డోనాల్డ్‌ ట్రంప్‌.. ఇండియన్‌ మీడియాలో ఏంటీ ‘కంపు’.!

అమెరికా అధ్యక్షుడు భారతదేశానికి వచ్చారు.. ఆయనకి అనూహ్యమైన రీతిలో భారతదేశం స్వాగతం పలికింది. ఆసేతుహిమాచలం.. ఆయన రాక పట్ల ఆసక్తి చూపిన మాట వాస్తవం. ట్రంప్‌ ఏం మాట్లాడతారు.? ట్రంప్‌ రాకతో దేశానికి జరిగే మేలు ఏంటి.? ఇలా చాలా చాలా చర్చలు జరిగాయి. అమెరికాలో మనోళ్ళకి ట్రంప్‌ ఏమైనా వరాలు ఇస్తారా.? ఇరు దేశాల మధ్య సన్నిహిత సంబంధాలు బలోపేతమయ్యేలా చర్చలు జరుగుతాయా.? వంటి చర్చలు జరగడం సహజమే.

మరోపక్క, అమెరికా అధ్యక్షుడి వాహనాల్ని తెలుసుకోవడానికి ఆసక్తి కనబర్చడమూ తప్పు కాదు. ఎయిర్‌ ఫోర్స్‌ వన్‌ విమానం, మెరైన్‌ వన్‌ హెలికాప్టర్లు, బీస్ట్‌ కారు.. వీటి ప్రత్యేకతలు అన్నీ ఇన్నీ కావు కాబట్టి.. అవన్నీ మనకి చాలా ఆసక్తిని కలిగిస్తాయి. కానీ, ట్రంప్‌ మెడలో ఏ రంగు ‘టై’ కట్టుకుంటే మనకెందుకు.? ట్రంప్‌ సతీమణి మెలానియా వేసుకున్న డ్రస్సు గురించి మనకెందుకు.? ట్రంప్‌ కుమార్తె ఇవాంక ధరించిన డ్రస్సు ఖరీదు ఎంతైతే మనకెందుకు.? దురదృష్టవశాత్తూ ఇతరత్రా అంశాల గురించి కన్నా, పై మూడు అంశాల చుట్టూ ఎక్కువ చర్చ జరుగుతోంది.

పైగా, మీడియాలో ఈ అంశాలపై జరుగుతున్న చర్చ అందర్నీ విస్మయానికి గురిచేస్తోంది. మన మీడియా భావదారిద్య్రానికి ఇదే నిదర్శనమని ఓ రాజకీయ విశ్లేషకుడు మీడియా సాక్షిగా కుండబద్దలుగొట్టేశాడు. ‘అమెరికా – భారత్‌’ మధ్య సన్నిహిత సంబంధాలు ఈనాటివి కాదు.. ఎప్పటినుంచో కొనసాగుతున్నవే. ఈసారి ఇండియా – అమెరికా మధ్య బంధాన్ని మించి ట్రంప్‌ – మోడీ మధ్య బంధం ఎలివేట్‌ అవుతోంది. అది దేశానికి ఏమాత్రం అదనపు ప్రయోజనం చేకూర్చదన్నది ఓ సీనియర్‌ రాజకీయ విశ్లేషకుడి అభిప్రాయం. అందులోనూ నిజం లేకపోలేదు.

అమెరికాలో మన భారతీయుల్ని ట్రంప్‌ ఓ రేంజ్‌లో ఆడేసుకుంటున్నాడు.. తనదైన నిర్ణయాలతో. ఈ విషయమై భారత ప్రభుత్వం, అమెరికాతో చర్చించినా, ‘అమెరికా ఫస్ట్‌’ అనే నినాదానికి కట్టుబడిన ట్రంప్‌ మనసు మార్చడం జరిగే పని కాదు. ఇక, పాకిస్తాన్‌ విషయంలో అమెరికా వైఖరి సుస్పష్టం. భారత్‌ కంటే పాకిస్తాన్‌, అమెరికాకి అత్యంత సన్నిహిత దేశం. తీవ్రవాదాన్ని పాకిస్తాన్‌, భారత్‌పైకి ఎగదోస్తోన్నా, అమెరికా మాత్రం పాకిస్తాన్‌పై గట్టిగా మాట్లాడటానికి వెనుకడుగు వేస్తుంటుంది. పాకిస్తాన్‌ – అమెరికా మధ్య ‘బంధం’ అలాంటిది. ఇలాంటి విషయాలపై చర్చ జరిగితే ఏమన్నా ప్రయోజనం వుంటుందేమోగానీ, ట్రంప్‌ మెడలో ‘టై’ గురించిన చర్చ ఏంటి.? మెలానియా, ఇవాంకా డ్రస్సుల గురించిన డిబేట్లు ఏంటి.?