టీఆర్ఎస్ నుంచి రాజ్యసభకు వెళ్లేదెవరు?

తెలుగు రాష్ట్రాల్లో రాజ్యసభ ఎన్నికల కోలాహలం మొదలైంది. మార్చి 26న రాజ్యసభ ద్వైవార్షిక ఎన్నికలు జరగనున్నాయి. ఇందులో ఏపీ నుంచి నలుగురు, తెలంగాణ నుంచి ఇద్దరు పెద్దల సభకు ఎన్నికవుతారు. ఈ నేపథ్యంలో పలువురు ఆశావహులు తమ ప్రయత్నాలు తాము చేసుకుంటున్నారు. తెలంగాణ నుంచి ఈసారి గులాబీ బాస్ ఎవరికి అవకాశం ఇస్తారనే అంశంపై జోరుగా చర్చ జరుగుతోంది.

కేసీఆర్ ఆలోచనలు, అంచనాలు ఎవరికీ అర్థం కావు. ఈ నేపథ్యంలో పలు ఊహాగానాలు షికార్లు చేస్తున్నాయి. రేసులో కేసీఆర్ కుమార్తె కవితతోపాటు ప్రస్తుతం రాజ్యసభ సభ్యుడిగా ఉన్న కె.కేశవరావు, ఖమ్మం మాజీ ఎంపీ పొంగులేటి శ్రీనివాసరెడ్డి ఉన్నట్టు గట్టి ప్రచారం జరిగింది.

నిజామాబాద్ ఎంపీగా పోటీ చేసి ఓటమి చవిచూసిన కవిత.. అప్పటి నుంచి రాజకీయపరమైన కార్యక్రమాలకు దూరంగా ఉంటున్నారు. కుమారుడు కేటీఆర్ ను త్వరలోనే సీఎం చేసే అవకాశం ఉండటంతో అంతకంటే ముందుగానే కవితను రాజ్యసభకు పంపించాలని కేసీఆర్ నిర్ణయం తీసుకున్నట్టు వార్తొలొచ్చాయి. ఇక కేకే, పొంగులేటిల్లో ఒకరికి రాజ్యసభ సభ్యత్వం ఖాయమని ప్రచారం జరిగింది.

అయితే, తాజాగా మరో పేరు తెరపైకి వచ్చింది. నమస్తే తెలంగాణ ఎండీ దామోదరరావును రాజ్యసభకు పంపించే ఛాన్స్ ఉందని టీఆర్ఎస్ వర్గాల్లో టాక్ నడుస్తోంది. ఒక సీటు ఆయనకు ఖాయమని అంటున్నారు. ఇక రెండో సీటు ఎవరికి ఇస్తారనేది ఆసక్తికరంగా మారింది. కేకేకి మరోసారి అవకాశం ఇస్తారా లేక కుమార్తె కోసం ఆయన్ను తప్పిస్తారా అనేది ఇంకా తెలియడంలేదు.

అయితే, రాజ్యసభ సభ్యత్వానికి కవిత అంత సుముఖంగా లేరనే వార్తలు కూడా వచ్చాయి. కానీ ఆమెను రాష్ట్రంలో కంటే జాతీయ స్థాయి రాజకీయాలకు మాత్రమే పంపించాలని కేసీఆర్ నిర్ణయం తీసుకున్నట్టు చెబుతున్నారు. అందువల్ల మళ్లీ లోక్ సభ ఎన్నికలు వచ్చే వరకు వేచి చూడటం కంటే రాజ్యసభకు పంపించడం బెటరని ఆలోచిస్తున్నట్టు సమాచారం.

మొత్తానికి ఈ ముగ్గురిలో రాజ్యసభ సభ్యత్వం ఎవరికి దక్కుతుందనేది కచ్చితంగా తెలియాలంటే కొంత కాలం వేచి చూడక తప్పదు.