరిస్తారు.? ‘కరోనా వైరస్‌ అనేది జీవితకాల సమస్య..’ అని కొందరు వైద్య నిపుణులు అభిప్రాయపడుతున్నారు.

సో, ఇకపై రీల్‌ లైఫ్‌లో ఈ ముద్దుల గోల వుండకపోవచ్చు.. అంటూ కొన్ని సినిమాల నుంచి లిప్‌ టు లిప్‌ కిస్‌ సన్నివేశాల తాలూకు ఫొటోల్ని, వీడియోల్ని జోడిస్తూ సోషల్‌ మీడియాలో కొందరు తమ అభిప్రాయాల్ని పంచుకుంటున్నారు. అసలంటూ సినిమాలో ముద్దు సీన్లు లేకపోతే అది సినిమానే కాదు.. అనే స్థాయికి సినిమాల్లో ఆ ట్రెండ్‌ని ఫాలో అవుతూ వస్తున్నారు చాలామంది దర్శక నిర్మాతలు. నిజానికి, ఈ వెండితెర ముద్దుల వ్యవహారం చాలా కాలం నుంచే వున్నా, అది ఇటీవల మరీ హద్దులు దాటేసింది. సో, ఇకపై ఇలాంటి పైత్యాలకు అవకాశమే వుండకపోవచ్చు.

‘అబ్బే, అంత తెలివి, జాగ్రత్త మనోళ్ళకి ఎక్కడుంది.? వైరస్‌ తీవ్రత పెరిగినా, జనం రోడ్ల మీద తిరగడం మానేయట్లేదు.. అలాంటిది ఈ హంగామా సద్దుమణిగాక ఆగుతారా.?’ అని ఇంకొందరు అభిప్రాయపడుతున్నారు. ది¸యేటర్లలో సినిమాలు ఆడటంలేదు, అసలు సినిమా షూటింగులే జరగడంలేదు.. కానీ, సినిమాల గురించి చాలా ముచ్చట్లు మాత్రం ప్రచారంలోకి వస్తూనే వున్నాయి. అన్నట్టు, పార్కులు మూతపడ్డంతో లవ్‌ బర్డ్స్‌కి కూడా చాలా ఇబ్బందులేర్పడుతున్నాయ్‌. ఇంట్లో బందీ అయిపోవడం ఒకింత కష్టంగానే వున్నా.. ప్రపంచం ఓ పద్ధతిగా నడుస్తున్నందుకు మెజార్టీ ప్రజానీకం ఆనంద పడుతున్నారండోయ్‌.