జనసేనాని ‘పవర్‌’ పంచ్‌: గెలుపోటముల పంచాయితీ కాదిది.!

ఓ గొప్ప వేదికపై నిల్చుని మాట్లాడే క్రమంలో ‘నేను ఓడిపోయాను’ అని చెప్పడానికి ధైర్యం కావాలి. ఆ ధైర్యం వుంది కాబట్టే, జనసేన అధినేత పవన్‌ కళ్యాణ్‌, ‘నేను రెండు చోట్లా ఓడిపోయాను..’ అని చెప్పగలిగారు. చెప్పడమే కాదు, ‘ఓటమితో నేనేమీ దిగులు పడలేదు. దాన్నసలు ఓటమిగా భావించడంలేదు.

ఎన్నికల్లో డబ్బు పంచకుండా మేం జనాన్ని ప్రభావితం చేయగలిగాం.. అది ఓ రకంగా గెలుపే.. మమ్మల్ని కొంతమంది అయినా గెలిపించి వుంటారు కదా..’ అని జనసేన అధినేత చాలా ఉద్వేగంగా మాట్లాడారు నిన్న ఢిల్లీలో భారతీయ ఛాత్ర సంసద్‌ నిర్వహించిన యూత్‌ పార్లమెంటరీ సదస్సులో. నిజమే, రాజకీయమంటే గెలుపోటముల పంచాయితీ కాదు. కానీ, దురదృష్టవశాత్తూ రాజకీయ వ్యవస్థ కేవలం గెలుపోటముల చుట్టూ మాత్రమే నడుస్తోంది.

గెలిచిన పార్టీ ఓడిన పార్టీని నాశనం చెయ్యాలని చూస్తోన్న రోజులివి. ఇలాగైతే, ప్రజల కోసం రాజకీయం చేసేదెవరు.? అసలు ప్రజల కోసం రాజకీయాలు చేయకపోతే రాజకీయాలు ఎందుకు.? ఈ చర్చ సాధారణ ప్రజానీకంలో జరగాలి. అలా చర్చ జరగాలంటే, జనసేనానిలా ముక్కు సూటిగా మాట్లాడగలగాలి. ఓటమిని జీర్ణించుకోవడానికి జస్ట్‌ కొన్ని నిమిషాలు మాత్రమే పట్టిందని జనసేన అధినేత పవన్‌ కళ్యాణ్‌ పలు సందర్భాల్లో చెప్పారు. అదెంత నిజం.? అన్న విషయాన్ని పక్కన పెడితే, అలా ఓటమిని జయించడం అనేది చాలా అరుదైన విషయం.

ఓ వ్యక్తి ఓడిపోతే అతని గౌరవం తగ్గుతుందా.? ఛాన్సే లేదు. గెలిచినోడి గౌరవం పెరుగుతుందా.? అంటే అదీ అర్థం పర్థం లేని విషయమే. గెలిచి ఓడుతారు కొందరు.. ఓడి గెలుస్తారు ఇంకొందరు. జనసేన అధినేత రెండో రకం. సైనిక సంక్షేమానికి జనసేన అధినేత కోటి రూపాయల విరాళాన్ని అందిస్తే దాన్ని పబ్లిసిటీ స్టంట్‌గా చూస్తున్నారు చాలామంది.

అయితే, చాలాకాలం క్రితమే పవన్‌ కళ్యాణ్‌, సైనిక సంక్షేమం కోసం లక్ష రూపాయల విరాళాన్ని ఇచ్చిన విషయాన్ని ఆ సైనికాధికారులే వెల్లడించడం గమనార్హం. వ్యవస్థల పట్ల అవగాహన, బాధ్యత పవన్‌ కళ్యాణ్‌కి ఎంత వున్నాయన్నదది చెప్పడానికి ఇంతకన్నా నిదర్శనం ఇంకేం కావాలి.?