ఈ వైఫల్యాలపై వైఎస్‌ జగన్‌ పెదవి విప్పరెందుకు.?

ఆంధ్రప్రదేశ్‌లో కంటే పొరుగు రాష్ట్రాల్లో పెట్రోల్‌, డీజిల్‌ ధరలు తక్కువ. ఈ విషయాన్ని ఆయా రాష్ట్రాల సరిహద్దుల్లో పెట్రోల్‌ బంకుల వద్ద బోర్డులు పెట్టి మరీ ప్రచారం చేసుకుంటున్నారు. తద్వారా రాష్ట్రానికి ఆదాయం గణనీయంగా తగ్గిపోతోంది. మరోపక్క, రాష్ట్రంలో రాజధాని విషయమై గడచిన ఎనిమిది నెలలుగా నెలకొన్న అనిశ్చితితో ప్రతిష్టాత్మక ప్రాజెక్టులు ఇతర రాష్ట్రాలకు పరుగులు పెడుతున్నాయి.

మొన్న కియా వ్యవహారంలో ఎంత రగడ చోటు చేసుకుందో చూశాం. ప్రభుత్వం రంగంలోకి దిగి, డ్యామేజీ కంట్రోల్‌ చర్యలు చేపట్టినా.. ఇంకా అనుమానాలు మాత్రం అలాగే వున్నాయి. మరోపక్క, ఇతర రాష్ట్రాలు కియా పరిశ్రమతో సంప్రదింపులు జరుపుతుండడం గమనార్హం.

ఇదిలా వుంటే, అదానీ గ్రూప్‌ ఆంధ్రప్రదేశ్‌లో 70 వేల కోట్ల రూపాయల పెట్టుబడికి ముందుకొచ్చిన మాట వాస్తవం. అది చంద్రబాబు హయాంలో జరిగిన ఒప్పందం. కానీ, అదంతా ఉత్తదేనని ప్రస్తుత ప్రభుత్వం చెబుతోంది. ‘3 వేల కోట్ల కంటే ఎక్కువ పెట్టుబడులు పెట్టలేం..’ అని అదానీ గ్రూప్‌ తేల్చి చెప్పిందని సాక్షాత్తూ సంబంధిత మంత్రి వెల్లడించారు. ‘70 వేల కోట్లు.. అనేది అప్పటి ఒత్తిళ్ళ మేరకు జరిగిన ఒప్పందం మాత్రమే..’ అని అంటున్నారాయన.

నిజానికి, ఈ తరహా ఒప్పందాలు కుదిరినప్పుడు, పరిస్థితుల్ని అందుకు అనుకూలంగా, వీలైతే.. ఇంకా అనుకూలంగా మలచితే.. ఇంకాస్త ఎక్కువ పెట్టుబడులు వస్తాయి. పరిస్థితులు అనుకూలించకపోతే.. ప్రాజెక్టులు వెనక్కి పోతాయి. రివర్స్‌ టెండరింగ్‌ పేరుతో.. రాష్ట్రంలో వైఎస్‌ జగన్‌ ప్రభుత్వం అలజడి సృష్టించిన మాట వాస్తవం. గత ఒప్పందాల్ని గౌరవించకుండా ‘రివర్స్‌’ రాజకీయం షురూ చేస్తే, తదుపరి ప్రభుత్వం ఇంకెలా వ్యవహరిస్తుందోనన్న ఆందోళనలు పెట్టుబడిదారుల్లో ఆందోళన పెంచడం సహజమే.

ఏదిఏమైనా, ఈ పరిస్థితులన్నీ రాష్ట్ర ప్రభుత్వ వైఫల్యంగానే చెప్పుకోవాల్సి వుంటుంది. ఈ వైఫల్యాల్ని ముఖ్యమంత్రి వైఎస్‌ జగన్‌ అడ్రస్‌ చెయ్యాల్సి వుంది. సమస్యల్ని అధిగమించి, రాష్ట్ర ప్రయోజనాల కోసం ముందడుగు వేయాలి. కానీ, ఆ దిశగా ప్రభుత్వం తరఫున చర్యలేమీ కన్పించడంలేదు. ఏడాది పాలన త్వరలో పూర్తి చేసుకోనున్నారు వైఎస్‌ జగన్‌ మోహన్‌రెడ్డి. ఇంకా, రాష్ట్రంలో ఈ అనిశ్చితి కొనసాగడం రాష్ట్ర భవిష్యత్తుకి అస్సలేమాత్రం మంచిది కాదు.