చంద్రబాబుకి సొంత పార్టీ కార్యకర్తలపైనే నమ్మకం లేదా.?

తెలుగుదేశం పార్టీకి 2019 ఎన్నికల్లో సీట్ల పరంగా కోలుకోలేని దెబ్బ తగిలిందిగానీ.. ఓట్లు మాత్రం మరీ అంత హీనంగా ఏమీ పడలేదు. కానీ, రాజకీయాల్లో సీట్లే ఎక్కువ మాట్లాడతాయి గనుక, చంద్రబాబు ఆ ఓట్లను పట్టించుకోవడంలేదు. అఫ్‌కోర్స్‌, ఇప్పుడు ఆంధ్రప్రదేశ్‌లో టీడీపీని ఎవరూ అంతగా పట్టించుకోవడం లేదనుకోండి.. అది వేరే విషయం. తాజాగా చంద్రబాబు ప్రజా చైతన్య యాత్ర పేరుతో జనంలోకి వెళ్ళారు. పలు ప్రాంతాల్లో రోడ్‌ షోలు నిర్వహించేశారు.

ఆయా సభల్లో మాట్లాడేశారు. ‘ఏం తమ్ముళ్ళూ, మీలో కూడా కొందరు ఒక్క ఛాన్స్‌ అడిగిన జగన్‌కి ఓటేశారు కదా..’ అంటూ తెలుగు తమ్ముళ్ళనే ప్రశ్నించేశారు. ‘లేదు.. లేదు..’ అని తెలుగు తమ్ముళ్ళు చెబుతున్నా, ‘నాకు తెలుసు.. మీరు వైఎస్సార్సీపీకే ఓటేశారు.. ఇప్పుడు అనుభవిస్తున్నారు..’ అంటూ చంద్రబాబు చేసిన వ్యాఖ్యలు టీడీపీ నేతల్ని సైతం ఆశ్చర్యానికి గురిచేస్తున్నాయి. ‘పార్టీకి వచ్చిన ఓట్లు తక్కువేమీ కాదు.. వైసీపీకి ఇంకాస్త ఎక్కువ ఓట్లు వచ్చాయంతే. ఈ పరిస్థితుల్లో క్యాడర్‌లో ధైర్యాన్ని నింపాలి. అంతే తప్ప, వారిపై అనుమానం వ్యక్తం చేయడం తగదు..

ఇది పార్టీకి మరింత నష్టం కలిగిస్తుంది..’ అంటూ టీడీపీ నేతలు వాపోతున్నారు. తొలి రోజే చంద్రబాబు తెలుగుదేశం పార్టీని దారుణంగా దెబ్బ తీసేశారంటూ ప్రజా చైతన్య యాత్రకు పెద్దయెత్తున కార్యకర్తల్ని తరలించిన నేతలు వాపోవాల్సి వస్తోంది. ఇదిలా వుంటే, చంద్రబాబు ఆయా ప్రాంతాల్లో పర్యటిస్తూ, అమరావతి అంశాన్ని ఎలివేట్‌ చేస్తుండడం సత్పÛలితాల్నే ఇస్తోందట. ‘జై అమరావతి..’ అంటూ చంద్రబాబు నినదిస్తుండడం.. అధికార పక్షం వైసీపీ గుండెల్లో కాస్త అలజడిని సృష్టిస్తోంది.

మూడు రాజధానుల ఆలోచనతో రాష్ట్రాన్ని ప్రాంతాల వారీగా వైసీపీ విడగొట్టి, విద్వేషాలు రెచ్చగొట్టిన విషయం విదితమే. ‘మా ఉత్తరాంధ్ర, మా రాయలసీమ, మా కోస్తా.. మా ఆంధ్ర..’ అనే చర్చకు వైసీపీ ఆవకాశమిస్తే, చంద్రబాబు మాత్రం ‘అంతా ఒకటే’ అంటున్నారు. ఈ విషయంలో చంద్రబాబుని మెచ్చుకోవాల్సిందే. కానీ, ముందు ముందు చంద్రబాబుకీ ఈ విషయంలో సమస్యలు తప్పకపోవచ్చు.